బాలయ్యతో సినిమా.. బాబీ బలమైన సెంటిమెంట్

ఆరు పదుల వయసులోనూ వరుస సినిమాలతో దూసుకెళ్తున్నారు నటసింహం నందమూరి బాలకృష్ణ. వరుసగా హిట్లు మీద హిట్లు కొడుతూ యంగ్ హీరోలకు గట్టి పోటీ ఇస్తున్నారు. ఇటీవలే భగవంత్ కేసరి సినిమాతో హ్యాట్రిక్ సాధించారు. ప్రస్తుతం తన 109వ సినిమా బాబీతో తీస్తున్నారు.

ఈఏడాది వాల్తేరు వీరయ్యతో హిట్ కొట్టిన బాబీతో బాలయ్య చేతులు కలిపారు. చాలా రోజుల క్రితమే ఈ మూవీ పూజా కార్యక్రమాలు జరిగాయి. గతనెలలో రెగ్యులర్ షూటింగ్ కూడా మొదలైంది. అయితే తొలిసారి బాలయ్యతో సినిమా తెరకెక్కిస్తున్నారు బాబీ.

తాజాగా ఈ చిత్రంలో స్పెషల్ సాంగ్ ఉందని ప్రచారం జరుగుతోంది. ఆ పాటలో బాలయ్యతో మిల్కీ బ్యూటీ తమన్నా చిందులేయనున్నట్లు కూడా వార్తలు వచ్చాయి. ఇది నిజమేనని.. బాలకృష్ణ సినిమాలో కూడా బాబీ తన సెంటిమెంట్ ను రిపీట్ చేస్తున్నారని సినీ ప్రియులు చెబుతున్నారు.

ఇండస్ట్రీలోని స్టార్ హీరోలతో తీసిన ప్రతీ సినిమాలో బాబీ ఐటమ్ సాంగ్ ను ప్లాన్ చేశారు. ఈఏడాది సంక్రాంతికి వచ్చిన వాల్తేరు వీరయ్యలో కూడా రత్తాలు సాంగ్ కు బాలీవుడ్ బ్యూటీ ఊర్వశి రౌతేలాతో చిందులేయించారు. అంతకుముందు సర్దార్ గబ్బర్ సింగ్, గబ్బర్ సింగ్ లో స్పెషల్ సాంగ్ ప్లాన్ చేశారు. ఎన్టీఆర్ జై లవకుశలో కూడా తమన్నాతో ఐటమ్ సాంగ్ తెరకెక్కించారు. ఇప్పుడు అదే తమన్నాతో బాలయ్య 109 సినిమాలో స్పెషల్ సాంగ్ చేయించున్నారట బాబీ.

షూటింగ్ విషయానికొస్తే.. ఇప్పటికే రెండు షెడ్యూళ్లను పూర్తి చేసుకుంది ఈ మూవీ. ఫస్ట్ షెడ్యూల్ హైదరాబాద్ లో, రెండోది ఊటీలో చిత్రీకరించారు. మూడో షెడ్యూల్ కోసం చిత్రబృందం రాజస్థాన్ చేరుకుంది. 1980 దశకం నాటి కథతో ఈ సినిమా రూపొందుతోంది. న్యూఇయర్ సందర్భంగా ఈ సినిమా నుంచి అప్డేట్ వచ్చే అవకాశం ఉంది.

డిఫరెంట్ కాన్సెప్టుతో రాబోతున్న ఈ సినిమాను సితార ఎంటర్‌టైన్‌మెంట్స్, ఫార్చన్ ఫోర్ సినిమాస్, శ్రీకర స్టూడియోస్ బ్యానర్లపై సాయి సౌజన్య, నాగ వంశీ సంయుక్తంగా నిర్మిస్తున్నారు. వచ్చే ఏడాది ఏప్రిల్ కల్లా షూటింగ్ పూర్తి చేసి మే నెలలో వేసవి కానుకగా ఈ సినిమాను విడుదల చేయాలని మేకర్స్ ప్లాన్ చేస్తున్నారు. ఈ చిత్రంలో బాలయ్య సరసన త్రిష నటించనున్నట్లు సమాచారం.