భ్రమయుగం@ భయంకరంగా మమ్ముట్టి..!

మళయాళ హీరో మమ్ముట్టి గురించి స్పెషల్ గా పరిచయం చేయాల్సిన అవసరం లేదు. ఆయన పేరుకు మళయాళ హీరో అయినప్పటికీ, తెలుగువారికీ సుపరిచితమే. చూడటానికి మమ్ముట్టి చాలా అందంగా ఉంటారు. ఆయన అందానికి పక్కన ఉన్న హీరోయిన్లు కూడా తేలిపోతూ ఉంటారు. అలాంటి మమ్ముట్టిని తొలిసారి ఓ భయంకరమైన లుక్ లో చూడబోతున్నాం.

ఆయన హీరోగా నటించిన తాజా చిత్రం భ్రమయుగం. భూతకాలం సినిమా ఫేమ్ రాహుల్ సదాశివన్ ఈ చిత్రానికి ద‌ర్శ‌క‌త్వం వ‌హిస్తున్నారు. ఇప్ప‌టికే ఈ సినిమా నుంచి మోష‌న్ పోస్ట‌ర్ విడుదల చేయగా, విపరీతంగా ఆకట్టుకుంది. కాకగా, తాజాగా ఈ మూవీ నుంచి మమ్ముట్టి లుక్ ని విడుదల చేశారు. ఆయన పుట్టిన రోజు సందర్భంగా ఈ లుక్ విడుదల చేయడం విశేషం.

అయితే, ఈ ఫోటోలో మమ్ముట్టి చాలా డీ గ్లామర్ లుక్ లో కనపడుతున్నారు. అది బ్లాక్ అండ్ వైట్ ఫోటో అని తెలుస్తోంది. ఒంటిమీద చొక్కా లేకుండా, కుర్చీలో కూర్చొని ఉన్నారు. ఒకరకంగా నవ్వుతూ కనిపిస్తున్నారు. మెడలో రుద్రాక్షమాల ఉంది. కింద పంచ కట్టుకొని ఉన్నారు. ఈ లుక్ చాలా డిఫరెంట్ గా, మూవీపై ఆసక్తి పెంచేలా ఉండటం విశేషం.

మమ్ముట్టి ఇప్పటి వరకు చేయని పాత్రను ఈ సినిమాలో చేయడం విశేషం. కేరళలోని చీకటి యుగాల నేపథ్యంలో ఈ సినిమా కథ నడుస్తున్నట్లు తెలుస్తోంది. హారర్, థ్రిల్లర్ జాన‌ర్‌లో ఈ మూవీ తెరకెక్కుతోందట. ఈ చిత్రాన్ని నైట్ షిఫ్ట్ స్టూడియోస్, వై నాట్ స్టూడియోస్ సంయుక్తంగా నిర్మిస్తున్నాయి. అర్జున్ అశోకన్, సిద్దార్థ్‌, భరతన్, అమల్దా లిజ్‌లు ప్రధాన పాత్రలు పోషించనున్నారు.

ఈ మూవీని పాన్ ఇండియా రేంజ్ లో మలయాళం, తమిళం, తెలుగు, కన్నడ, హిందీభాషల్లో ఏక కాలంలో విడుదల చేయనున్నారు. ఈ సినిమా వచ్చే ఏడాది అంటే 2024లో విడుదల కానుంది. కాగా, ఈ చిత్రానికి క్రిస్టో జేవియర్ సంగీతం అందించనున్నారు. మరి ఈ మూవీ ఎంత వరకు అభిమానులను ఆకట్టుకుంటుందో చూడాలి.