ఇంతకీ మహేష్ ఆ సినిమా చేస్తున్నట్లేనా?

ప్రకటనలదేముంది.. ఘనంగా ఇచ్చేస్తారు. కానీ సినిమా ఉంటుందా లేదా అన్నది రెగ్యులర్ షూటింగ్ మొదలయ్యే వరకు గ్యారెంటీ లేదు. ముహూర్తం కూడా జరుపుకున్న చాలా సినిమాలు ఆ తర్వాత ఉన్నట్లుండి ఆగిపోతుంటాయి. ఇదేదో చిన్న సినిమాల విషయంలోనే అనుకుంటే పొరబాటే. పవన్ కళ్యాణ్-సంపత్ నంది.. రామ్ చరణ్-కొరటాల శివ.. రవితేజ-వేణు శ్రీరామ్ సినిమాలు ఇలాగే ముహూర్తం జరుపుకున్నాక ఆగిపోయాయి. ‘బాబు బంగారం’ కంటే ముందు వెంకటేష్-మారుతిల ‘రాధ’కు కూడా అలాగే బ్రేక్ పడింది. ఇప్పుడు మహేష్ బాబు-వంశీ పైడిపల్లిల సినిమా మీద కూడా ఇలాంటి డౌట్లే ఉన్నాయి.

గత నెల మహేష్ పుట్టిన రోజు సందర్భంగా అతను హీరోగా వంశీ పైడిపల్లి దర్శకత్వంలో సినిమా చేయబోతున్నట్లు ఘనమైన ప్రకటన ఇచ్చారు పొట్లూరి వరప్రసాద్. ఐతే ఆ ప్రకటన ఇచ్చే సమయానికి స్క్రిప్టు అయితే లాక్ కాలేదు. వంశీ జస్ట్ ఓ లైన్ చెప్పాడు. మహేష్ బాగుందన్నాడు. అంతలోనే మంచి అకేషన్ వచ్చిందని పీవీపీ యాడ్ ఇచ్చాడు. ఐతే ఈ మధ్య గట్టి ఎదురు దెబ్బలు తిన్న నేపథ్యంలో మహేష్ మరీ కాన్షియస్ గా ఉంటున్నట్లు సమాచారం. కాబట్టి స్క్రిప్టు ఫైనలైజ్ అయితే తప్ప ఈ సినిమా ఉన్నట్లు కాదు. ప్రాజెక్టు అయితే ఆ దశకు ఇంకా రాలేదు. వంశీ ప్రస్తుతం వర్క్ చేస్తున్నాడు. ఇంకొన్ని రోజుల్లో మహేష్ ను కలవబోతున్నాడు. మరి అతను ఎలా రెస్పాండవుతాడో చూడాలి. అయినా ఈ సినిమా మొదలవడానికి ఇంకో ఏడాదైనా పట్టొచ్చు. ఎందుకంటే మురుగదాస్ సినిమా పూర్తి చేసి.. కొరటాలదీ అవగొట్టేసి.. ఆ తర్వాతే ఈ ప్రాజెక్టులోకి వస్తాడు మహేష్. ఆలోపు ఎలాంటి పరిణామాలు జరుగుతాయో చూడాలి.