రానాకు అక్కడేం పని పడిందో ?

బాహుబలిలో భల్లాలదేవాగా రానాకు వచ్చిన పేరు చిన్నదేమీ కాదు. నార్త్ లో ప్రభాస్ తో సమానంగా ఇతనికీ గుర్తింపు వచ్చింది. అందుకే బాలీవుడ్ లో ఆఫర్లు వెల్లువలా వేస్తూనే ఉన్నాయి. ప్రస్తుతం హౌస్ ఫుల్ 4 పూర్తి చేసి దాని విడుదల కోసం ఎదురు చూస్తున్న రానా దీంతో పాటు హాతీ మేరె సాథీ చేస్తున్న సంగతి తెలిసిందే. ఏనుగు నేపధ్యంలో రూపొందుతున్న ఈ క్లాసిక్ రీమేక్ మీద అక్కడ అంచనాలు భారీగానే ఉన్నాయి.

ఇదిలా ఉండగా నిన్న ప్రముఖ దర్శక నిర్మాత కరణ్ జోహార్ ఇంటి నుంచి కారులో బయటికి వస్తున్న రానా మీడియా కంటికి చిక్కాడు. కారణం తెలియలేదు కాని ఏదో కీలకమైన ప్రాజెక్ట్ కోసం మీటింగ్ జరిగినట్టు మాత్రం అర్థమవుతోంది. రానాతో కరణ్ జోహార్ ఏదో గట్టిగానే ప్లాన్ చేసినట్టు ఉన్నాడు. ప్రభాస్ ను సైతం హిందిలో లాంచ్ చేయాలని కరణ్ ఎప్పటి నుంచో ప్రయత్నిస్తున్నాడు. కాని డార్లింగ్ స్ట్రెయిట్ మూవీ చేయడంలో అంత సుముఖంగా లేకపోవడంతో అది ముందుకు వెళ్ళలేదు.

ఆ ఛాన్స్ కాస్తా సాహో మేకర్స్ కు వెళ్లిపోయింది. అందుకేనేమో రానాతో సెట్ చేస్తున్నాడు కాబోలు. మరో మల్టీ స్టారర్ భుజ్ తో పాటు హిరణ్యకశిప చేయబోతున్న రానా హీరోగానే కాకుండా తనకు ఛాలెంజ్ అనిపించే ఏ పాత్రకైనా సై అంటున్నాడు. తమిళ్ లో నటిస్తున్న మరో చారిత్రాత్మక చిత్రం షూటింగ్ చివరి దశలో ఉంది. నేనే రాజు నేనే మంత్రి తర్వాత కొంత గ్యాప్ వచ్చినప్పటికి ఈ ఏడాది నుంచి దూకుడు పెంచబోతున్నాడు రానా.