ఈసారి పూరి హీరో అత‌డా?

డ్యాషింగ్ డైరెక్ట‌ర్ పూరి జ‌గ‌న్నాధ్ ఇప్పుడెలాంటి ఫేజ్ లో ఉన్నాడో తెలిసిందే. 'ఇస్మార్ట్ శంక‌ర్' త‌ర్వాత పూరిని ప‌రాజ‌యాలు వెంటాడుతున్నాయి. 'లైగ‌ర్', 'డ‌బుల్ ఇస్మార్ట్' తో బ్యాక్ టూ బ్యాక్ ఫెయిల్యూర్స్ ప‌డ్డాయి. 'లైగ‌ర్' ప్లాప్ తో విజ‌య్ దేవ‌ర‌కొండ అప్ క‌మింగ్ ప్రాజెక్ట్ జ‌న‌గ‌ణ‌మ‌న‌ని సైతం పూరితో ర‌ద్దు చేసుకున్నాడు. డ‌బుల్ ఇస్మార్ట్ బౌన్స్ బ్యాక్ అవ్వాల‌ని ప్ర‌య‌త్నించినా ప‌న‌వ్వ‌లేదు. దీంతో పూరి త‌దుప‌రి హీరో ఎవ‌ర‌వుతారు? అన్న‌ది ఆస‌క్తిక‌రంగా మారింది.

ప్ర‌స్తుతం ఉన్న ప‌రిస్థితుల్లో అయితే పూరితో స్టార్ హీరోలెవ‌రూ సినిమాలు చేయ‌డానికి ముందుకు రారు. టైర్-2 హీరోలు సైతం రిస్క్ తీసుకునే ప‌రిస్థితి ఉండ‌దు. పైగా పూరి ఇంకా ఓల్డ్ ఫార్మెట్ లోనే సినిమాలు చేస్తున్నాడు? అందుకే వైఫ‌ల్యాలు చెందుతున్నాయి అనే కార‌ణంగా బ‌లంగా వినిపిస్తుంది. మ‌రి ఇలాంటి ఫేజ్ లో పూరి ఆప్ష‌న్ ఎవ‌రు? అంటే ఓ హీరో హీరో పేరు తెర‌పైకి వ‌స్తుంది. అత‌డే సందీప్ కిష‌న్. న‌టుడిగా సందీప్ చాలా సినిమాలు చేసాడు.

కానీ హీరోగా స‌రైన స‌క్సెస్ లు మాత్రం ప‌డ‌లేదు. ట్యాలెంటెడ్ న‌టుడైనా ఎక్క‌డో త‌ప్పిదం అత‌డిని వెన‌క్కి లాగి పెడుతుంది. ఈ నేప‌థ్యంలో ఈ ద్వ‌యాన్ని క‌ల‌ప‌డానికి పూరి స్నేహితుడు-సందీప్ కిష‌న్ మేన మామ శ్యామ్.కె. నాయుడు రంగంలోకి దిగిన‌ట్లు స‌మాచారం. వీళ్లిద్ద‌రి కాంబినేష‌న్ లో ఓ సినిమా సెట్ చేస్తున్నాడుట‌. పూరి స‌రైన క‌థ రాస్తే క‌టౌట్ అవ‌స‌రం లేదు. అత‌డి క‌థే హీరోగా మారిపోతుంది.

ఇండ‌స్ట్రీకి వార‌సుల్ని ప‌రిచ‌యం చేసి స్టార్ డ‌మ్ అందించిన ఘ‌న‌త అత‌ని సొతం. హీరోల‌కు మాస్ ఇమేజ్ ఇవ్వ‌డంలో ఎవ‌రైనా పూరి త‌ర్వాతే అన్న‌ది తెలిసిన వాస్త‌వం. అందుకే శ్యామ్. కె. నాయుడు ఇప్పుడు మేన‌ల్లుడు కోసం పూరిని రంగంలోకి దించుతున్న‌ట్లు వినిపిస్తుంది. పూరి-శ్యామ్ మంచి స్నేహితులు. ఇద్ద‌రు క‌లిసి చాలా సినిమాలు చేసారు.