ఆ హీరోలో కామెడీని కమ్ములా ట‌చ్ చేస్తున్నాడా?

కోలీవుడ్ స్టార్ ధ‌నుష్ క‌థానాయ‌కుడిగా శేఖ‌ర్ క‌మ్ములా ద‌ర్శ‌క‌త్వంలో 'కుబేర' చిత్రం తెర‌కెక్కుతోన్న సంగ‌తి తెలిసిందే. కింగ్ నాగార్జున కీల‌క పాత్ర పోషిస్తున్నారు. ఈడీ ఆఫీస‌ర్ పాత్ర‌లో నాగ్ క‌నిపించ నున్నార‌ని ప్ర‌చారం సాగుతుంది. ఇప్ప‌టికే ఈ సినిమా షూటింగ్ కొన్ని షెడ్యూళ్ల‌ను పూర్తి చేసుకుంది. చెన్నై..హైద‌రాబాద్..బ్యాకాక్..గోవా లో కీల‌క షెడ్యూల్స్ పూర్తి చేసారు. అవ‌స‌రం మేర ప్ర‌త్యేక‌మైన సెట్లు నిర్మించి షూటింగ్ నిర్వ‌హించారు.

బ్యాంకాక్ షెడ్యూల్ లో భాగంగా రోడ్ల‌పై భారీ ఛేజింగ్ స‌న్నివేశాల‌ని చిత్రీక‌రించారు. మాఫియా బ్యాక్ డ్రాప్ స్టోరీ కావ‌డంతో అక్క‌డి లోకేషన్లు డిమాండ్ చేయ‌డంతో క‌మ్ములా అక్క‌డే ప్లాన్ చేసి షూట్ పూర్తి చేసారు. వాటిలో నాగార్జున పాత్ర హైలైట్ అవుతుంద‌ని చిత్ర వ‌ర్గాల నుంచి లీకులందాయి. అయితే ఇందులో ధ‌నుష్ కనిపిస్తాడా? లేదా? అన్న దానిపై మాత్రం స‌స్పెన్స్ కొన‌సాగుతోంది. ఈ నేప‌థ్యంలో తాజాగా షూటింగ్ విదేశాల నుంచి హైద‌రాబాద్ కి చేరుకున్నట్లు తెలుస్తోంది.

ప్ర‌స్తుతం రామోజీఫిలిం సిటీలో షూటింగ్ జ‌రుగుతోంది. గుడి నేప‌థ్యంలో సాగే స‌న్నివేశాల‌తో పాటు, మ‌రిన్ని ప్ర‌త్యేక స‌న్నివేశాల్ని ధ‌నుష్ పై చిత్రీక‌రిస్తున్నారు. ఇవి సినిమాలో ఎంతో ఇంట్రెస్టింగ్ గా ఉంటాయ‌ని చిత్ర వ‌ర్గాలు అంటున్నాయి. వీటిలో ధ‌నుష్ పెర్పార్మెన్స్ కాస్త కామెడీగానూ హైలైట్ చేస్తున్నారుట‌. మొత్తానికి మాఫియా స్టోరీలో క‌మ్ములా కాస్త కామెడీని కూడా ట‌చ్ చేస్తున్న‌ట్లు క‌నిపిస్తుంది. అయితే ఇందులో హీరోయిన్ గా నటిస్తోన్న ర‌ష్మిక జాయిన్ అయిందా? లేదా? అన్న‌ది మాత్రం ఇంకా క్లారిటీ దొర‌క‌లేదు

ఇక ఈ సినిమాపై అంచ‌నాలు భారీగా ఏర్ప‌డుతున్న సంగతి తెలిసిందే. శేఖ‌ర్ క‌మ్ములా తొలి పాన్ ఇండియా ప్రాజెక్ట్ ఇదే కావ‌డంతో ఎంతో ప్ర‌తిష్టాత్మ‌కంగా తెర‌కెక్కిస్తున్నారు. శేఖ‌ర్ క‌మ్ములా యాక్ష‌న్ శైలి ఎలా ఉంటుంది? అన్న‌ది ఈ సినిమాతో ప‌రిచ‌యం కానుంది. ఈ చిత్రాన్ని సునీల్ నారంగ్-పుస్కూరు రామ్మోహ‌న్ సంయుక్తంగా నిర్మిస్తున్నారు. దేవి శ్రీ ప్ర‌సాద్ సంగీతం అందిస్తున్నారు.