ప్రభాస్ మూవీలో నయన్.. అసలు నమ్మేలా ఉందా?

రెబల్ స్టార్ ప్రభాస్ హీరోగా నటిస్తున్న లేటెస్ట్ పాన్ ఇండియా మూవీ ''ది రాజాసాబ్''. మారుతి దర్శకత్వంలో ఈ రొమాంటిక్ హారర్ కామెడీ తెరకెక్కుతోంది. ఇందులో మాళవిక మోహనన్, నిధి అగర్వాల్, రిద్ది కుమార్ వంటి ముగ్గురు హీరోయిన్లు నటిస్తున్నారు. ఎస్.థమన్ ఈ చిత్రానికి సంగీతం సమకూరుస్తున్నారు. ఇది మాస్‌ కమర్షియల్‌ ఆల్బమ్‌ అని, ఆరు పాట‌లు ఉంటాయని మ్యూజిక్ డైరెక్టర్ ఇటీవలే వెల్లడించారు. ఒక రీమిక్స్ సాంగ్ కూడా ఉంటుందని తెలిపారు. అయితే సినిమాలోని స్పెషల్ సాంగ్ లో ఓ స్టార్ హీరోయిన్ ను నటింపజేయాలని మేకర్స్ ప్రయత్నాలు చేస్తున్నారని వార్తలు వస్తున్నాయి.

'రాజాసాబ్' మూవీలోని స్పెషల్ సాంగ్ కోసం మేకర్స్ లేడీ సూపర్ స్టార్ నయనతార ను పరిశీలిస్తున్నారనే ఓ రూమర్ ఇప్పుడు సోషల్ మీడియాలో చక్కర్లు కొడుతోంది. పాన్‌ ఇండియా మార్కెట్‌ను దృష్టిలో పెట్టుకుని, నయన్ అయితే బాగుంటుందని అనుకుంటున్నారట. ఆమె గతంలో 'శివాజీ' 'కథానాయకుడు' 'ట్వంటీ: 20' 'ఎథిర్ నీచల్' వంటి చిత్రాల్లో ప్రత్యేక గీతాల్లో నటించింది. స్టార్ హీరోయిన్ గా ఎదిగిన తర్వాత అతిధి పాత్రలు, స్పెషల్ సాంగ్స్ చేయడం లేదు. 40 ఏళ్ళు వచ్చినా ఇప్పటికీ ఆమె డిమాండ్ ఏమీ తగ్గలేదు. ప్రస్తుతం చేతిలో అర డజను సినిమాలు ఉన్నాయి. లీడ్ రోల్స్ ఆఫర్స్ వస్తున్నప్పుడు ఇప్పుడు ప్రభాస్ మూవీలో స్పెషల్ సాంగ్ చేయడానికి నయన్ ఒప్పుకుంటుందా అనేదే అనుమానంగా ఉంది.

నయనతార గతంలో ప్రభాస్ సరసన 'యోగి' సినిమాలో హీరోయిన్ గా నటించింది. అలానే మారుతి దర్శకత్వంలో 'బాబు బంగారం' మూవీలో హీరోయిన్ గా చేసింది. ఆ సమయంలో నిర్మాత నాగవంశీకి ఆమెకు మధ్య గొడవ కూడా జరిగింది. చివర్లో వెంకటేష్ - నయన్ మధ్య మారుతి ఓ డ్యూయెట్ సాంగ్ తీయాలని ప్లాన్ చేయగా.. నయనతార డేట్స్ ఇవ్వలేదు. అంతేకాదు తాను షూటింగ్ కు రానని, ఏం చేసుకుంటారో చేసుకోమని ఖరాకండిగా చెప్పిందట. దీంతో చేసేదేమీ లేక ఆ పాట లేకుండానే సినిమాని పూర్తి చేసారు. ఈ విషయాన్ని ఓ ఇంర్వ్యూలో మారుతి స్వయంగా వెల్లడించారు.

వెంకటేష్ లాంటి పెద్ద హీరోకి నయనతార మర్యాద ఇవ్వకపోవడం తనకు బాధ కలిగించిందని కూడా మారుతి చెప్పారు. అలాంటిది దర్శకుడు ఇప్పుడు తన 'రాజాసాబ్' సినిమాలో ప్రత్యేక గీతం కోసం ఆమెను సంప్రదిస్తారా? అనేదే నమ్మేలా లేదు. ఇప్పటికైతే ప్రభాస్ సినిమాలో స్పెషల్ కోసం నయనతారను కన్సిడర్ చేస్తున్నారనేది ఓ రూమర్ మాత్రమే. మేకర్స్ దీన్ని నిజం చేస్తారా? లేదా మరో హీరోయిన్ తో వెళ్తారా? అనేది రానున్న రోజుల్లో తెలుస్తుంది.

హారర్, కామెడీ, రొమాంటిక్ అంశాలతో కూడిన సూపర్ నేచురల్ థ్రిల్లర్ గా ''ది రాజాసాబ్'' సినిమా రూపొందుతోంది. ప్రభాస్ ఈ జోనర్ లో నటించడం ఇదే మొదటిసారి. ఇందులో ఆయన రెండు భిన్నమైన పాత్రల్లో కనిపించన్నారు. ఇప్పటికే రెండు పాత్రలకు సంబంధించిన లుక్స్ బయటకు వచ్చాయి. డార్లింగ్ మునుపెన్నడూ చూడని గెటప్ లో కనిపించి సర్ప్రైజ్ చేసారు. మారుతి చూపించిన ఫ్యాన్ ఇండియన్ గ్లింప్స్, మోషన్ పోస్టర్ కు ఆడియన్స్ నుంచి మంచి రెస్పాన్స్ వచ్చింది. సంక్రాంతికి ఫస్ట్ సింగిల్ ను రిలీజ్ చేసే అవకాశం ఉంది.

'రాజాసాబ్' చిత్రాన్ని పీపుల్ మీడియా ఫ్యాక్టరీ బ్యానర్‌పై టిజి విశ్వ ప్రసాద్ భారీ బడ్జెట్ తో నిర్మిస్తున్నారు. ఇది చిన్న సినిమా కాదని, ఎవరూ ఊహించని పెద్ద స్కేల్ లో తీస్తున్న సినిమా అని నిర్మాత తెలిపారు. స్టోరీ స్పాన్, సెట్స్, వీఎఫ్ఎక్స్ భారీగా ఉంటాయని చెప్పారు. ఇంతవరకూ ప్రపంచంలో ఏ సినిమాలో చూపించనంత సైజ్ లో హార్రర్ ఉంటుందని ఈ మధ్య ఓ ఇంటర్వ్యూలో చెప్పారు. కార్తీక్ పళని సినిమాటోగ్రఫీ అందిస్తున్న ఈ మూవీకి కోటగిరి వెంకటేశ్వర రావు ఎడిటింగ్ వర్క్ చేస్తున్నారు. 2025 ఏప్రిల్ 10న తెలుగు, హిందీ, తమిళం, మళయాలం, కన్నడ భాషల్లో ఈ సినిమా విడుదల కాబోతోంది.