సౌత్ సినిమా నుంచి..ఇక పై అన్నీ మెరుపులేనా?

సౌత్ సినిమా... యావ‌త్ దేశం మొత్తం గ‌ర్వంగా చెప్పుకుంటున్న పేరిది. గ‌త కొంత కాలం క్రితం ఇండియ‌న్ సినిమా అంటే కేవ‌లం బాలీవుడ్ మాత్ర‌మే. కానీ ఇప్ప‌డు ట్రెండు మారింది. ఇండియ‌న్ సినిమా అంటే సౌత్ అనే నినాదం మొద‌లైంది. దానికి ప్ర‌ధాన కార‌ణం గ‌త కొన్నేళ్లుగా సౌత్ నుంచి విడుద‌లైన సినిమాల‌న్నీ బ్యాక్ టు బ్యాక్ పాన్ ఇండియా వైడ్ గా బ్లాక్ బ‌స్ట‌ర్ హిట్ లుగా నిలుస్తూ దేశ వ్యాప్తంగానే కాకుండా వ‌ర‌ల్డ్ వైడ్ గా ప్ర‌శంస‌ల్ని ద‌క్కించుకుంటున్నాయి. రీసెంట్ గా విడుద‌లైన పుష్ప‌, RRR, కేజీఎఫ్ వంటి సినిమాలు బ్లాక్ బస్ట‌ర్ హిట్ లుగా నిలిచి ద‌క్షిణాది సినిమా అంటే యావ‌త్ ప్ర‌పంచ సినిమా ఆస‌క్తిగా చూసేలా చేశాయి. రానున్న రోజుల్లో సౌత్ సినిమా నుంచి మ‌రిన్ని మెరుపులు రానున్నాయి.

'కేజీఎఫ్' సిరీస్ సినిమాల‌తో బ్యాక్ టు బ్యాక్ పాన్ ఇండియా వైడ్ గా బ్లాక్ బ‌స్ట‌ర్ల‌ని సొంత చేసుకుని టాక్ ఆఫ్ ది ఇండియా గా నిలిచాడు క‌న్న‌డ రాకింగ్ స్టార్ య‌ష్‌. దేశ వ్యాప్తంగా సంచ‌ల‌నం సృష్టించిన ఈ మూవీ ప్ర‌పంచ వ్యాప్తంగా రికార్డు స్థాయి వ‌సూళ్ల‌ని రాబ‌ట్టి య‌ష్ ని పాన్ ఇండియా స్టార్ గా నిల‌బెట్టింది. ఈ  మూవీ విడుద‌లై నెల‌లు గ‌డుస్తున్నా య‌ష్ ఇప్ప‌టి వ‌ర‌కు మ‌రో ప్రాజెక్ట్ ని ప్ర‌క‌టించ‌లేదు. దీంతో త‌ను ఎలాంటి ప్రాజెక్ట్ తో రానున్నాడ‌ని స‌ర్వ‌త్రా ఆస‌క్తి మొద‌లైంది.

ఇక RRR తో వ‌ర‌ల్డ్ సినిమా ఆశ్చ‌ర్యంగా చూసేలా బ్లాస్టింగ్ హిట్ ని అందించిన యంగ్ టైగ‌ర్ ఎన్టీఆర్‌, మెగా ప‌వ‌ర్ స్టార్ రామ్ చ‌ర‌ణ్ త్వ‌ర‌లో రెండు భారీ ప్రాజెక్ట్ ల‌తో ప్రేక్ష‌కుల ముందుకు రాబోతున్నారు. ఇప్ప‌టికే రామ్ చ‌ర‌ణ్ RC 15 అనే వ‌ర్కింగ్ టైటిల్ తో శంక‌ర్ డైరెక్ష‌న్ లో ఓ భారీ సినిమాకు శ్రీ‌కారం చుట్ట‌డం అది దాదాపుగా స‌గ‌భాగం షూటింగ్ పూర్తి చేసుకోవ‌డం తెలిసిందే. త్వ‌ర‌లోనే త‌దుప‌రి షెడ్యూల్ ప‌ట్టాలెక్క‌బోతోంది.

ఇక ఎన్టీఆర్ త‌న 30వ ప్రాజెక్ట్ స్టార్ డైరెక్ట‌ర్ కొర‌టాల శివ‌తో చేయ‌బోతున్నాడు. గ‌త కొన్ని నెల‌లుగా అప్పుడు ఇప్ప‌డు అంటూ ఊరిస్తున్న ఈ మూవీని న‌వంబ‌ర్ లో లాంఛ‌నంగా ప్రారంభించి డిసెంబ‌ర్ నుంచి సెట్స్ పైకి తీసుకెళ్ల‌బోతున్నారు. ఈ ప్రాజెక్ట్ పై ఎన్టీఆర్ భారీ ఎక్స్‌పెక్టేష‌న్స్ పెట్టుకున్నాడ‌ట‌. ఇదే బాట‌లో క‌మ‌ల్ హాస‌న్ న‌టిస్తున్న క్రేజీ ప్రాజెక్ట్ 'ఇండియ‌న్ 2' కూడా రాబోతోంది. ప‌లు కార‌ణాల వ‌ల్ల ఆగిపోయిన ఈ మూవీ షూటింగ్ ఎట్ట‌కేల‌కు ఇటీవ‌లే తిరిగి ప్రారంభ‌మైంది. 'భార‌తీయుడు'కు సీక్వెల్ గా రానున్న ఈ సినిమాపై దేశ వ్యాప్తంగా అంచ‌నాలున్నాయి.

'కేజీఎఫ్‌' సిరీస్ సినిమాల‌తో సంచ‌ల‌నం సృష్టించిన ప్ర‌శాంత్ నీల్ ప్ర‌స్తుతం పాన్ ఇండియా స్టార్ ప్ర‌భాస్ తో 'స‌లార్‌' మూవీని తెర‌కెక్కిస్తున్నాడు. తొలిసారి ప్ర‌భాస్‌, ప్ర‌శాంత్ నీల్ ల కాంబినేష‌న్ లో రూపొందుతున్న పాన్ ఇండియా కావ‌డంతో ఈ ప్రాజెక్ట్ కోసం యావ‌త్ దేశం మొత్తం ఆస‌క్తిగా ఎదురుచూస్తోంది. మ‌ణిరత్నం డ్రీమ్ ప్రాజెక్ట్ గా రూపొందిన 'పొన్నియిన్ సెల్వ‌న్ 1' ఇటీవ‌ల విడుద‌లై త‌మిళంలో సంచ‌ల‌న విజ‌యాన్ని సాధించింది. దీనికి సీక్వెల్ గా 'పొన్నియిన్ సెల్వ‌న్ 2' రాబోతోంది. ఫ‌స్ట్ పార్ట్ ఓ మిస్స‌యిన ఎమోష‌న్‌, మ‌రింత గ్రాండీయ‌ర్ పార్ట్ 2లో వుండే అవ‌కాశం వుండ‌టంతో ఈ ప్రాజెక్ట్ టాక్ ఆఫ్ ది ఇండియాగా మారింది.

క‌మ‌ల్ హాస‌న్ తో సినిమాటిక్ యూనివ‌ర్స్ నేప‌థ్యంలో లోకేష్ క‌న‌గ‌రాజ్ తెర‌కెక్కించిన 'విక్ర‌మ్‌' సంచ‌న విజ‌యాన్ని సాధించింది. ఈ సినిమాకు కార్తి 'ఖైదీ'కి ఇంట‌ర్ క‌నెక్ష‌న్ వున్న‌ట్టుగా చూపించిన లోకేష్ క‌న‌గ‌రాజ్ త్వ‌ర‌లో విజ‌య్ తో ఓ భారీ యాక్ష‌న్ డ్రామాని తెర‌కెక్కించ‌బోతున్నాడు. విజ‌య్ న‌టించ‌నున్న 67వ సినిమా ఇది. ఈ సినిమాకు విక్ర‌మ్‌, ఖైదీ ల‌కు లోకేష్ ఇంట‌ర్ లింక్ ఇచ్చే అవ‌కాశం వుండ‌టం.. ఈ మూవీలో విజ‌య్ గ్యాంగ్ స్ట‌ర్ గా క‌నిపించ‌నుండ‌టంతో ఈ ప్రాజెక్ట్ కూడా హాట్ టాపిక్ గా మారింది.

చాలా కాలంగా త‌న‌దైన హిట్ ని అందించ‌లేక‌పోతున్న త‌లైవా ర‌జ‌నీకాంత్ ఈ సారి 'బీస్ట్' డైరెక్ట‌ర్ తో క‌లిసి 'జైల‌ర్‌' మూవీని చేస్తున్నాడు. ఇప్ప‌టికే విడుద‌లైన ర‌జ‌నీ లుక్ సినిమాపై అంచ‌నాలు పెంచేసి ప్రేక్ష‌కుల్లో ఆస‌క్తిని రేకెత్తిస్తోంది. ఇక మ‌ల‌యాళ సూప‌ర్ స్టార్ న‌టించిన 'లూసీఫ‌ర్‌' కు సీక్వెల్ గా రానున్న సినిమాపై కూడా అంచ‌నాలున్నాయి. వీటితో పాటు అజిత్ న‌టిస్తున్న భారీ యాక్ష‌న్ ఎంట‌ర్ టైన‌ర్ 'తునివు'. హెచ్. వినోద్ తో క‌లిసి అజిత్ ముచ్చ‌ట‌గా మూడ‌వ ప్రాజెక్ట్ గా ఈ మూవీని చేస్తున్నాడు.

ఇప్ప‌టి వ‌ర‌కు వీరి కాంబినేష‌న్ లో వ‌చ్చిన నేర్కొండ పార్వై, వాలిమై బ్లాక్ బ‌స్ట‌ర్ లుగా నిలిచాయి. 'తునివు' కూడా అదే స్థాయిలో వుంటుంద‌ని అంతా ఊహిస్తున్నారు. ఇక మ‌హేష్ తో త్రివిక్ర‌మ్ చేస్తున్నభారీ ప్రాజెక్ట్ పై కూడా అంచ‌నాలున్నాయి. ప‌వ‌న్ స్టార్ ప‌వ‌న్ క‌ల్యాణ్ 'హ‌రి హ‌ర వీర‌మ‌ల్లు', నాని ద‌స‌రా. అల్లు అర్జున్ 'పుష్ప 2'ల కోసం యావ‌త్ దేశం మొత్తం ఆస‌క్తిగా ఎదురుచూస్తుండ‌టంతో సౌత్ సినిమా నుంచి..ఇక పై అన్నీ మెరుపులే అని తెలుస్తోంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.