డాన్ 3... తప్పుడు ఎంపిక!

బాలీవుడ్ బాద్ షా షారుఖ్‌ ఖాన్‌ ను 2006 సంవత్సరంలో డాన్‌ గా చూపిస్తూ ఫర్హాన్ అక్తర్ హిందీ ప్రేక్షకుల ముందుకు వచ్చాడు. ఆ సినిమా మంచి విజయాన్ని సొంతం చేసుకుంది. గతంలో అమితాబచ్చన్‌ చేసిన డాన్‌ సినిమా కి ఏమాత్రం తీసి పోకుండా షారుఖ్‌ ఖాన్ డాన్‌ సినిమా ఉందంటూ విమర్శకుల ప్రశంసలు కూడా దక్కాయి. దాంతో సీక్వెల్‌ కు రెడీ అయ్యారు.

2011 లో అదే షారుఖ్ ఖాన్‌ తో ఫర్హాన్ అక్తర్ 'డాన్‌ 2' సినిమాను రూపొందించాడు. రెండు డాన్‌ సినిమాలు కూడా భారీ విజయాన్ని సొంతం చేసుకున్న నేపథ్యంలో గత రెండు మూడు సంవత్సరాలుగా డాన్‌ 3 సినిమా కోసం దర్శకుడు ఫర్హాన్ అక్తర్‌ తీవ్రంగా ప్రయత్నాలు చేస్తూ ఉన్నాడు.

గత కొంత కాలంగా షారుఖ్ ఖాన్ ను డాన్‌ 3 కోసం ఒప్పించేందుకు ప్రయత్నాలు చేసిన దర్శకుడు తాజాగా తన ప్రయత్నాలు విరమించుకుని రణ్వీర్‌ సింగ్‌ తో వెళ్లాలని నిర్ణయించుకున్నట్లుగా తెలుస్తుంది. డాన్‌ 3 సినిమాను రణ్వీర్ సింగ్ తో చేయబోతున్నట్లుగా అధికారికంగా కూడా ప్రకటన రావడం తో సోషల్ మీడియాలో ఎవరికి తోచిన విధంగా వారు మాట్లాడుతున్నారు.

డాన్‌ సినిమాకు రణ్వీర్ సింగ్‌ ఎంపిక సరైనది కాదని కొందరు అభిప్రాయం వ్యక్తం చేస్తూ ఉంటే మరి కొందరు మాత్రం షారుఖ్ ఖాన్‌ ను మరిపించే సత్తా రణ్వీర్ సింగ్ కు లేదని కొందరు అభిప్రాయం వ్యక్తం చేస్తున్నారు. షారుఖ్ ఖాన్‌ చేసిన డాన్‌ పాత్రను తాను ఎలా చేయగలను అని రణ్వీర్‌ ఆలోచించుకోలేదా అంటూ కొందరు ఘాటుగానే విమర్శిస్తున్నారు.

మొత్తానికి డాన్‌ 3 ప్రకటన రావడమే ఆలస్యం సోషల్ మీడియాలో ట్రోల్స్ మొదలు అయ్యాయి. బాద్‌ షా ఒప్పుకునే వరకు దర్శకుడు ఫర్హాన్ అక్తర్ వెయిట్‌ చేస్తే బాగుండేది అనేది కొందరి అభిప్రాయం. రణ్వీర్ సింగ్ అభిమానులు మాత్రం డాన్ 3 కి ఫర్హాన్ అక్తర్‌ సరైన ఎంపిక చేసుకున్నాడు అని సినిమా విడుదల తర్వాత అంతా అనుకుంటారనే నమ్మకం వ్యక్తం చేస్తున్నారు. అన్ని అనుకున్నట్లుగా సజావుగా సాగితే 2025 లో డాన్ 3 పాన్ ఇండియా రేంజ్ లో భారీ ఎత్తున ప్రేక్షకుల ముందుకు వచ్చే అవకాశాలు ఉన్నాయి.