హనుమాన్ ట్రైలర్.. విజువల్ ట్రీట్ ఇచ్చేలా..

టాలీవుడ్ యంగ్ హీరో తేజ సజ్జ, టాలెంటెడ్ డైరెక్టర్ ప్రశాంత్ వర్మ కాంబినేషన్ లో తెరకెక్కుతున్న సూపర్ హీరో మూవీ హనుమాన్. అప్పుడెప్పుడో ఈ మూవీ నుంచి ఒక చిన్న టీజర్ రిలీజ్ అయ్యి సినిమా పై భారీ అంచనాలు క్రియేట్ చేయడంతో చిత్ర యూనిట్ చాలా జాగ్రత్తపడుతూ, కొంత ఎక్కువ సమయమే తీసుకుంటూ సినిమాను తెరకెక్కిస్తోంది. గ్రాఫిక్స్ క్వాలిటీ విషయంలో ఎక్కడ మాట రాకూడదని మూవీ టీమ్ పని చేస్తోంది.

అయితే ఈ సినిమాను 2024 సంక్రాంతికి తీసుకువస్తున్నామంటూ మేకర్స్ ఇటీవలే మరోసారి క్లారిటీ ఇచ్చారు. యువ హీరో ఈసారి అద్భుతం చేయబోతున్నాడని సనీ పండితులు కూడా అంచనా వేస్తున్నారు. చిత్రబృందం నెల రోజుల క్రితమే ప్రమోషన్స్ మొదలు పెట్టేసింది.

నవంబర్ 14వ తేదీన చిల్డ్రన్స్ డే సందర్భంగా మేకర్స్ సర్ ప్రైజ్ ఇచ్చారు. మూవీ నుంచి సూపర్ హీరో హను మాన్ అంటూ సాగే పాటను విడదుల చేశారు. ఆ సాంగ్ ఎంతో ఆకట్టుకుంది. ప్రస్తుతానికి మూవీ నుంచి ఇదే మొదటి పాట కావడం విశేషం. ఆ తర్వాత డిసెంబర్ 19న తేదీ ట్రైలర్ రిలీజ్ చేయనున్నట్లు మేకర్స్ ఇటీవలే ప్రకటించారు. దీంతో ఫ్యాన్స్ ఎంతగానో ఎదురుచూస్తున్నారు.

ఇప్పుడు హనుమాన్ ట్రైలర్ చూసిన సినీ వర్గాలు తెగ మాట్లాడేసుకుంటున్నారు. ట్రైలర్ అదిరిపోయిందని చెబుతున్నారు. ట్రైలర్ లో విజువల్స్ సూపర్ గా ఉన్నాయని అంటున్నారు. ప్రశాంత్ వర్మ విజువల్స్ ఇరగదీశారని చెబుతున్నారు. టీజర్ కంటే ట్రైలర్ డబుల్ ఇంపాక్ట్ క్రియేట్ చేయడం ఖాయమంటున్నారు. ఇదే నిజమైతే.. సంక్రాంతి రేసులో హనుమాన్ హవా మామూలుగా ఉండదన్నమాట.

ఇక సినిమా కథ విషయానికి వస్తే.. హనుమంతుడి వల్ల ఒక కుర్రాడికి సూపర్ పవర్స్ రావడం, ఆ తర్వాత జరిగిన సంఘటనలు, ఆ కుర్రాడు ఎదుర్కొన్న విషయాలు ఈ మూవీలో చూపించబోతున్నారు. ఈ సినిమాలో అమృత అయ్యర్ హీరోయిన్ గా నటిస్తుండగా వరలక్ష్మి శరత్ కుమార్, వినయ్ రాయ్, వెన్నల కిషోర్, సత్య, గెటప్ శ్రీను తదితరులు ముఖ్య పాత్రలు పోషిస్తున్నారు.

అనుదీప్ దేవ్, హరి గౌర, కృష్ణ సౌరభ్ ఈ మూవీకి సంగీతం అందిస్తున్నారు. ఇక ఈ చిత్రాన్ని భారతీయ భాషలతో పాటు శ్రీలంక, చైనా, జపాన్, ఆస్ట్రేలియా, అమెరికా, స్పెయిన్, జర్మనీ.. ఇలా వరల్డ్ వైడ్ గా మొత్తం 11 భాషల్లో జనవరి 12వ తేదీన రిలీజ్ చేయబోతున్నారు.