మల్లూ లిరిక్స్ తో 'పుష్ప' సాంగ్.. 'పీలింగ్స్' ప్రోమో చూశారా?

పాన్ ఇండియా లెవెల్ లో ఇప్పుడు సినీ ప్రియులంతా వెయిట్ చేస్తున్న వన్ అండ్ ఓన్లీ మూవీ పుష్ప: ది రూల్. ఐకాన్ స్టార్ అల్లు అర్జున్, సుకుమార్ కాంబోలో రూపుదిద్దుకుంటున్న ఆ సినిమా కోసం అంతా ఆసక్తిగా ఎదురు చూస్తున్నారు. మరోసారి బన్నీ, సుక్కు కలిసి ఎలాంటి మ్యాజిక్ చేస్తారోనని అంతా మాట్లాడుకుంటున్నారు.

సినిమాపై ఇప్పటికే భారీ అంచనాలు క్రియేట్ చేసిన మేకర్స్.. వాటిని రోజురోజుకు పెంచుకుంటూ పోతున్నారు. కచ్చితంగా ఫస్ట్ రోజే సినిమా చూసేయాలనే ఇంట్రెస్ట్ క్రియేట్ చేస్తున్నారు. వరుస ఈవెంట్స్ తో సందడి చేస్తున్నారు. అదే సమయంలో అదిరిపోయే అప్డేట్స్ తో పాజిటివ్ వైబ్స్ క్రియేట్ చేస్తూనే ఉన్నారు పుష్ప-2 మేకర్స్.

ఇప్పటికే సినిమా నుంచి మూడు సాంగ్స్ రిలీజ్ చేయగా.. ఒకటి మించి మరొకటి హిట్ అయిందనే చెప్పాలి. రీసెంట్ గా పుష్ప సీక్వెల్ నుంచి నాలుగో సాంగ్ ను విడుదల చేశారు మేకర్స్. మాలీవుడ్ ఈవెంట్ లో అనౌన్స్ చేసిన పీలింగ్స్ పాట ప్రోమోను రిలీజ్ చేశారు. సాంగ్ అంతా మలయాళ లిరిక్స్ తో ఉండనుందని ఇప్పటికే బన్నీ తెలిపారు.

మలయాళ ప్రేక్షకులకు స్పెషల్ సర్ ప్రైజ్ ఉంటుందని అల్లు అర్జున్ చెప్పినట్లే పీలింగ్స్ ప్రోమో ఉందని చెప్పాలి. పక్కా మలయాళీ బీట్స్ తో సాంగ్ అందరినీ ఆకట్టుకుంటుందని ప్రోమో క్లారిటీ ఇచ్చేసింది. గ్లింప్స్ లో విజువల్స్ చాలా రిచ్ గా కనిపిస్తున్నాయి. అల్లు అర్జున్, రష్మిక తమ లుక్స్ తో పక్కా గా అట్రాక్ట్ చేసేలా కనిపిస్తున్నారు.

దేవిశ్రీ ప్రసాద్ మరోసారి తన మ్యాజిక్ ను రిపీట్ చేయడం పక్కా అని ప్రోమో ద్వారా అర్థమవుతోంది. ప్రస్తుతం పీలింగ్స్ సాంగ్ ప్రోమో సోషల్ మీడియాలో ఫుల్ వైరల్ గా మారింది. పాట కోసం వెయింటింగ్ అని మ్యూజిక్ లవర్స్ కామెంట్లు పెడుతున్నారు. అయితే డిసెంబర్ 1వ తేదీన సాంగ్ ను రిలీజ్ చేయనున్నట్లు మేకర్స్ తెలిపారు.

అదే రోజు.. హైదరాబాద్ లోని మల్లారెడ్డి కాలేజీ గ్రౌండ్ లో పుష్ప ఈవెంట్ ను మేకర్స్ నిర్వహించనున్నట్లు ప్రచారం సాగుతోంది. ఆ వేడుకలో పీలింగ్స్ ఫుల్ సాంగ్ ను విడుదల చేయనున్నారని సమాచారం. మరి పుష్ప-2 కొత్త సాంగ్ ఎలాంటి రికార్డులు క్రియేట్ చేస్తుందో.. ఎలా ఆకట్టుకుంటుందో తెలియాలంటే వేచి చూడాలి.