కమ్ముల కుబేర.. నాగార్జున సర్ ప్రైజ్ లుక్

నవమన్మథుడిగా తనకంటూ ఒక ప్రత్యేకమైన స్టార్ ఇమేజ్ అందుకున్న అక్కినేని నాగార్జున ఈ రోజు తన 65వ పుట్టినరోజు జరుపుకుంటున్నారు. ఈ సందర్భంగా ప్రముఖ దర్శకుడు శేఖర్ కమ్ముల పాన్-ఇండియా చిత్రం కుబేర టీమ్‌ ఫ్యాన్స్ కోసం స్పెషల్ పోస్టర్ రిలీజ్ చేశారు. నాగార్జున కొత్త లుక్‌లో స్టైలిష్ పోస్టర్‌ను సోషల్ మీడియాలో ట్రెండ్ అవుతోంది. ఈ పోస్టర్‌ నెటిజన్లను, ఫ్యాన్స్‌ను ఎంతగానో ఆకట్టుకుంటోంది.

పోస్టర్‌లో నాగార్జున స్టైలిష్‌గా గడ్డంతో, ఆహ్లాదకరమైన చిరునవ్వుతో తనను చూసే వారికి గ్రీటింగ్ ఇస్తున్నట్లు చూపించారు. ఈ లుక్ నాగార్జున మాస్, క్లాస్ ఫ్యాన్స్‌కి పర్ఫెక్ట్‌గా కనెక్ట్ అవుతుందని చెప్పడంలో ఎటువంటి సందేహం లేదు. ఆరు పదుల వయసులోనూ నాగార్జున తన అందంతో అభిమానులను ఆకట్టుకోవడం ప్రత్యేకం.

కుబేర సినిమాకి శేఖర్ కమ్ముల దర్శకత్వం వహిస్తుండగా, నాగార్జున ప్రధాన పాత్రలో నటిస్తున్నారు. ఆయనతో పాటు స్టార్ హీరో ధనుష్ మరియు రష్మిక మందన్న ముఖ్య పాత్రల్లో నటిస్తున్నారు. ఇటీవల విడుదలైన ఈ సినిమాలోని పాత్రల గ్లింప్స్ ఇప్పటికే ప్రేక్షకులను ఆకట్టుకున్నాయి. ముఖ్యంగా నాగార్జున, ధనుష్, రష్మికల పాత్రలను పరిచయం చేస్తూ విడుదలైన పోస్టర్లు సినిమాపై అంచనాలను పెంచాయి.

అంతేకాకుండా, ఈ సినిమాలో బాలీవుడ్ స్టార్ నటుడు జిమ్ సర్బ్ కూడా కీలక పాత్రలో కనిపించనున్నారు. భారీ బడ్జెట్‌తో రూపొందుతున్న ఈ చిత్రాన్ని ప్రముఖ నిర్మాణ సంస్థలు శ్రీ వెంకటేశ్వర సినిమాస్ ఎల్‌ఎల్‌పీ మరియు అమిగోస్ క్రియేషన్స్ ప్రైవేట్ లిమిటెడ్ బ్యానర్లపై సునీల్ నారంగ్ మరియు పుస్కూర్ రామ్ మోహన్ రావు నిర్మిస్తున్నారు.

తండ్రి అక్కినేని నాగేశ్వరరావు వారసుడిగా సినీరంగంలోకి అడుగుపెట్టిన నాగార్జున, తన సొంత ప్రతిభతో టాప్ హీరోగా నిలిచారు. విభిన్న జోనర్స్‌ని ఎంచుకుంటూ ప్రేక్షకులను కొత్త అనుభూతులకు గురిచేసేలా ఎన్నో ప్రయోగాత్మకమైన సినిమాల్లో నటించారు. గీతాంజలి, శివ, హలో బ్రదర్, మనం వంటి సినిమాలతో అద్భుత విజయాలు సాధించారు.

ఈ ఏడాది సంక్రాంతి టైమ్ లో విడుదలైన నా సామి రంగ సినిమాలో కూడా విజయం సాధించారు. ఇప్పటికీ యవ్వనంగా కనిపించే నాగార్జున పుట్టినరోజు సందర్భంగా వచ్చిన ఈ కొత్త పోస్టర్ కుబేర సినిమాపై అంచనాలను మరింత పెంచుతోంది. ఈ సినిమాలో నాగార్జున ఒక నిజాయితీ గల పోలీస్ ఆఫీసర్ గా కనిపించనున్నట్లు తెలుస్తోంది.