లెజెండ‌రీ న‌టుడి కోడ‌లు- కూతురి మ‌ధ్య ఫిక‌ర్?
ఇప్పుడు ఐశ్వ‌ర్యారాయ్ తన కుమార్తె స‌హా తన ఇంటికి దూరంగానే దీపావళిని జ‌రుపుకోవ‌డంపై ఆస‌క్తిక‌ర చ‌ర్చ సాగుతోంది.
బాలీవుడ్ లెజెండ‌రీ హీరో కోడ‌లికి, కుమార్తెకు మ‌ధ్య పచ్చ‌గ‌డ్డి వేస్తే భ‌గ్గుమంటుంది. ఆ ఇద్ద‌రూ ఒక‌రికొక‌రు ఎదురుప‌డితే అది దేనికైనా దారి తీయొచ్చు. అందుకే ఆ ఇద్ద‌రూ ఉద్ధేశ‌పూర్వ‌కంగా ఎదురుప‌డే ఛాన్సే లేదు. ఆ ఇద్ద‌రి మ‌ధ్యా ఎడ‌మొహం పెడ‌మొహం వ్య‌వ‌హారం హిందీ మీడియాలో నిరంత‌రం చ‌ర్చ‌నీయాంశంగా మారుతూనే ఉంది. ఇప్పుడు దీపావళి పండుగ రోజున ఆ ఇద్ద‌రూ ఒక‌రికొక‌రు దూరంగా ఉండ‌డం చ‌ర్చ‌నీయాంశంగా మారింది. కూతురు అమ్మ‌గారి ఇంట్లో దీపావళి వేడుక‌ల కోసం అడుగుపెడితే, కోడ‌లు ఇల్లు విడిచి దూరంగా ఎక్క‌డికో వెళ్లారు. అత్త మామ‌ల‌తో దీపావ‌ళిలో పాల్గొన‌లేదు. యాధృచ్ఛికంగానో లేక ఉద్ధేశ‌పూర్వ‌కంగానో కోడ‌లు పిల్ల ఇలా దీపావ‌ళికి స్కిప్ కొట్ట‌డంపై ర‌క‌ర‌కాల ఊహాగానాలు సాగుతున్నాయి. ఆమె ఇటు రాగానే ఈమె అటెళ్లింది అంటూ ముంబై మీడియాలో గుస‌గుస‌లు వేడెక్కించేస్తున్నాయ్. ఈ మొత్తం ఎపిసోడ్ లో లెజెండ‌రీ న‌టుడు అమితాబ్ బచ్చన్. అత‌డి కుమార్తె శ్వేతాబ‌చ్చ‌న్ నందా, కోడ‌లు ఐశ్వ‌ర్యారాయ్ న‌డుమ పొస‌గ‌డం లేద‌ని హిందీ మీడియాలో చాలా కాలంగా గుస‌గుస‌లు ఉన్నాయి. ఇప్పుడు ఐశ్వ‌ర్యారాయ్ తన కుమార్తె స‌హా తన ఇంటికి దూరంగానే దీపావళిని జ‌రుపుకోవ‌డంపై ఆస‌క్తిక‌ర చ‌ర్చ సాగుతోంది.
దీపావళి రోజున కూతురు ఆరాధ్య బచ్చన్‌తో కలిసి ఐశ్వర్యరాయ్ ముంబై నుంచి దూరంగా వెళ్లారు. ఐష్ తన కుమార్తెతో కలిసి ఆదివారం ఉదయం ముంబై విమానాశ్రయంలో కనిపించింది. బచ్చన్ కుటుంబం దీపావళి పార్టీకి రెడీ అవుతున్న కొన్ని గంటల ముందు ముంబైని వ‌దిలి బయలుదేరడం కనిపించింది. ఐష్ ఎక్క‌డికి వెళుతున్నారో ఎవ‌రికీ తెలీదు. మీడియా ఫోటోగ్రాఫ‌ర్లు షేర్ చేసిన వీడియోలో ఐశ్వర్య నలుపు రంగు చొక్కా - ప్యాంటు ధరించి కనిపించగా, ఆరాధ్య ఎరుపు రంగు దుస్తులు ధరించింది. వీరిద్దరూ కెమెరాలకు పోజు ఇవ్వలేదు కానీ వారు విమానాశ్రయంలోకి ప్రవేశించే ముందు ఫోటోగ్రాఫ‌ర్లు ఫోటోలు తీసారు.
ఎయిర్‌పోర్ట్‌లో ఐశ్వర్య కనిపించిన కొన్ని గంటల తర్వాత అదే ఫోటోగ్రాఫ‌ర్లు అమితాబ్ బచ్చన్ - శ్వేతా బచ్చన్‌లను కలిసి ఫోటోలు తీసారు. బచ్చన్ ఇంటి వెలుపల తండ్రి-కుమార్తె ద్వయం కనిపించింది. ఒక ఫోటోగ్రాఫ‌ర్ షేర్ చేసిన వీడియోలో అమితాబ్- శ్వేత వారి నుదిటిపై తిలకంతో క‌నిపించారు. అమితాబ్ పూర్తిగా వైట్ అండ్ వైట్ లో ఉండగా, శ్వేత నీలం రంగు దుస్తులను ధరించి కనిపించింది. బచ్చన్ ఇంట్లోకి ప్రవేశించిన తర్వాత వారిద్దరూ మీడియాతో ఇంటరాక్ట్ కాలేదు.
దీపావళి సందర్భంగా కూడా బిగ్ బి ముంబైలోని తన ఇంటి వెలుపల గుమిగూడిన అభిమానులను కలిశారు. తన బ్లాగ్‌లో ఫ్యాన్స్ తో మీట్ అండ్ గ్రీట్ నుండి ఫోటోలను షేర్ చేసారు. ఫోటోలలో అమితాబ్ ఆహ్లాదంగా క‌నిపించారు. పండుగ వేళ కూడా అమితాబ్‌ని చూడటానికి వందలాది మంది అమితాబ్ ఇంటి వెలుపల గుమిగూడారు. అతడు వారిని చిరునవ్వుతో పలకరిస్తూ వారి ప్రేమ అభిమానాల‌ను తిరిగి పొందాడు.
బచ్చన్ కుటుంబ సభ్యులు ఇటీవ‌ల ర‌క‌ర‌కాల కార్యక్రమాలతో బిజీగా ఉన్నారు. అమితాబ్ రజనీకాంత్‌తో తలైవర్ 170 షూటింగ్‌లో బిజీగా ఉండగా, పొన్నియన్ సెల్వన్ 2 తర్వాత ఐశ్వర్యరాయ్ న‌ట‌న నుండి విరామం తీసుకుంటోంది. శ్వేత తన కొడుకు, అగస్త్య నందా తొలి చిత్రం `ది ఆర్చీస్‌` ప్రచారంతో, అభిషేక్ బచ్చన్ తన త‌దుప‌రి ప్రాజెక్ట్ షూట్ షెడ్యూల్‌లో బిజీగా ఉన్నారు. అభిషేక్ దీపావళిని మిస్స‌వ్వ‌డ‌మే గాక, గత నెలలో అమితాబ్ పుట్టినరోజు వేడుక‌ల‌కు కూడా దూరంగా ఉండాల్సి వ‌చ్చింది.