పుష్ప 2 ఫస్ట్ సాంగ్.. టాప్ 5లో కూడా లేదే..

ఐకాన్ స్టార్ అల్లు అర్జున్ హీరోగా సుకుమార్ దర్శకత్వంలో తెరకెక్కిన పుష్ప సినిమాలో సాంగ్స్ ఎంత పెద్ద హిట్ అయ్యాయో అందరికీ తెలిసిందే. దేశవ్యాప్తంగా పుష్ప పాటలు సంచలనం క్రియేట్ చేశాయి. పుష్ప సినిమా సంగీతానికి గాను దేవిశ్రీప్రసాద్ ఏకంగా నేషనల్ అవార్డు అందుకున్నారు. ఇప్పటికీ దేశంలో ఎక్కడ ఒకచోట పుష్ప సినిమాలోని పాటలు వినిపిస్తూనే ఉంటాయి. అంతలా ఆ సాంగ్స్ పాపులర్ అయ్యాయి.

ఇదిలా ఉంటే ప్రస్తుతం పుష్పకి సీక్వెల్ గా పుష్ప ది రూల్ మూవీ తెరకెక్కుతున్న సంగతి తెలిసిందే. ఆగస్టు 15 ఈ చిత్రం ప్రపంచవ్యాప్తంగా రిలీజ్ కాబోతోంది. మైత్రి మూవీ మేకర్స్ 300 కోట్ల భారీ బడ్జెట్ తో ఈ చిత్రాన్ని నిర్మిస్తున్నారు. తాజాగా ఈ సినిమా నుంచి ఫస్ట్ సింగిల్ గా పుష్ప రాజ్ సాంగ్ ని ప్రేక్షకుల మందికి తీసుకొని వచ్చారు. తెలుగు హిందీ భాషలలో రిలీజ్ అయిన పాటకి సోషల్ మీడియాలో అద్భుతమైన రెస్పాన్స్ వస్తోంది.

అయితే ఈ పుష్పరాజ్ సౌత్ లో హైయెస్ట్ వ్యూవ్స్ రికార్డును బ్రేక్ చేస్తారని అందరూ అంచనా వేశారు. కానీ ఈ సాంగ్ కనీసం టాప్ 5 లో కూడా నిలవకపోవడం గమనార్హం. టాలీవుడ్ లో కూడా వ్యూవ్స్ పరంగా టాప్ వన్ స్థానం దక్కించుకోలేకపోయింది. తెలుగులో అత్యధిక వ్యూవ్స్ ని 24 గంటల్లో సొంతం చేసుకున్న పాటలలో మొదటి స్థానంలో గుంటూరు కారం దమ్ మసాలా సాంగ్ ఉంది.

ఈ సాంగ్ 24 గంటల్లో 17.42 మిలియన్ వ్యూవ్స్ సొంతం చేసుకోవడం విశేషం. రెండో స్థానంలో సర్కారు వారి పాట సినిమాలో పెన్నీ సాంగ్ నిలిచింది. ఈ సాంగ్ 16.38 మిలియన్ వ్యూస్ దక్కించుకుంది. మూడో స్థానంలో సర్కారు వారి పాట సినిమాలో కళావతి సాంగ్ 14.78 మిలియన్ వ్యూవ్స్ తో నిలబడింది. నాలుగో స్థానంలో సర్కారు వారి పాట సినిమాలోని మ మ మహేష్ 13.56 మిలియన్ వ్యూవ్స్ తో ఉండటం విశేషం.

ఐదో స్థానంలో పుష్పలోని ఉ అంటావా సాంగ్ ఉంది. ఈ సాంగ్ 24 గంటల్లో 12.39 మిలియన్ వ్యూవ్స్ తో సొంతం చేసుకుంది. 10.38 మిలియన్ వ్యూవ్స్ తో పుష్ప 2 పుష్ప రాజ్ పాట ఆరో స్థానంలో కొనసాగుతోంది. కనీసం టాలీవుడ్ లో హైయెస్ట్ వ్యూవ్స్ రికార్డు అయిన ఈ సాంగ్ బ్రేక్ చేస్తుందని ఆశించారు. ఎందుకో అది కూడా సాధ్యం కాలేదు. తెలుగులో కంటే హిందీలో పుష్పరాజ్ పాటకి అత్యధిక వ్యూవ్స్ రావడం విశేషం. దీనిని బట్టి నార్త్ ఇండియన్ ప్రేక్షకులు పుష్ప ది రూల్ మూవీ కోసం ఆసక్తిగా ఎదురుచూస్తున్నారని అర్థమవుతుంది.