నా సామి రంగా.. పండగ మొదలైంది

టాలీవుడ్ మన్మధుడు కింగ్ నాగార్జున ప్రస్తుతం నా సామిరంగ సినిమాలో నటిస్తున్న విషయం తెలిసిందే. విలేజ్ బ్యాక్ డ్రాప్ లో తెరకెక్కుతున్న ఈ సినిమా డేట్ ను ఆదివారమే మేకర్స్ ప్రకటించారు. జనవరి 14వ తేదీన ప్రపంచ వ్యాప్తంగా రిలీజ్ చేస్తున్నట్లు క్లారిటీ ఇచ్చారు. అయితే ఇది వరకే సంక్రాంతికి సోగ్గాడే చిన్నినాయనా, బంగార్రాజుతో వచ్చి హిట్ లు కొట్టిన నాగార్జున.. ఇప్పుడు మళ్లీ పండుగకే రావడంతో సినిమాపై భారీ అంచనాలు ఉన్నాయి.

అయితే ఈ సినిమాలోని నాగార్జునతోపాటు యంగ్ హీరోలు అల్లరి నరేశ్, రాజ్ తరుణ్ కూడా కీలక పాత్రల్లో నటిస్తున్నారు. వీరి పాత్రలను ఇప్పటికే చిత్రబృందం పరిచయం చేసేసింది. కమర్షియల్ కామెడీ అండ్ యాక్షన్ జోనర్ లో రాబోతున్న ఈ మూవీ నుంచి విడుదలైన పాటలు, పోస్టర్లు, గ్లింప్స్ ప్రేక్షకులను తెగ ఆకట్టుకున్నాయి. మూవీ రిలీజ్ డేట్ దగ్గర పడుతుండడం వల్ల మేకర్స్ ప్రమోషన్ల స్పీడ్ ను పెంచారు.

తాజాగా ఈ సినిమా నుంచి నా సామి రంగా అంటూ సాగే టైటిల్ లిరికల్ సాంగ్ ను మేకర్స్ రిలీజ్ చేశారు. ఆస్కార్ విన్నింగ్ సాంగ్ నాటు నాటు ఆలపించిన కాలభైరవ, రాహుల్ సిప్లిగంజ్ ఈ పాటను పాడారు. చంద్రబోస్ లిరిక్స్ అందించగా.. ఎంఎం కీరవాణి బాణీలు కట్టారు. ప్రస్తుతం ఈ సాంగ్ సోషల్ మీడియాలో వైరల్ గా మారింది.

ఈ సాంగ్ లో సంక్రాంతి వాతావరణం ఉట్టిపడుతోంది. ఓ జాతరలో ఈ పాట ఉండనున్నట్లు అర్ధమవుతోంది. వేషాలు, జాతరలో ఉండే ఆటపరికరాలు అన్నీ చాలా సందడిగా కనిపిస్తున్నాయి. నాగార్జున, అల్లరి నరేశ్ లుంగీలు కట్టుకోగా.. రాజ్ తరుణ్ క్యాజువల్ గెటప్ లో ఉన్నారు. మాస్ బీట్ కు ముగ్గురు కలిసి వేసిన స్టెప్పులు అదిరిపోయాయి. అయితే సాంగ్ లో దాదాపు 300 మంది డ్యాన్సర్లు ఉన్నట్లు కనిపిస్తోంది.

ఇక సినిమా విషయానికొస్తే.. నాగార్జున సరసన ఈ సినిమాలో ఆషికా రంగానాథ్ నటిస్తున్నారు. ప్రముఖ కొరియోగ్రాఫర్ విజయ్ బిన్నీ ఈ సినిమాతో దర్శకుడిగా పరిచయమవుతున్నారు. శ్రీనివాస సిల్వర్ స్క్రీన్ బ్యానర్ పై శ్రీనివాస్ చిట్టూరి భారీ బడ్జెట్ తో నిర్మిస్తున్నారు. మరి ఈ సినిమాతో నాగార్జున సంక్రాంతి సెంటిమెంట్ ను రిపీట్ చేస్తారో లేదో చూడాలి.