సేతుప‌తి గాలానికి చేప చిక్క‌డం లేదా?

భారీ బడ్జెట్ చిత్రాలు హిట్టు టాక్ వ‌స్తే ఓకే కానీ.. ఫ్లాప్ టాక్ వ‌స్తే ఎలా ఉంటుందో `సాహో` ప్రూవ్ చేసింది. బాహుబ‌లి 1,2 చిత్రాల రిజ‌ల్ట్ ని ఆశించి భారీ హైప్ క్రియేట్ చేసినందుకు ఈ సినిమా ఏదో చేస్తుంది అనుకుంటే ఇంకేదో అయ్యింది. హిందీలో స‌క్సెస‌వ్వ‌డం ఒక ర‌కంగా ఊర‌ట అనుకుంటే త‌మిళంలో మ‌రీ ఘోరంగా ఆడింద‌న్న టాక్ వినిపించింది. అయితే ఆ ప్ర‌భావం సాహో కంటే మ‌రో భారీ బ‌డ్జెట్ చిత్రం `సైరా` పై ప‌డింద‌న్న చ‌ర్చ సాగుతోంది. త‌మిళ మార్కెట్లో `సైరా` బిజినెస్ కి సాహో ప‌రాజ‌యం అడ్డు ప‌డుతోంద‌న్న టాక్ వేడెక్కిస్తోంది.

అయితే `సైరా-న‌రసింహారెడ్డి` త‌మిళ మార్కెట్ ని చ‌క్క‌దిద్దేందుకు మెగాస్టార్ ఛ‌రిష్మా మాత్ర‌మే స‌రిపోద‌ని భావించిన రామ్ చ‌ర‌ణ్ బృందం ఎంతో తెలివిగా విజ‌య్ సేతుప‌తి లాంటి టాప్ త‌మిళ హీరోని కీల‌క పాత్ర‌ధారిని చేశారు. సేతుప‌తికి త‌మిళంలో విల‌క్ష‌ణ న‌టుడిగా గుర్తింపు ఉంది. అది సైరాకి క‌లిసొస్తుంద‌ని భావిస్తున్నారు. అందుకు త‌గ్గ‌ట్టే విజ‌య్ సేతుప‌తి త‌మిళ్ మాట్లాడే యోధుడి పాత్ర‌లో న‌టించారు. త‌మిళ యోధుడిగా `రాజా పాండి` లుక్ ఇప్ప‌టికే ఆక‌ట్టుకుంది. తెలుగులో తొలి మూవీలోనే విజయ్ సేతుపతి పవర్ ఫుల్ పాత్రలో న‌టించారు. ఆంగ్లేయుల్ని ఒణికించిన ఉయ్యాల‌వాడ న‌ర‌సింహ‌రెడ్డి .. త‌మిళులు - తెలుగు వారిని ఒకే తాటిపై తెచ్చేందుకు చాలా కృషి చేశారని.. ఈ నేప‌థ్యంలో త‌మిళ‌.. తెలుగు భాష‌ల ప్ర‌జ‌ల్ని ఒక్క‌టిగా చేస్తూ.. అదిరిపోయే డైలాగ్స్ చెప్పే క్యారెక్ట‌ర్ చేశార‌ట‌. అలాగే సేతుప‌తి పాత్ర‌లో కామిక్ యాంగిల్ సినిమా ఆద్యంతం ర‌క్తి క‌ట్టిస్తుంద‌ని తెలుస్తోంది. ఇక అత‌డు చెప్పే డైలాగ్స్ మైమ‌రిపించ‌నున్నాయ‌ట‌. అయితే ఇవ‌న్నీ ప్ల‌స్ అనుకుంటే `సాహో` ప‌రాజ‌యం అక్క‌డ ట్రేడ్ లో టాక్ ఆఫ్ ది టౌన్ గా మార‌డం మైన‌స్ అయ్యింద‌ని చెబుతున్నారు.

అమితాబ్ బ‌చ్చ‌న్‌- జ‌గ‌ప‌తిబాబు- సుదీప్‌- న‌య‌న‌తార-త‌మన్నా ఈ చిత్రంలో ముఖ్య పాత్ర‌లు పోషిస్తున్నారు. శ్రీ‌మ‌తి సురేఖ కొణిదెల స‌మ‌ర్ప‌ణ‌లో కొణిదెల ప్రొడ‌క్ష‌న్ కంపెనీ బ్యాన‌ర్ పై రామ్ చ‌ర‌ణ్ సైరా చిత్రాన్ని నిర్మిస్తుండ‌గా యాక్షన్‌ సీన్స్ కోసం స్కైఫాల్‌- హ్యారీ పొట‌ర్ చిత్రాల‌కు ప‌ని చేసిన హాలీవుడ్‌ స్టంట్‌ మాస్టర్లు ప‌ని చేశారు. గాంధీ జ‌యంతి కానుక‌గా అక్టోబ‌ర్ 2న సినిమాని రిలీజ్ చేస్తున్నారు.