చిరంజీవి 'మెగా' ఇంటర్వ్యూ.. ఈసారి గట్టిగానే..

టాలీవుడ్ మెగాస్టార్ చిరంజీవి.. ఇది పేరు కాదు ఒక బ్రాండ్.. ఎన్నో ఏళ్లుగా సినీ ఇండస్ట్రీని ఏలుతున్న ఆయనకు ఎలాంటి ఫ్యాన్ బేస్ ఉందో అందరికీ తెలిసిందే. పునాది రాళ్లు నుంచి మొన్నటి భోళా శంకర్ వరకు తన యాక్టింగ్ తో ఎంతగానో మెప్పించారు. ఫ్యూచర్ లో ఇంకా అలరించేందుకు సిద్ధమవుతున్నారు. నవరసాల్లో ఏదైనా అలవోకగా పండించే ఆయన ఇప్పటి వరకు ఎన్నో అవార్డులు, రివార్డులు, పురస్కారాలు అందుకున్నారు.

రీసెంట్ గా తన సినీ కెరీర్ లో 156 సినిమాల్లో 537 పాటలకు 24,000 డ్యాన్స్ మూమెంట్స్ చేసినందుకు గిన్నిస్ బుక్ ఆఫ్ రికార్డ్ సొంతం చేసుకుని తన సత్తా ఏంటో చూపించారు చిరు. ఆ తర్వాత ఇటీవల అక్కినేని నాగేశ్వరరావు నేషనల్ అవార్డును అందుకున్నారు. అంతకుముందు కేంద్ర ప్రభుత్వం ఇచ్చే పద్మవిభూషణ్ పురస్కారాన్ని దక్కించుకున్నారు. అలా కొన్నాళ్లుగా నిత్యం వార్తల్లో నిలుస్తూనే ఉన్నారు మెగాస్టార్ చిరంజీవి.

కానీ మీడియాతో ఇంటరాక్ట్ అవ్వడం కానీ ఇంటర్వూలు ఇవ్వడం గానీ చేయడం లేదు. తన జీవితంలో ఎన్నో అద్భుతమైన మూమొంట్స్ జరిగినా.. స్పెషల్ ఇంటర్వ్యూలు ఇవ్వలేదు. దీంతో కొందరు ఫ్యాన్స్ ఆ విషయంలో అసంతృప్తిగా ఉన్నారనే చెప్పాలి. అలాంటి వారందరికీ ఇప్పుడో గుడ్ న్యూస్. మెగాస్టార్ రీసెంట్ గా ఓ ప్రముఖ మీడియా సంస్థకు ఇంటర్వ్యూ ఇచ్చినట్లు తెలుస్తోంది. చాలా సమయం ఆ ఇంటర్వ్యూ సాగిందని టాక్.

ఇంత వరకూ ఎన్నడూ లేని విధంగా మెగాస్టార్ అనేక విషయాలు మాట్లాడారని వార్తలు వస్తున్నాయి. తన జీవితంలోని ఎన్ని విషయాలను షేర్ చేసుకున్నారని గుసగుసలు వినిపిస్తున్నాయి. పాస్ట్, ప్రెజెంట్, ఫ్యూచర్.. అలా తన లైఫ్ కు సంబంధించిన అనేక మ్యాటర్స్ తోపాటు పలు కాంట్రవర్సీ విషయాలపై మాట్లాడారని తెలుస్తోంది. త్వరలోనే ఆ ఇంటర్వ్యూను సదరు మీడియా సంస్థ రిలీజ్ చేయనున్నట్లు సమాచారం. అది కూడా మూడు భాగాల్లోనని వినికిడి.

దీంతో ఇప్పుడు ఈ విషయం తెలుసుకున్న మెగా అభిమానులు ఫుల్ ఖుషీ అయిపోతున్నారు. వెయిటింగ్ ఫర్ చిరంజీవి 'మెగా' ఇంటర్వ్యూ అని కామెంట్లు పెడుతున్నారు. ప్రోమోను త్వరగా రిలీజ్ చేయండని కోరుతున్నారు. అదే సమయంలో మెగాస్టార్ ఏ ఏ విషయాలపై మాట్లాడారో తెలుసుకోవాలని ఆసక్తిగా ఉందని చెబుతున్నారు నెటిజన్లు. కొద్ది రోజుల నుంచి జరిగిన అనేక పరిణామాలపై మెగాస్టార్ స్పందించి ఉంటారని అంచనా వేస్తున్నారు.

అయితే ఏపీ అసెంబ్లీ ఎన్నికల సమయంలో వైసీపీ అభ్యర్థి శిల్పా రవి ఇంటికి అల్లు అర్జున్ వెళ్లిన నాటి నుంచి మెగా, అల్లు ఫ్యామిలీల మధ్య గ్యాప్ పెరిగిందని జోరుగా ప్రచారం సాగుతోంది. దీనిపై ఇప్పటి వరకు చిరంజీవి ఎప్పుడూ ఎక్కడా స్పందించలేదు. దీంతో రీసెంట్ గా ఇచ్చిన ఇంటర్వ్యూలో చిరు ఆ మ్యాటర్ పై మాట్లాడి ఉంటారని ఎక్స్పెక్ట్ చేస్తున్నారు. ఏపీలో తన తమ్ముడు, జనసేనాని పవన్ కళ్యాణ్ అఖండ విజయంపై కూడా మాట్లాడి ఉంటారని చెబుతున్నారు. మరి 'మెగా' ఇంటర్వ్యూ బయటకు వస్తేగానీ.. చిరు ఏం మాట్లాడారో తెలియదు.