మహేష్ డైరెక్షన్ లో మల్టీస్టారర్.. బాలయ్య నో చెప్పడంతో..

ఏంటి టైటిల్ చూసి మహేష్ బాబు ఎప్పుడు డైరెక్టర్ గా మారారు అనుకుంటున్నారా? హీరో మహేష్ బాబు కాదు.. అది.. డైరెక్టర్ మహేష్ బాబు. నవీన్ పోలిశెట్టి, అనుష్క కాంబోలో వచ్చిన మిస్ శెట్టి మిస్టర్ పోలిశెట్టి మూవీని ఆయనే తెరకెక్కించారు. ఆ సినిమాతో కడుపుబ్బా నవ్వించిన ఆయన.. ఇప్పుడు భారీ మల్టీస్టారర్ తీయనున్నారట. టాలీవుడ్ ఎనర్జిటిక్ స్టార్ రామ్ పోతినేని, కోలీవుడ్ సూపర్ స్టార్ రజినీకాంత్ తో కలిసి వర్క్ చేయనున్నారని తెలుస్తోంది. ఆ వివరాలు...

యంగ్ రామ్ పోతినేని ఇటీవల డబుల్ ఇస్మార్ట్ మూవీతో ప్రేక్షకుల ముందుకు వచ్చిన విషయం తెలిసిందే. డాషింగ్ డైరెక్టర్ పూరి జగన్నాథ్ తెరకెక్కించిన ఆ మూవీ.. ఇండిపెండెన్స్ డే కానుకగా ఆగస్టు 15వ తేదీన థియేటర్లలో రిలీజ్ అయింది. భారీ అంచనాల మధ్య విడుదల అయినా.. వాటిని అందుకోవడంలో ఫెయిల్ అయింది. దీంతో ఇప్పుడు భారీ సక్సెస్ కోసం ఆయన చూస్తున్నారు.

అందులో భాగంగా త్రివిక్రమ్ లేదా హరీష్ శంకర్ తో నెక్స్ట్ సినిమా చేస్తారని జోరుగా ప్రచారం సాగింది.

ఇప్పుడు మహేష్ బాబు పి డైరెక్షన్ లో భారీ మల్టీస్టారర్ లో రామ్ నటించనున్నట్లు వార్తలు వస్తున్నాయి. ఇప్పటికే దర్శకుడు స్క్రిప్ట్ రెడీ చేసేశారని తెలుస్తోంది. రామ్ కు వినిపించగా ఆయన కూడా ఓకే చెప్పారని టాక్ వినిపిస్తోంది. అయితే ఈ సినిమాలో మరో కీలక పాత్ర కోసం డైరెక్టర్.. సీనియర్ హీరో నందమూరి బాలకృష్ణను రీసెంట్ గా సంప్రదించారట. కానీ తన చేతిలో పలు ప్రాజెక్టులు ఉండడంతో.. బాలయ్య గ్రీన్ సిగ్నల్ ఇవ్వలేదని టాలీవుడ్ వర్గాల్లో ఊహాగానాలు వినిపిస్తున్నాయి.

దీంతో రజనీని మహేష్ బాబు.. అప్రోచ్ అవ్వగా ఆయన కథ విని, నచ్చి ఓకే చెప్పేశారట. త్వరలోనే మూవీని మేకర్స్ అఫీషియల్ గా అనౌన్స్ చేయనున్నారని తెలుస్తోంది. అప్పటి నుంచే రెగ్యులర్ షూటింగ్ నూ స్టార్ట్ చేయనున్నారని వినికిడి. సప్త సాగరాలు ఫేమ్ రుక్మిణీ వసంత్ ను హీరోయిన్ గా ఫిక్స్ చేయనున్నారని టాక్ వినిపిస్తోంది. భారీ బడ్జెట్ తో బడా ప్రొడక్షన్ హౌస్ మైత్రీ మూవీ మేకర్స్ నిర్మించనుందని సమాచారం. ఇప్పటికే అన్ని పనులు మొదలు పెట్టిందని తెలుస్తోంది.

రామ్, రజనీ మల్టీస్టారర్ ను కామెడీ అండ్ ఎమోషనల్ జోనర్ లో మహేష్ బాబు తెరకెక్కించనున్నట్లు వార్తలు వినిపిస్తున్నాయి. పాన్ ఇండియా రేంజ్ లో రూపొందనున్న ఆ మూవీ.. వచ్చే ఏడాది ప్రేక్షకుల ముందుకు రానున్నట్లు తెలుస్తోంది. ప్రస్తుతం తన మూవీలతో బిజీగా ఉన్న రజనీ వాటిని త్వరగా పూర్తి చేసి డేట్స్ ఇవ్వనున్నారని కూడా సమాచారం. మరి రామ్- రజనీ- మహేష్ సినిమా ఎప్పుడు మొదలవుతుందో.. ఎలాంటి హిట్ అవుతుందో వేచి చూడాలి.