హనుమాన్ సినిమాకు అన్ని కష్టాలా.. డైరెక్టర్ రియాక్షన్!

టాలీవుడ్ యంగ్ టాలెంటెడ్ డైరెక్టర్ ప్రశాంత్ వర్మ సినిమాటిక్ యూనివర్స్ లో భాగంగా హనుమాన్ సినిమా వస్తున్న విషయం తెలిసిందే. సంక్రాంతి కానుకగా విడుదల కానున్న ఈ చిత్రం.. ప్రమోషనల్ కంటెంట్ తో సినీ ప్రియుల్లో భారీ హైప్ క్రియేట్ చేసింది. యువ కథానాయకుడు తేజ సజ్జ నటించిన ఈ మూవీ నుంచి విడుదలైన ట్రైలర్.. ఈ సినిమాపై మరింత క్యూరియాసిటీ పెంచేసింది.

అయితే సంక్రాంతి బరిలో దిగుతున్నట్లు హనుమాన్ మేకర్స్ ఎప్పుడో ప్రకటించేశారు. చెప్పాలంటే అన్ని సినిమాలకన్నా ఈ మూవీ రిలీజ్ డేట్ ను అనౌన్స్ చేశారు. జనవరి 12వ తేదీన ఎలా అయినా విడుదల చేస్తామని ఇప్పటికే అనేక సార్లు క్లారిటీ ఇచ్చారు. కానీ ఇటీవలే ఈ సినిమా రిలీజ్ ను వాయిదా వేసుకోవాలని ప్రముఖ నిర్మాత ల్ఒత్తిడి తెస్తున్నట్లు వార్తలు వచ్చాయి.

హనుమాన్ మేకర్స్ ను ఎలా అయినా ఒప్పించి రిలీజ్ ను పోస్ట్ పోన్ చేసేలా మిగతా సంక్రాంతి సినిమాల నిర్మాతలు కూడా ప్రయత్నిస్తున్నట్లు టాక్ వినిపించింది. కానీ పొంగల్ కు విడుదల కానున్న అన్ని సినిమాల కన్నా ముందే హనుమాన్ మూవీ సెన్సార్ కంప్లీట్ చేసుకుంది. ఈ నేపథ్యంలో డైరెక్టర్ ప్రశాంత్ వర్మ కీలక వ్యాఖ్యలు చేశారు.

తాను తెరకెక్కించిన హనుమాన్ రిలీజ్ ను వాయిదా వేయించడానికి అనేక ప్రయత్నాలు జరుగుతున్నాయని ప్రశాంత్ వర్మ చెప్పారు. అలా చేస్తుందన్నది ఎవరో తెలియదని , అసలు అలా ఎందుకు చేస్తున్నారో అస్సలు తెలియదని చెప్పారు. సెన్సార్ సమయంలో కూడా అనేక ప్లాన్లు గీశారని కానీ దేవుడి దయ వల్ల అంతా మంచిగా జరిగిందని తెలిపారు. ప్రమోషన్స్ కు ప్రభాస్ ను తీసుకొచ్చేందుకు ట్రై చేస్తున్నట్లు వెల్లడించారు.

మరోవైపు, ఇంకో ఇంటర్వ్యూలో ఆసక్తికర కామెంట్లు చేశారు ప్రశాంత్ వర్మ. తామే ముందు సంక్రాంతి పోటీలోకి వచ్చామని, తర్వాత మిగతా వారు వచ్చారని వెల్లడించారు. 'ఓ కుర్రాడు సైకిల్ మీద ఫుల్ బిజీగా ఉన్న రోడ్డులోకి వచ్చాడు.. అప్పుడు అక్కడికి కార్లు, బస్సులు వచ్చాయి. మరి కుర్రాడు తప్పుకుంటాడా ఉంటాడా' అని జర్నలిస్ట్ ప్రశ్నించారు. తానైతే మాత్రం రోడ్డుపైనే ఉంటానని, కారు కన్నా సైకిల్ పవర్ ఎక్కువ అవ్వొచ్చుగా అని సమాధానమిచ్చారు. సైకిల్ తో గుద్దితే కారు కూడా ధ్వంసమవ్వవచ్చని తెలిపారు.

ఈ సినిమాలో అమృత అయ్యర్ హీరోయిన్ గా నటిస్తుండగా.. వ‌ర‌ల‌క్ష్మి శ‌ర‌త్‌కుమార్ కీల‌క పాత్ర పోషిస్తోంది. వాన ఫేమ్ విన‌య్ రాయ్ విల‌న్‌గా న‌టిస్తున్నారు. సంక్రాంతి కానుకగా జనవరి 12వ తేదీన రిలీజ్ కానుంది. శ్రీలంక, చైనా, జపాన్, ఆస్ట్రేలియా, అమెరికా, స్పెయిన్, జర్మనీ.. ఇలా అనేక కంట్రీస్ లో మొత్తం 11 భాషల్లో విడుదల కానుంది.