ప్రభాస్ - హోంబలే ఫిల్మ్స్.. సర్ ప్రైజ్ ఇచ్చారుగా

ఇండియన్ సినిమా చరిత్రలో మరో కీలక ఒప్పందం కుదిరింది. భారతీయ సినిమాను అంతర్జాతీయ స్థాయికి తీసుకెళ్లడంలో ముందున్న హోంబలే ఫిల్మ్స్, ఇండియన్ సూపర్ స్టార్ ప్రభాస్‌తో మూడు బిగ్ ప్రాజెక్టుల ఒప్పందాన్ని కుదుర్చుకుంది. ఈ ఒప్పందం పరిశ్రమలో ఎప్పుడూ చూడని రీతిలో హాట్ టాపిక్ గా మారింది. సలార్ 2 ఉండదనే ఊహాగానాలులకు ఎండ్ కార్డ్ పెట్టిన మేకర్స్ అఫీషియల్ గా క్లారిటీ ఇచ్చేశారు. సలార్ పార్ట్ 2 తో ప్రారంభమై, మరో రెండు భారీ ప్రాజెక్టులను వెంటవెంటనే పూర్తి చేసేలా ఈ ఒప్పందం కుదిరింది. దీనితో ప్రభాస్, హోంబలే ఫిల్మ్స్ ఇద్దరికీ ఒక కొత్త అధ్యాయం ప్రారంభమైందని చెప్పవచ్చు.

ప్రభాస్ ప్రస్తుతం సలార్ పార్ట్ 2, రాజా సాబ్, స్పిరిట్, కల్కి 2 మరియు ఫౌజీ లాంటి చిత్రాలతో ప్రేక్షకులను అలరించేందుకు సిద్దంగా ఉన్నాడు. ఇండియన్ సినిమా పరిశ్రమలో అన్ని భాషల్లో కూడా స్టార్ స్టేటస్ కలిగిన హీరోలలో ప్రభాస్ టాప్ లో ఉండడమే కాకుండా, అన్ని భాషల్లో కూడా మంచి హిట్ సినిమాలు ఇవ్వగలిగిన ప్రత్యేకత అతనిది. ఈ విప్లవాత్మక ఒప్పందం అతని కెరీర్‌లో మరో మైల్ స్టోన్ అని చెప్పవచ్చు

హోంబలే ఫిల్మ్స్ ఇప్పటికే కేజీఎఫ్, కాంతార, సలార్ 1 వంటి చిత్రాలతో అత్యంత ప్రతిష్టాత్మక నిర్మాణ సంస్థగా పేరుపొందింది. ఇప్పుడు కేజీఎఫ్ 3, కాంతార 2 వంటి ప్రాజెక్టులతో పాటు, ప్రభాస్‌తో కుదిరిన మూడు చిత్రాల ఒప్పందంతో ఆ సంస్థ ఊహించని స్థాయిలో ముందుకు సాగుతోంది. హోంబలే నిర్మాణ సంస్థ అధినేత విజయ్ కిరగందూర్ ఈ ప్రాజెక్టును గురించి మాట్లాడుతూ, “సరిహద్దులను దాటి, ప్రతి ప్రేక్షకుడిని మెప్పించే కథలు చెప్పడం మా లక్ష్యం. ప్రభాస్‌తో ఈ భాగస్వామ్యం తరం తరాల పాటు గుర్తుండిపోయే సినిమాలను సృష్టించడంలో మాకు తోడ్పడనుంది” అని చెప్పారు.

ఈ కాంబినేషన్లో మొదలవుతున్న సలార్ పార్ట్ 2 చిత్రంతో ప్రభాస్, హోంబలే ఫిల్మ్స్ తమ అభిమానులను కొత్త దశలోకి తీసుకువెళ్లనున్నారు. సలార్ పార్ట్ 1తోనే భారీ విజయం సాధించిన దర్శకుడు ప్రశాంత్ నీల్ ఈ చిత్రాన్ని కూడా డైరెక్ట్ చేస్తున్నారు. ఇక ప్రభాస్ తో మరో సినిమా ఏమిటనేది త్వరలోనే క్లారిటీ రానుంది. నీల్ దర్శకత్వంలో కేజీఎఫ్ 1, కేజీఎఫ్ 2 వంటి చిత్రాలు ఏ స్థాయిలో సక్సెస్ అయ్యాయో ప్రత్యేకంగా చెప్పనవసరం లేదు.

ఇక వాటితోనే హోంబలే ఫిల్మ్స్‌కు విపరీతమైన పేరు తెచ్చారు. ఇప్పుడు సలార్ 2తో ప్రేక్షకులకు మరో అద్భుతమైన అనుభవాన్ని అందించేందుకు సిద్ధమవుతున్నారు. హోంబలే ఫిల్మ్స్ అన్ని భాషల్లో హిట్ సినిమాలను అందించడంలో అగ్రగామిగా నిలిచింది. కేజీఎఫ్, కాంతార వంటి కన్నడ చిత్రాలు, సలార్ వంటి తెలుగు చిత్రాలు, రఘు తాత తమిళ్‌లో, ధూమం మలయాళంలో సక్సెస్ సాధించాయి.