ఇంకెన్ని రోజులు ఆగాలి గురు

గత ఏడాది ఎలాంటి అంచనాలు లేకుండా విడుదలై సంచలన విజయాన్ని సొంతం చేసుకున్న ఆరెక్స్ 100 అటు మ్యూజికల్ గా ఇటు కమర్షియల్ గా సృష్టించిన సెన్సేషన్ చిన్నది కాదు. దర్శకుడు అజయ్ భూపతి మొదటి సినిమాకే ఇలాంటి వైవిధ్యమైన ప్రేమ కథను ఎంచుకున్న తీరు విమర్శకుల చేత కూడా మెప్పు పొందేలా చేసింది. అయితే ఇది విడుదలై ఎనిమిది నెలలు దాటేసింది. ఇప్పటికింకా అజయ్ భూపతి కొత్త సినిమా మొదలుకానే లేదు.

మొదట్లో రామ్ పోతినేనితో అన్నారు. దాని తర్వాత ఎలాంటి అప్ డేట్ లేదు. కట్ చేస్తే ఇక్కడ పూరి జగన్నాధ్ తో ఐస్మార్ట్ శంకర్ కోసం మూడు నెలలు రామ్ బ్లాక్ అయిపోయాడు. సో ఆ ఛాన్స్ ఇప్పట్లో లేనట్టే. మరోసారి గోపి చంద్ తో అని వినిపించింది. ఇప్పుడు తిరు ప్రాజెక్ట్ తో అతనూ బిజీ అయ్యాడు . నితిన్ పేరు కూడా వినిపించింది. ఇంకా వెంకీ కుడుముల సినిమానే మొదలు కాలేదు కాబట్టి అదీ గాసిప్పే అని తేలిపోయింది ఇప్పుడు బాల్ బెల్లంకొండ సాయి శ్రీనివాస్ వద్దకు వచ్చి ఆగింది. తనతో అజయ్ భూపతి చేయడం కన్ఫర్మ్ అని మొన్న హీరో పుట్టిన రోజు సందర్భంగా చెప్పుకున్నారు.

అయితే అధికారిక ప్రకటన కాని షూటింగ్ ఫలాన టైంలో మొదలుపెట్టబోతున్నట్టుగా ఎలాంటి వార్తా లేదు. సాయి శ్రీనివాస్ తేజ దర్శకత్వంలో చేస్తున్న మూవీ కాకుండా రమేష్ వర్మకు కూడా కమిట్ అయ్యాడు. ఇంకో రెండు ప్రాజెక్ట్స్ వెయిటింగ్ లో ఉన్నాయి. ఏది ఏ వరస ముందు వస్తుందో అజయ్ భూపతిది ఫస్ట్ ఉంటుందా అనే క్లారిటీ ఇంకా రావాల్సి ఉంది. ఆరెక్స్ 100 లాంటి సెన్సేషన్ తర్వాత ఇంత గ్యాప్ ఇచ్చిన అజయ్ కొత్త సినిమా కోసం ఎదురు చూస్తున్న వాళ్ళు ఉన్నారుగా. కాస్త సీరియస్ గా తీసుకుని త్వరగా మొదలుపెడితే బెటరేమో.