రామ్ మీద ఇస్మార్ట్ భారం

ఎనర్జిటిక్ స్టార్ అనే ట్యాగ్ అయితే ఉంది కాని ఇప్పటిదాకా దాన్ని పూర్తిగా వాడుకునే సినిమా చేయని రామ్ మొదటిసారి ఊర మాస్ అవతారంలో ట్రై  చేసిన ఇస్మార్ట్ శంకర్ ఊహించని గొప్ప ఫలితాన్ని ఇవ్వడంతో స్వీట్ షాక్ లో ఉన్నాడు. ట్రైలర్ వచ్చినప్పుడు నెగటివ్ టాక్ వచ్చినా తన స్లాంగ్ మీద కామెంట్స్ వినిపించినా రిలీజయ్యే దాకా కామ్ గా ఉన్న రామ్ వాటికి రిజల్ట్ తో చెక్ పెట్టేశాడు. ఫైనల్ రన్ పూర్తయ్యే లోపు ఎంత వస్తుందనేది ట్రేడ్ ఊహకు అందటం లేదు.

మధ్యలో స్లో కావడం ఆతర్వాత రిలీజైన కొత్త సినిమాలకు ఏమంత పాజిటివ్ టాక్ రాకపోవడం తిరిగి మాస్ ఇస్మార్ట్ శంకర్ వైపే మాస్ తిరిగి చూడటం వెరసి జోరు బాగానే కొనసాగుతోంది. ఈ కిక్ ఇంకో రెండు వారాలు కొనసాగుతుంది కానీ అసలైన పరీక్ష రామ్ కు ఆ తర్వాత ఉంటుంది. ఇప్పుడు తనను మాస్ రోల్ లో రిసీవ్ చేసుకున్నారు కాబట్టి ఇకపై అన్ని అలాంటి పాత్రలకే ప్రాధాన్యం ఇవ్వాలా లేక నేను శైలజ టైపులో లవర్ బాయ్ రోల్స్ కంటిన్యూ చేయాలా అనే ఒత్తిడి అయితే రామ్ మీద ఖచ్చితంగా ఉంటుంది.

ఇస్మార్ట్ శంకర్ లో కంటెంట్ గురించి కాసేపు పక్కన పెడితే మంచి సీజన్ లో ఐదారు నెలల నుంచి మాస్ మూవీస్ లేని టైంలో వచ్చి లాభపడింది. అంతే తప్ప ఇదేదో చరిత్రలో లిఖించదగ్గ మాస్ హిట్ అని చెప్పుకోలేం. కాబట్టి దీని మేనియాలో పడి అన్ని అలాంటి సినిమాలు ఒప్పుకున్నా రిస్కే. కాకపోతే వెంటనే స్మూత్ లవర్ బాయ్ పాత్రలు చేస్తే జనం అంత ఈజీగా డైజెస్ట్ చేసుకోలేకపోవచ్చు. అందుకే రామ్ కొంత టైం తీసుకుని కొత్త కథలు మరోసారి పునఃపరిశీలన చేసి ఆ తర్వాత నిర్ణయం తీసుకుంటాడట.