సలార్ రిలీజ్ డేట్.. తెరపైకి మరో కొత్త ప్రచారం

గత రెండు రోజులుగా ఏ సినీ ప్రేమికుడి నోట మాట విన్న సలార్ వాయిదా గురించే. ఈ వార్త తెలిసినప్పటి నుంచి అటు ప్రభాస్ అభిమానులు.. ఇటు ఇండస్ట్రీ వర్గాలు షాక్ అవుతున్నారు. బాహుబలి తర్వాత ప్రభాస్‌కు మూడు డిజాస్టర్లు ఎదురు కావడం వల్ల తీవ్రంగా నిరాశ చెందిన ఫ్యాన్స్.. సలార్ మీద బోలెడన్ని ఆశలతో విడుదల కోసం ఆత్రుతగా ఎదురు చూస్తున్నారు. అయితే ఇప్పుడు కాస్త ఉపశమనం పొందే వార్త మళ్లీ తెరపైకి ప్రచారం వచ్చింది. సినిమా అనుకున్న తేదీకే వస్తుందని అంటున్నారు.

వివరాళ్లోకి వెళితే.. గత కొన్ని రోజుల్లో సోషల్ మీడియా, టెలివిజన్ మీడియాలో వినిపిస్తున్న ఒకే ఒక్క పేరు సలార్. పాన్ ఇండియా స్టార్ ప్రభాస్, ప్రశాంత్ నీల్ కాంబోలో తెరకెక్కిన ఈ చిత్రం మరికొన్ని రోజుల్లో సెప్టెంబర్ 28న విడుదల కావాల్సి ఉంది. ఫస్ట్ సాంగ్,, ట్రైలర్ రిలీజ్ చేసి ప్రమోషన్స్ ను కిక్ స్టార్ట్ చేస్తారు అనుకున్న సమయంలో సోషల్ మీడియాలో పోస్ట్ పోన్ గాసిప్ బాంబ్ పేలింది. దీంతో పాన్ ఇండియా మొత్తం ఒక్కసారిగా షాక్ అయిపోయింది.

ఎందుకంటే సలార్ లాంటి భారీ యాక్షన్ చిత్రం వస్తుండడంతో సెప్టెంబర్ 28న తమ సినిమాలు రిలీజ్ చేయకుండా.. అన్ని ఇండస్ట్రీల ఫిల్మ్ మేకర్స్ వేరే రిలీజ్ షెడ్యూల్స్ ను ప్లాన్ చేసుకున్నారు. మరి ఇలాంటి సమయంలో విడుదల వాయిదా అని వినపడింది. దీంతో అభిమానులు నిరాశ చెందితే.. మేకర్స్ లో మాత్రం టెన్షన్ మొదలైంది. అలాగే సలార్ కొత్త డేట్ పైన ఉత్కంఠ నెలకొంది. ఎందుకంటే తర్వాతి నెలల్లో తమ చిత్రాల రిలీజ్ షెడ్యూల్స్ చేసుకున్న మేకర్స్.. ఎక్కడ సలార్ కొత్త రిలీజ్ డేట్ బాంబ్​ తమపై పడుతుందోనని ఆందోళన చెందుతున్నారు.

అసలే రాబోయేది ఫెస్టివల్ సీజన్. దసరా, దీపావళి, సంక్రాంతి. ఈ పండగలకు రిలీజ్ అవ్వాల్సిన సినిమాలు ఇప్పటికే బెర్త్ ను ఖరారు చేసుకున్నాయి. ఇప్పుడు సలార్.. వేరే సినిమాలు లాక్ చేసుకున్న ఫెస్టివల్ సీజన్స్ బరిలోకి దిగితే వాటికి నష్టం వచ్చే అవకాశముంటుంది. దీంతో ఇప్పుడు పాన్ ఇండియా ఫిల్మ్ ఇండస్ట్రీలో ఇబ్బందికర పరిస్థితి మొదలైంది.

కానీ ఇప్పటికైతే సలార్ నిర్మాణ సంస్థ హోంబలే ఫిల్మ్స్ నుంచి సలార్ వాయిదా అని అఫీషియల్ కన్ఫర్మేషన్ రాలేదు. మరోవైపు ఇప్పుడు సలార్.. చెప్పిన డేట్ కే విడుదల అవుతుందంటూ కొత్త ప్రచారం సోషల్ మీడియాలో మళ్లీ మొదలైంది. ఇదే పక్కా అని వాదనలు వినిపిస్తున్నాయి. అలాగే సలార్ ప్రభాస్ అభిమానులు కూడా సెప్టెంబర్ 28నే విడుదల అవ్వాలని గట్టిగా కోరుకుంటున్నారు. చూడాలి మరి ఏం జరుగుతుందో.