ఈమధ్య కాలంలో ఇలాంటి సినిమా చూసి ఉండరు!

తమిళ్‌ స్టార్‌ హీరో సూర్య నటించిన 'కంగువా' ఈవారం ప్రేక్షకుల ముందుకు రాబోతుంది. నవంబర్‌ 14న విడుదల కాబోతున్న కంగువా సినిమా కోసం గత నెల రోజులుగా హీరో సూర్య పాన్‌ ఇండియా రేంజ్‌లో ప్రమోషన్‌ చేస్తూ వచ్చారు. తమిళనాడుతో పాటు సౌత్‌లోని అన్ని భాషల్లో, హిందీ లోనూ సినిమాను ప్రమోట్‌ చేయడం కోసం పదుల కొద్ది ఇంటర్వ్యూలు ఇవ్వడంతో పాటు, ఎన్నో షోల్లో పాల్గొన్నారు. ముఖ్యంగా హిందీ ప్రేక్షకుల ముందుకు కంగువాను తీసుకు వెళ్లడం కోసం సూర్య కాస్త ఎక్కువగానే కష్టపడ్డాడు అనడంలో సందేహం లేదు. తాజాగా హీరోయిన్‌ దిశా పటానీతో కలిసి ఒక చిట్‌ చాట్‌లో పాల్గొన్నాడు.

బాలీవుడ్‌ హీరోయిన్‌ దిశా పటానీ తెలుగులో వచ్చిన 'కల్కి 2898 ఏడీ' సినిమాలో ముఖ్య పాత్రలో నటించింది. కానీ ఆ సినిమా ప్రమోషన్‌లో దిశా కనిపించలేదు. కానీ కంగువా సినిమా ప్రమోషన్‌లో భాగంగా దిశా పటానీ ఎక్కువగా కనిపిస్తూ వచ్చింది. ఇటీవల ఆమె సూర్యతో కలిసి పలు మీడియా సమావేశాలకు హాజరు అయింది. అంతే కాకుండా ఆమె సినిమా గురించి చేసిన వ్యాఖ్యలు అంచనాలు పెంచే విధంగా ఉన్నాయి. తాజా చిట్ చాట్‌లో దిశా పటానీ మాట్లాడుతూ.. సినిమా ఒక అద్భుతమైన ఎక్స్‌పీరియన్స్‌. డిఫరెంట్‌ ప్రపంచంలోకి తీసుకు వెళ్తుంది. అన్ని రకాల ఎమోషన్స్‌ను ఈ సినిమాలో చూడవచ్చు అని చెప్పుకొచ్చింది.

అదే చిట్‌ చాట్‌లో హీరో సూర్య మాట్లాడుతూ... సినిమాలోని విజువల్స్‌, మ్యూజిక్‌ అద్భుతంగా సెట్‌ అయ్యాయి. ఈ మధ్య కాలంలో వచ్చిన ఏ సినిమాకు ఇంత అద్భుతమైన విజువల్స్‌, మ్యూజిక్‌ చూసి ఉండరు. సినిమాలో భాగం అయిన ప్రతి పాత్రకు ఉండే ఎమోషన్‌ని అద్భుతంగా చూపించడంలో దర్శకుడు శివ సక్సెస్ అయ్యారు. అన్ని భాషల ప్రేక్షకులకు ఈ సినిమా నచ్చుతుందనే నమ్మకం వ్యక్తం చేశాడు. దర్శకుడు శివ ఈ సినిమా కోసం ప్రత్యేక ప్రపంచంను క్రియేట్‌ చేసినట్లుగా పేర్కొన్నారు. రెండు విభిన్నమైన టైమ్‌ జోనర్‌ల మధ్య సాగే ఈ కథ ప్రేక్షకులను సర్‌ప్రైజ్‌ చేస్తుందని ఆయన పేర్కొన్నారు.

సినిమా ట్రైలర్‌ విడుదల అయినప్పటి నుంచి అంచనాలు భారీగా పెరిగాయి. నవంబర్‌ 14న విడుదల కాబోతున్న ఈ సినిమా నుంచి మరో ట్రైలర్‌ రాబోతుంది. వెయ్యి కోట్ల టార్గెట్‌ తో విడుదల కాబోతున్న కంగువా సినిమాకు ప్రీ రిలీజ్ బజ్‌ భారీగా క్రియేట్‌ చేయడంలో మేకర్స్ సఫలం అయ్యారు. మొదటి వెయ్యి కోట్ల హిందీ సినిమాగా కంగువా నిలువబోతుంది అంటూ నిర్మాత జ్ఞానవేల్‌ రాజా పేర్కొన్నారు. సినిమాకు ఉన్న ఇబ్బందులు అన్ని తొలగి పోయాయి, సెన్సార్‌ సైతం పూర్తి అయింది. దాంతో ఇప్పటికే విదేశాల్లో అడ్వాన్స్ బుకింగ్‌ షురూ అయింది. సినిమా మొదటి రోజు సాధించే వసూళ్లపై అందరి దృష్టి ఉంది. మరో రెండు రోజుల్లో రాబోతున్న ఈ సినిమా పై సూర్య ఇంకా యూనిట్ సభ్యులు చాలా నమ్మకం పెట్టుకున్నారు. మరి వారి నమ్మకం నిలిచి హిట్ కొట్టేనా చూడాలి.