సూపర్ స్టార్‌ వర్సెస్‌ యంగ్‌ టైగర్‌.. ఫ్యాన్స్ టెన్షన్‌

టాలీవుడ్‌ తో పాటు కోలీవుడ్‌ నుంచి రాబోయే రోజుల్లో స్టార్‌ హీరోల సినిమాలు వరుసగా రాబోతున్నాయి. ఎంత వద్దు అనుకున్నా కూడా కనీసం మూడు నాలుగు సినిమాలైనా క్లాష్ అయ్యే పరిస్థితి ఉంది. తెలుగు హీరోల సినిమాలు మాత్రమే కాకుండా తమిళ స్టార్‌ హీరోల సినిమాలు కూడా పోటీ పడి రాబోతున్న నేపథ్యంలో పెద్ద క్లాష్‌ తప్పేలా లేదు.

యంగ్‌ టైగర్ ఎన్టీఆర్‌ హీరోగా నటించిన దేవర సినిమా ను ఏప్రిల్‌ లో విడుదల చేయాలని భావించినప్పటికి సాధ్యం కాలేదు. దాంతో అక్టోబర్‌ కి సినిమాను వాయిదా వేశారు. అక్టోబర్‌ 10న సినిమాను విడుదల చేయబోతున్నారు. ఆ తేదీన తెలుగు సినిమాలు పెద్దవి ఏవీ కూడా విడుదల అయ్యే అవకాశం లేదు.

దేవర కి టాలీవుడ్‌ సినిమాల నుంచి పెద్దగా పోటీ ఉండక పోవచ్చు.. కానీ కోలీవుడ్‌ సూపర్ స్టార్‌ రజినీకాంత్‌ నుంచి మాత్రం ఎన్టీఆర్‌ కి గట్టి పోటీ ఎదురయ్యేలా ఉంది. రజినీకాంత్‌ ప్రస్తుతం జ్ఞానవేల్‌ దర్శకత్వంలో వేట్టైయాన్ అనే సినిమాలో నటిస్తున్నాడు. ఆ సినిమా ను అక్టోబర్ లో విడుదల చేయబోతున్నారు.

వేట్టైయాన్ సినిమా విడుదల తేదీ విషయంలో స్పష్టత రాలేదు. కానీ దేవర సినిమాకు కాస్త అటు ఇటుగానే ఆ సినిమా ఉంటుందని మాత్రం బలంగా ప్రచారం జరుగుతోంది. ఈ మధ్య కాలంలో రజినీకాంత్ సినిమాలకు టాలీవుడ్‌ లో గతంలో ఉన్నంత క్రేజ్ లేదు. కనుక దేవర సినిమా కు తెలుగు రాష్ట్రాల్లో వేట్టైయాన్ నుంచి పెద్దగా పోటీ ఉండక పోవచ్చు.

అయితే దేవర సినిమా ను పాన్ ఇండియా రేంజ్ లో భారీ ఎత్తున విడుదల చేయాలని భావిస్తున్నారు. అంటే తమిళనాట కూడా దేవర సినిమా కి గ్రాండ్ రిలీజ్ దక్కాలి. వేట్టైయాన్ సినిమా పోటీ ఉంటే అక్కడ దేవర సినిమాకు ఆశించిన స్థాయిలో ఓపెనింగ్స్ రాకపోవచ్చు.

ఇక్కడ రజినీకాంత్‌ సినిమాకు, అక్కడ దేవర సినిమాకు క్లాష్ వల్ల డ్యామేజీ ఏర్పడుతుంది. కనుక ఇద్దరు హీరోల ఫ్యాన్స్ కూడా ఈ విషయంలో టెన్షన్ పడుతున్నారు. కనీసం వారం గ్యాప్‌ తో వచ్చినా బాగుంటుంది అనే అభిప్రాయం వ్యక్తం అవుతోంది.