సతీ లీలావతిలా మెగా కోడలు

తెలుగు చిత్ర పరిశ్రమలోకి ఎలాంటి అంచనాలు లేకుండానే వచ్చినా.. తనదైన అందం, అభినయంతో ఆకట్టుకున్న హీరోయిన్ లావణ్య త్రిపాఠి. ఆరంభంలోనే మంచి మంచి చిత్రాలు, పాత్రలతో మెప్పించిన ఈ భామ.. వరుసగా ఆఫర్లను దక్కించుకుంది. అప్పటి నుంచి ఏమాత్రం వెనక్కి తిరిగి చూడకుండా ముందుకు సాగుతోంది. అయితే, ఈ మధ్య కాలంలో లావణ్య వెండితెరపై పెద్దగా కనిపించడం లేదు.

టాలీవుడ్ క్యూట్ హీరోయిన్ లావణ్య త్రిపాఠి గత ఏడాదిలోనే మెగా ప్రిన్స్ వరుణ్ తేజ్‌ను పెళ్లి చేసుకున్న విషయం తెలిసిందే. చాలా కాలం పాటు ఎంతో రహస్యంగా ప్రేమాయణం సాగించిన వీళ్లిద్దరూ.. పెద్దలను ఒప్పించి అగ్నిసాక్షిగా ఏకం అయ్యారు. పెళ్లి తర్వాత కూడా లావణ్య కెరీర్‌ను కంటిన్యూ చేస్తోంది. ఇప్పటికే ఆమె ‘పులి మేక’, ‘మిస్ పర్‌ఫెక్ట్’ వంటి వెబ్ సిరీస్‌లతో వచ్చి ప్రేక్షకులను అలరించింది.

లావణ్య త్రిపాఠి చాలా ఏళ్ల పాటు ఏకధాటిగా ప్రాజెక్టులు చేసినప్పటికీ.. ఈ మధ్య కాలంలో ఆశించిన రీతిలో సినిమాలు చేయడం లేదు. అడపాదడపా వెబ్ సిరీస్‌లలో కనిపించినా ఆమె అభిమానులు మాత్రం నిరాశ చెందుతూనే ఉన్నారు. ఇలాంటి పరిస్థితుల్లో లావణ్య త్రిపాఠి కొత్త సినిమాను ఓకే చేసినట్లు తాజాగా ఓ వార్త ఫిలిం నగర్ సర్కిళ్లలో విపరీతంగా వైరల్ అయిపోతోంది.

మెగా ప్రిన్స్ వరుణ్ తేజ్ భార్యగా మారిన తర్వాత లావణ్య త్రిపాఠి సినిమాల విషయంలో ఆచితూచి అడుగులు వేయాలని డిసైడ్ అయిపోయింది. ఇందులో భాగంగానే ఆమె ఎక్కువగా లేడీ ఓరియెంటెడ్ స్టోరీలనే వింటున్నట్లు కొద్ది రోజులుగా వార్తలు వస్తున్నాయి. ఈ క్రమంలోనే తాజాగా లావణ్య త్రిపాఠి ‘సతీ లీలావతి’ అనే ప్రాజెక్టుకు గ్రీన్ సిగ్నల్ ఇచ్చిందట. దీనిపై త్వరలోనే అధికారిక ప్రకటన రానుందని సమాచారం.

లావణ్య త్రిపాఠి ప్రధాన పాత్రలో రాబోతున్న ‘సతీ లీలావతి’ సినిమాను ఓ టాలెంటెడ్ డైరెక్టర్ తెరకెక్కించబోతున్నట్లు తెలిసింది. అంతేకాదు, ఇందులో ఆమె భర్తగా టాలీవుడ్‌లోని ఓ ఫేమస్ యంగ్ హీరో నటిస్తున్నాడట. ఈ చిత్రాన్ని పెద్ద నిర్మాణ సంస్థ తీస్తున్నట్లు కూడా తెలిసింది. ఇక, ఈ సినిమా భార్యభర్తల కథాంశంతో రూపుదిద్దుకోబోతుందట. ఇందులో లావణ్య త్రిపాఠి పాత్ర మాత్రం హైలైట్‌గా ఉండనుందనే టాక్ వినిపిస్తోంది.

మెగా కోడలు లావణ్య త్రిపాఠి కొత్త ప్రాజెక్టుకు సంబంధించిన న్యూస్ ఇప్పుడు ఇండస్ట్రీలో విపరీతంగా వైరల్ అవుతోంది. ఇక, ఈ చిత్రానికి సంబంధించిన పూర్తి సమాచారాన్ని యూనిట్ అతి కొద్ది రోజుల్లోనే వెల్లడించనుందట. దీంతో ఇప్పుడు ఈ న్యూస్ హాట్ టాపిక్‌గా మారిపోయింది.