అన్‌స్టాపబుల్ షో చేయడానికి ముఖ్య కారణం ఆయనే: NBK
ఆహా ఓటిటి సూపర్ హిట్ టాక్ షో "అన్‌స్టాపబుల్ విత్ ఎన్బీకే" నాలుగవ సీజన్ ప్రకటనతో మంచి బజ్ క్రియేట్ చేసుకుంది.
ఆహా ఓటిటి సూపర్ హిట్ టాక్ షో "అన్‌స్టాపబుల్ విత్ ఎన్బీకే" నాలుగవ సీజన్ ప్రకటనతో మంచి బజ్ క్రియేట్ చేసుకుంది. ఈ సీజన్‌కు సంబంధించిన ఫస్ట్ లుక్, 3డి అనిమేటెడ్ ప్రోమో విడుదల చేయడంతో బాలయ్య అభిమానుల్లో ఆసక్తి మరింత పెరిగింది. ఈ సీజన్‌లో బాలకృష్ణ సరికొత్త సూపర్ హీరో అవతారం ఎత్తి ప్రేక్షకుల ముందుకు రాబోతున్నాడు. ఈ ఈవెంట్, రతన్ టాటా కు స్మరణార్థం రెండు నిమిషాలు మౌనం పాటించడం ద్వారా ప్రారంభమైంది.
కార్యక్రమంలో ప్రముఖ అతిధులు అల్లు అరవింద్, అనిల్ రావిపూడి, తేజస్విని నందమూరి, అజిత్ ఠాకూర్, రవికాంత్ సాబ్‌నవిస్, మరియు గ్రీన్ గోల్డ్ అనిమేషన్ వ్యవస్థాపకుడు రాజీవ్ చిలక పాల్గొన్నారు. ఈ సందర్భంగా ఆహా సంస్థ ఈ సీజన్ గురించి, ప్రేక్షకులు ఎలాంటి కొత్త అంశాలను అంచనా వేయవచ్చో వివరించారు.
కార్యక్రమంలో బాలయ్య 50 ఏళ్ల సినీ ప్రస్థానంపై చర్చ జరిగింది. బాలకృష్ణ సూపర్ హీరోగా ప్రేక్షకుల హృదయాల్లో నిలిచిపోయినట్టు, రియల్ లైఫ్‌లోనూ ఆయన అభిమానులతో కనెక్ట్ అవుతారన్న విషయాన్ని వారు ప్రస్తావించారు. వ్యక్తిగత అనుభవాలు, బాలయ్యను ఒక ప్రభావవంతమైన కథానాయకుడిగా వివరించడంలో చాలా మంది ప్రముఖులు తన భావాలను పంచుకున్నారు.
తేజస్విని నందమూరి తన తండ్రిని స్టేజ్ మీదకు ఆహ్వానించి, సీజన్ 4 ప్రోమోను విడుదల చేయించారు. ఈ ట్రైలర్‌లో గ్రామస్తులు తమ జీవితాల్లో వెలుగులు తెచ్చే సూపర్ హీరో కోసం ఎదురుచూస్తున్నారు. అప్పుడే బాలకృష్ణ సూపర్ హీరోగా అద్భుతమైన ఎంట్రీ ఇస్తారు. ఇది "బాలయ్య పండగ"గా చిత్రీకరించబడింది. ఈ సీన్‌తో ప్రేక్షకులలో మంచి అంచనాలు ఏర్పడ్డాయ. కార్యక్రమంలో పాల్గొన్నవారు సీజన్ సెట్లను, సీజన్‌కు సంబంధించిన ప్రోమోని చూసి ఆశ్చర్యపోయారు. జేక్స్ బిజోయ్ అందించిన బ్యాక్‌గ్రౌండ్ మ్యూజిక్ అందరినీ ఆకట్టుకుంది. ఈ సీజన్ సూపర్ ఎంటర్‌టైన్‌మెంట్‌తో కూడుకున్న సర్‌ప్రైజ్‌లతో నిండుగా ఉండబోతుందని ప్రోమో ప్రాముఖ్యతను చాటిచెప్పింది.
అనంతరం మీడియాతో మాట్లాడిన బాలకృష్ణ "చాలా మంది నాకు షోలకు హోస్ట్ చేయమని అడిగారు, కానీ నేను ఒప్పుకోలేదు. ఈ షోను చేయడానికి ముఖ్య కారణం, అల్లు అరవింద్ గారు. ఆయన అడిగారు కనుకనే ఒప్పుకున్నాను. 'అన్‌స్టాపబుల్ విత్ ఎన్బీకే' విజయానికి మొత్తం టీమ్ కృషే కారణం. ఈ సీజన్ కూడా చాలా ఆసక్తికరంగా ఉంటుందని నమ్ముతున్నాను. ఇది ఐఎండీబీలో ప్రపంచంలో 18వ ర్యాంక్ సాధించడం గొప్ప విషయం. మూడు సీజన్లు విజయవంతంగా నడిచాయి, నాలుగవ సీజన్ మరింత రసవత్తరంగా ఉండనుంది" అని తెలిపారు.
దర్శకుడు అనిల్ రావిపూడి మాట్లాడుతూ, "సాధారణంగా షోలు ప్రసారమయ్యాక పాపులారిటీ సాధిస్తాయి, కానీ బాలయ్య గారి ప్రోమోలు మాత్రమే బ్లాక్ బస్టర్ అవుతాయి. ఈసారి యానిమేటెడ్ ప్రోమోతోనే గూస్ బంప్స్ రానిచ్చిన బాలయ్య గారు సీజన్ 4 లో కూడా ఎంటర్‌టైన్ చేయడానికి రెడీగా ఉన్నారు" అని వ్యాఖ్యానించారు.
అల్లు అరవింద్ మాట్లాడుతూ, "ఈ షోను ప్రారంభించిన నాటి నుండి ఇది దేశంలోనే ఒక అతిపెద్ద టాక్ షోగా మారింది. ఇప్పటి వరకు పలు ముఖ్యమైన అతిధులు వచ్చారు. ఈ సీజన్ మరింత ప్రత్యేకంగా ఉండబోతుంది" అని అన్నారు. కార్యక్రమం చివరగా ఆహా టీమ్‌కు, ప్రేక్షకులకు ధన్యవాదాలు తెలియజేసి ముగించారు. "అన్‌స్టాపబుల్ విత్ NBK" సీజన్ 4 త్వరలో ప్రేక్షకుల ముందుకు రానుంది.