ఆ ప్రశంస నాకెంతో తృప్తినిచ్చింది

తెలుగు ప్రేక్షకులకు ఏక్ మినీ కథ సినిమాతో పరిచయం అయిన ముద్దుగుమ్మ కావ్య థాపర్‌. కెరీర్‌ ఆరంభంలో కాస్త ఒడిదొడుకులు ఎదుర్కొన్న ఈ అమ్మడు అనూహ్యంగా పెద్ద హీరోల సినిమాల్లో నటించే అవకాశాలు దక్కించుకుంటూ బిజీగా ఉంది. తాజాగా ఈమె నటించిన 'ఈగల్‌' సినిమా విడుదలకు సిద్ధం అయ్యింది.

రవితేజ హీరోగా కార్తీక్ ఘట్టమనేని దర్శకత్వంలో రూపొందిన ఈగల్ సినిమాలో ఒక హీరోయిన్ గా అనుపమ పరమేశ్వరన్‌ నటించగా మరో హీరోయిన్ గా కావ్య థామర్ నటించింది. ఈ సినిమాపై కావ్య చాలా ఆశలు పెట్టుకున్నట్లుగా ఆమె మాటలు వింటూ ఉంటే అర్థం అవుతుంది.

ఈగల్ సినిమా ప్రమోషన్ లో భాగంగా ఒక ఇంటర్వ్యూలో కావ్య థాపర్ మాట్లాడుతూ... నా కెరీర్‌ లో ఈ సినిమా చాలా పెద్ద ఆఫర్‌. నేను హిందీ సినిమా మిడిల్ క్లాస్ లవ్‌ చేస్తున్న సమయంలో ఈ ఆఫర్‌ వచ్చింది. కథ బాగా నచ్చింది. అంతే కాకుండా రవితేజ గారితో సినిమా అనగానే వెంటనే ఒప్పుకున్నాను. తర్వాత రోజు హైదరాబాద్ వచ్చి స్క్రీన్ టెస్ట్‌ ఇచ్చాను, అందులో పాస్ అవ్వడం తో ఛాన్స్ దక్కింది.

నాకు ఈ సినిమా అందమైన ప్రయాణం వంటిది. దేశ విదేశాల్లో షూటింగ్‌ జరపడం వల్ల చాలా ప్రదేశాలు కొత్తగా చూసే అవకాశం దక్కింది. ఈ సినిమాలో నా పాత్ర పేరు రచన. అన్ని వర్గాల ప్రేక్షకులకు నచ్చే విధంగా నా పాత్ర ఉంటుంది. ఈ సినిమా చూసిన రచయిత మణి అద్భుతంగా చేశారు అంటూ అభినందించారు. కావ్య కాకుండా రచన కనిపించిందని అన్నారు. ఆ ప్రశంస నాకెంతో తృప్తినిచ్చిందని కావ్య థాపర్‌ పేర్కొన్నాడు.