కరణ్ జోహార్ పార్టీలను ముందే విడిచిపెట్టలేరు..!

బాలీవుడ్ లో పార్టీ క‌ల్చ‌ర్ గురించి ఇప్పుడే చెప్పాల్సిన ప‌ని లేదు. క‌ర‌ణ్ జోహార్ ఇందుకు ఆద్యుడు అని చెబుతుంటారు. నైట్ పార్టీ క‌ల్చ‌ర్ తో ద‌ర్శ‌క‌నిర్మాత క‌ర‌ణ్ ఇండ‌స్ట్రీని చెడ‌గొట్టాడ‌ని కూడా కంగ‌న లాంటి స్టార్ ఆరోపించ‌డం హాట్ టాపిక్ అయింది. ఇక క‌ర‌ణ్ జోహార్ పార్టీల్లో డ్ర‌గ్స్ వినియోగం గురించి ఇంత‌కుముందు ఎన్.సి.బి విచారించిన సంగ‌తి తెలిసిందే. అయితే ఈ విచార‌ణ‌లో క‌ర‌ణ్ త‌ప్పిదం దొర‌క‌క‌పోవ‌డంతో బ‌య‌ట‌ప‌డ్డాడు.

అదంతా అటుంచితే క‌ర‌ణ్ జోహార్ కి అత్యంత స‌న్నిహితురాలైన ప్ర‌ముఖ కొరియోగ్రాఫ‌ర్ కం డైరెక్ట‌ర్ ఫ‌రాఖాన్ చేసిన ఒక కామెంట్ హాట్ టాపిక్ గా మారింది. తన పోడ్‌కాస్ట్‌లో మనీష్ పాల్‌తో సంభాషణ సందర్భంగా.. క‌రణ్ జోహార్ పార్టీలను ఎందుకు ముందుగానే విడిచి వెళ్ల‌కూడ‌దో ఫ‌రా వెల్లడించారు. అలా చేస్తే `అందరూ బిట్* హింగ్‌ను ప్రారంభిస్తారు` అని వ్యాఖ్యానించారు.

ఫరా ఖాన్ ఓ సరదా సంభాషణలో బాలీవుడ్ పార్టీల గురించి, ముఖ్యంగా అగ్ర‌నిర్మాత కరణ్ జోహార్ నిర్వహించే పార్టీల గురించి మాట్లాడారు. KJo పార్టీలను విడిచిపెట్టే చివరి వ్యక్తిగా ఎల్లప్పుడూ ఫ‌రా ఉంటారని మనీష్ ఈ చాటింగ్ సెష‌న్ లో చెప్పారు. దీని వెనుక రహస్యాన్ని వెల్లడిస్తూ ఫ‌రా ఆస‌క్తిక‌ర వ్యాఖ్య‌ను చేశారు.``ఇది నేను కాలక్రమేణా నేర్చుకున్నాను. ఆరంభంలో నేను పార్టీల నుంచి మొదటగా వెళ్లిపోయేదానిని. కానీ త‌ర్వాత‌ తెలుసుకున్నాను. ప్రతి ఒక్కరూ మొదట వెళ్లిపోయిన వారిపై కామెంట్ల‌తో విరుచుకుపడతారు...`` అని తెలిపింది.

తాను విస్తుపోయేలా చేసిన ఒక సంఘటన గురించి ఫరా ఈ సంద‌ర్భంగా వెల్ల‌డించింది. ఓసారి తాను పార్టీ నుంచి చాలా ముందే వెళ్లిపోయాన‌ని .. కానీ త‌న‌పై ఏం ఠాంఠాం వేస్తున్నారో తెలుసుకునేందుకు తిరిగి వెన‌క్కి వ‌చ్చాన‌ని కూడా ఫ‌రా తెలిపారు. తాను పార్టీ వెన్యూ వ‌ద్ద‌ వెనుక తలుపు నుండి రహస్యంగా ప్రవేశించాన‌ని, అయితే ఆశ్చర్యకరంగా ఎవరూ త‌న‌ గురించి చెడుగా మాట్లాడలేదని ఫ‌రా తెలిపింది. నేను వెనుక తలుపు నుండి బాల్కనీకి వ‌చ్చి వింటున్నాను.. కానీ దురదృష్టవశాత్తు ఎవ‌రూ నా గురించి మాట్లాడటం లేదు. కాబట్టి నేను కరణ్‌తో వెంట‌నే చెప్పాను.. నేను పార్టీ నుంచి వెళ్లిపోగానే మీరు ప్రారంభిస్తారు... నేనేమిటో బ్లా బ్లా బ్లా అన్నీ..! అని అడిగాను. అలా ఎందుకు అడిగానంటే మందు పార్టీలో కరణ్ వేచి ఉండడు. అందరి గురించి అన్ని విష‌యాలు అంద‌రికీ చెప్పేస్తాడు అంటూ స‌ర‌దాగా న‌వ్వేశారు ఫ‌రా.

ఫ‌రా కెరీర్ మ్యాట‌ర్ కి వ‌స్తే.. మై హూ నా, ఓం శాంతి ఓం, జోకర్, హ్యాపీ న్యూ ఇయర్ స‌హా మరెన్నో సినిమాల్లో ఫరా అతిధి పాత్రలు పోషించారు. ప‌లు రియాలిటీ షోల‌కు న్యాయనిర్ణేతలలో ఒకరిగా అనేక టీవీ షోలలో అల‌రిస్తున్నారు. ఇటీవల షారుఖ్ ఖాన్ యాక్షన్-థ్రిల్లర్ జవాన్ లోని `చలేయా..` పాటకు ఫ‌రా కొరియోగ్రఫీ చేసారు.