'బాహుబలి' సేతుపతి 'పేకమేడలు'.. క్రేజీ కాన్సెప్ట్

'బాహుబలి' సేతుపతి రాకేష్ వర్రే గుర్తు ఉన్నారా?.. అదే గుడిలో తన మీద చెయ్యి వేయబోతే అనుష్క వేళ్ళు నరికేస్తుంది కదా! హా.. ఆయనే రాకేష్ వర్రే. ఆ తర్వాత ఆయన నిర్మాతగా మారిన సంగతి తెలిసిందే. క్రేజీ యాంట్స్ ప్రొడక్షన్స్ హౌస్ ను స్థాపించారు. ఆ బ్యానర్ పై 2019లో 'ఎవ్వరికీ చెప్పొద్దు'ను అనే సినిమాను నిర్మించి.. విమర్శకుల ప్రశంసలు సైతం అందుకున్నారు. ఓటీటీ నెట్ ఫ్లిక్స్ లో విడుదలై కూడా మంచి ఆదరణను దక్కించుకుంది. ఈ నాలుగేళ్లలో నెట్ ఫ్లిక్స్ లో ఎక్కువ మంది చూసిన సినిమాగాను రికార్డుకెక్కింది. అయితే ఇప్పుడు ఆయన మరో క్రేజీ కాన్సెప్ట్ తో ఓ సినిమాను నిర్మిస్తున్నారు.

కొత్త హీరో హీరోయిన్లను ప్రోత్సాహిస్తూ 'పేకమేడలు' అనే సినిమాను రూపొందిస్తున్నారు. క్రేజీ యాంట్స్ ప్రొడక్షన్ సంస్థలో ప్రొడక్షన్ నెం. 2గా ఈ సినిమా తెరకెక్కుతోంది. తాజాగా ఈ చిత్ర ఫస్ట్ లుక్ మోషన్ పోస్టర్ విడుదలై సినిమాపై మంచి ఇంట్రెస్ట్ ను క్రియేట్ చేస్తోంది. 'నా పేరు శివ', 'అంధగారం' సహా పలు హిట్ చిత్రాల్లో నటించిన వినోద్ కిషన్ ను హీరోగా పరిచయం చేస్తూ ఈ చిత్రాన్ని తీస్తున్నారు.

హీరోయిన్ గా అనూష కృష్ణ నటిస్తోంది. ఆమెకు ఇదే ఫస్ట్ తెలుగు మూవీ కావడం విశేషం. ఇక ఈ చిత్రంతో నీలగిరి మామిళ్ళ దర్శకుడిగా పరిచయం అవుతున్నారు. ఇంకా ఈ చిత్రంలో దాదాపు యాభై మంది కొత్త నటీనటులు పరిచయం అవుతున్నారు. ఇంకొతమంది ఎక్స్ పీరియన్స్ టెక్నిషియన్స్ కూడా ఈ సినిమా కోసం పనిచేయడం మరో విశేషం.

ఇక ఈ 'పేక మేడలు' ఫస్ట్ లుక్ పోస్టర్ చూస్తుంటే.. అచ్చం టైటిల్ కు తగ్గట్టే డిజైన్ చేశారు. 360 డిగ్రీస్ ఉన్న ఈ పోస్టర్ లో హీరో వినోద్ కిషన్.. లుంగీ కట్టుకుని, హాఫ్ బనియన్ తో హైదరాబాద్ బస్తీ, సిటీకి మధ్యలో ఆకాశానికి నిచ్చెన వేసుకుని ఊహల్లో పేక మేడలు కడుతూ కనిపించారు. ఇక ఈ చిత్రానికి 'అంగమలి డైరీస్', 'జల్లికట్టు' వంటి సినిమాలకు సౌండ్ డిజైన్ అందించిన ప్రముఖ సౌండ్ డిజైనర్ రంగనాధ్ రేవి, సౌండ్ మిక్సర్ కన్నన్ గన్ పత్ ఈ చిత్రానికి పని చేయడం విశేషం.

కాస్ట్యూమ్ డిజైనర్ గా మేఘన శేషవపురి పనిచేశారు. స్క్రీన్ ప్లే.. హంజా అలీ - శ్రీనివాస్ ఇట్టం - నీలగిరి మామిళ్ళ అందించారు. మాటలు, పాటలు.. భార్గవ కార్తీక్ ఇవ్వగా.. సృజన అడుసుమిల్లి - హంజా అలీ- కూర్పు అందించారు. హరిచరణ్ కె.. ఛాయాగ్రహణం, స్మరన్ సంగీతం అందించారు. ఇక ఈ సినిమాను ఆగస్టులో

ప్రేక్షకుల ముందుకు తీసుకు రానున్నట్టు దర్శక - నిర్మాతలు తెలిపారు. ఇప్పటి వరకు తెలుగు తెరపై రానటువంటి కథతో ఈ సినిమా రూపొందిస్తున్నట్లు పేర్కొన్నారు. సినిమా ప్రారంభం నుంచి చివరకు వరకు ప్రతి సన్నీవేశం ఆడియెన్స్ ను బాగా ఎంటర్ టైన్ చేస్తుందని వెల్లడించారు.