'భైరవం'.. యాక్షన్-ప్యాక్డ్ అవతార్‌లో నారా రోహిత్!

బెల్లంకొండ సాయి శ్రీనివాస్, మనోజ్ మంచు, నారా రోహిత్ హీరోలుగా నటిస్తున్న తాజా చిత్రం ''భైరవం''. విజయ్ కనకమేడల దర్శకత్వంలో ఈ సినిమా తెరకెక్కుతోంది. ఇటీవలే ఈ చిత్రాన్ని అధికారికంగా ప్రకటించిన మేకర్స్.. బెల్లంకొండ శ్రీనివాస్ ఫస్ట్ లుక్ పోస్టర్ ను రిలీజ్ చేసారు. దీనికి ఆడియన్స్ నుంచి మంచి రెస్పాన్స్ వచ్చింది. ఈ క్రమంలో మరో హీరో నారా రోహిత్ ఫస్ట్ లుక్‌ ను తాజాగా రివీల్ చేశారు.

'భైరవం' నుంచి సాయి శ్రీనివాస్ ను రస్టిక్ లుక్ లో చూపించిన చిత్ర బృందం.. ఇప్పుడు నారా రోహిత్ ను ఫెరోషియస్ లుక్‌లో ప్రెజెంట్ చేసారు. టెంపుల్ బ్యాక్ డ్రాప్ లో యాక్షన్-ప్యాక్డ్ అవతార్‌లో కనిపించి రోహిత్ సర్ప్రైజ్ చేసాడు. ఒకరిని కత్తితో పొడుస్తూ, మరొక చేతిలో ఆయుధం పట్టుకొని.. అగ్ని జ్వాలల మధ్య ఇంటెన్స్ గా చూస్తూ నిలబడి ఉన్నాడు. సినిమాలో రోహిత్ పాత్ర ఎంత ఇంటెన్స్‌గా ఉండబోతుందో ఈ ఫస్ట్ లుక్ పోస్టర్ ని బట్టి అర్థమవుతోంది.

వైవిధ్యమైన కంటెంట్ ఓరియెంటెడ్ సినిమాలతో నారా రోహిత్ మంచి పేరు తెచ్చుకున్నారు. కాస్త గ్యాప్ తీసుకొని ఈ ఏడాది ప్రారంభంలో 'ప్రతినిధి 2' చిత్రంతో అలరించారు. ఇప్పుడు బ్యాక్ టూ బ్యాక్ సినిమాలతో ప్రేక్షకుల ముందుకు రాబోతున్నారు. ఇప్పటికే ఆయన హీరోగా 'సుందరకాండ' మూవీ రిలీజ్ కు రెడీ అయింది. ఇదే క్రమంలో 'భైరవం' సినిమా వస్తోంది. ఇందులో వరదా అనే పాత్రలో రోహిత్ కనిపించనున్నారు.

నియో-నోయిర్ యాక్షన్ డ్రామాగా ''భైరవం'' సినిమా రూపొందుతోంది. బెల్లంకొండ సాయి శ్రీనివాస్, నారా రోహిత్ ల ఫస్ట్ లుక్ పోస్టర్స్ ని బట్టి చూస్తే.. సినిమాలో జాతర నేపథ్యంలో చిత్రీకరించిన యాక్షన్ సీక్వెన్స్ కు సంబంధించిన స్టిల్స్ అని తెలుస్తోంది. ఈ యాక్షన్ పార్ట్ సినిమాలో మెయిన్ హైలైట్‌గా నిలుస్తుందని చిత్ర వర్గాలు వెల్లడించాయి. త్వరలోనే మనోజ్ మంచు ఫస్ట్ లుక్ ను కూడా రివీల్ చేయనున్నట్లు తెలిపారు.

'భైరవం' చిత్రాన్ని శ్రీ సత్యసాయి ఆర్ట్స్‌ పతాకంపై కెకె రాధామోహన్‌ భారీ బడ్జెట్ తో ప్రతిష్టాత్మకంగా నిర్మిస్తున్నారు. పెన్ స్టూడియోస్‌ అధినేత జయంతిలాల్ గడా ఈ సినిమాని సమర్పిస్తున్నారు. స్టార్ కాస్టింగ్, టాప్ టెక్నిషియన్స్ ఈ చిత్రంలో భాగం అవుతున్నారు. శ్రీ చరణ్ పాకాల సంగీతం సమకూరుస్తుండగా.. సత్యర్షి, తూమ్ వెంకట్ ఈ సినిమాలో డైలాగ్స్ రాస్తున్నారు. హరి కె వేదాంతం సినిమాటోగ్రఫీ నిర్వహిస్తున్నారు. ఛోటా కె ప్రసాద్ ఎడిటర్ గా.. బ్రహ్మ కడలి ప్రొడక్షన్ డిజైనర్ గా వర్క్ చేస్తున్నారు.

నేషనల్ అవార్డ్ విన్నింగ్ డైరెక్టర్ వెట్రిమారన్ నిర్మించిన 'గరుడన్' అనే తమిళ చిత్రానికి రీమేక్ గా 'భైరవం' తెరకెక్కుతోందని టాక్. తమిళంలో మంచి విజయం సాధించిన ఈ సినిమాని, దర్శకుడు విజ‌య్ కనకమేడల తెలుగు నేటివిటీకి తగ్గట్టుగా మార్పులు చేర్పులు చేసినట్లు తెలుస్తోంది. తెలుగులో ఎన్నో ఏళ్ళ తర్వాత ముగ్గురు హీరోలు కలిసి నటిస్తున్న యాక్షన్-ప్యాక్డ్ థ్రిల్లర్ ఇది. మరి మంచు మనోజ్ ఫస్ట్ లుక్ ఎలా ఉంటుందో? ఈ చిత్రం నుంచి రానున్న రోజుల్లో ఎలాంటి కంటెంట్ ను బయటకు వదులుతారో వేచి చూడాలి.