ఆర్ ఆర్ ఆర్ కోసం రాజీ సుందరి ?

టాలీవుడ్ బిగ్గెస్ట్ మల్టీ స్టారర్ గా దేశవ్యాప్త సినిమా ప్రేమికుల దృష్టిలో ఉన్న ఆర్ ఆర్ ఆర్ రెండో షెడ్యూల్ ఇటీవలే మొదలైన సంగతి తెలిసిందే. జూనియర్ ఎన్టీఆర్ రామ్ చరణ్ కాంబోలో సీన్లు వరసబెట్టి తీస్తున్న రాజమౌళి హీరొయిన్ల సంగతి ఇంకా తేల్చడం లేదు. బాహుబలి తరహాలో దీన్ని అంతర్జాతీయ స్థాయిలో ప్రమోట్ చేయాలనీ డిసైడ్ కావడంతో కథానాయికల విషయంలో ఆచి తూచి వ్యవహరిస్తున్నట్టు తెలిసింది. తాజా సమాచారం మేరకు రాజమౌళి ఇటీవలే అలియా భట్ ను కలిసాడట. గత ఏడాది రాజీలో భారతదేశ గూడచారిగా అద్బుతమైన పెర్ఫార్మన్స్ తో కట్టిపడేసిన అలియా అయితేనే ఆర్ ఆర్ ఆర్ లాంటి పీరియాడిక్ ఫాంటసీకి ప్లస్ అవుతుందని జక్కన్న భావించడంతో వెళ్లి కలిసాడట.

ఇక్కడ మధ్యవర్తిగా వ్యవహరించింది బాహుబలి హింది నిర్మాత కరణ్ జోహార్. స్టూడెంట్ అఫ్ ది ఇయర్ ద్వారా అలియాను బాలీవుడ్ కు పరిచయం చేసింది ఇతనే. అలియా భట్ ఏ నిర్ణయం తీసుకుంటుంది అనే దాని మీదే ఫస్ట్ సెలక్షన్ పూర్తవుతుంది. ప్రస్తుతం హిందిలో అలియా  రెండు మల్టీ స్టారర్స్ లో నటిస్తోంది. కలంక్ తో పాటు బ్రహ్మాస్త్రలో తనే హీరొయిన్. రెండో దాంట్లో నాగార్జున కూడా ఉన్నాడు. ఇది కూడా ఓకే అయితే ముచ్చటగా మూడో మల్టీ స్టారర్ తన ఖాతాలో పడుతుంది.

అయితే అలియా ఇది ఒప్పుకోవాలి అంటే భారీ ఎత్తున బల్క్ డేట్స్ ఇచ్చే అవకాశం ఉందో లేదో చూసుకోవాలి. పైన చెప్పినవి కాకుండా నాన్న మహేష్ భట్ తీయబోయే సడక్ సీక్వెల్ కూడా అలియా కమిట్ అయ్యింది. ఈ నేపధ్యంలో నిర్ణయానికి కొంత టైం పట్టొచ్చు. పనిలో పనిగా రెండో ఛాయస్ గా రాజమౌళి పరిణితి చోప్రాతో కూడా చర్చలు జరుపుతున్నట్టు సమాచారం. ఏ రకంగా చూసినా తెలుగు ప్రేక్షకులకు కొత్తగా అనిపించే బాలీవుడ్ భామలను రంగంలో దించాలని రాజమౌళి గట్టిగా డిసైడ్ అయినట్టు ఉన్నాడు. చూద్దాం