పుష్ప-2.. డౌట్ అక్కర్లేదు

ఐకాన్ స్టార్ అల్లు అర్జున్ హీరోగా నటిస్తున్న భారీ యాక్షన్ థ్రిల్లర్ పుష్ప-2. డైరెక్టర్ సుకుమార్ తెరకెక్కిస్తున్న ఈ సినిమాలో నేషనల్ క్రష్ రష్మిక మందన్న హీరోయిన్ గా నటిస్తోంది. పాన్ ఇండియా లెవల్లో తెరకెక్కుతున్న ఈ మూవీపై ఇప్పటికే భారీ అంచనాలు నెలకొన్నాయి. పుష్ప ఫస్ట్ పార్ట్ భారీ విజయం సాధించడంతో పుష్ప 2పై క్రేజ్ నెక్స్ట్ లెవల్ కు చేరుకుంది.

కొన్నిరోజుల క్రితం మేకర్స్ రిలీజ్ చేసిన పుష్ప పార్ట్-2 ఇంట్రో.. ఆ అంచనాలను మరింత పెంచేసింది. అందుకే ఈ సినిమా కోసం ఆడియన్స్ ఈగర్ గా వెయిట్ చేస్తున్నారు. సుకుమార్ కూడా ఈ మూవీ కోసం ప్రత్యేకమైన శ్రద్ధ తీసుకుంటున్నారు. ఏ విషయంలోనూ అస్సలు కాంప్రమైజ్ కావడం లేదు. ఇక ఈ సినిమా ఆగస్టు 15న రిలీజ్ అవుతుందని మేకర్స్ ఎప్పుడో ప్రకటించేశారు.

కానీ మేకర్స్ చెప్పిన డేట్ కు ఈ సినిమా రిలీజ్ కాదని ఇటీవలే చాలా వార్తలు వచ్చాయి. అదే రోజు ఎన్టీఆర్ దేవర రిలీజ్ అవ్వనుందని కూడా టాక్ వినిపించింది. దీంతో ఈ వార్తలపై మేకర్స్ స్పందించారు. పుష్ప-2 విడుదల తేదీపై మరోసారి క్లారిటీ ఇచ్చారు. ఆగస్టు 15నే రిలీజ్ చేస్తామని తెలిపారు. ఈ మేరకు నిర్మాణ సంస్థ మైత్రీ మూవీ మేకర్స్ సోషల్ మీడియాలో పోస్ట్ చేసింది.

పుష్ప రాజ్ తన రూల్ ను ప్రారంభించడానికి ఇంకా 200 రోజులు ఉందని తెలిపింది. ప్రపంచ వ్యాప్తంగా ఆగస్టు 15వ తేదీన పుష్ఫ-2 రిలీజ్ చేస్తామని ప్రకటించింది. దాంతోపాటు ఇంట్రెస్టింగ్ పోస్టర్ ను రిలీజ్ చేసింది. అందులో ఓ భారీ రాయిపై పులి నిల్చుని చూస్తుంది. తాజా అప్డేట్ తో బన్నీ ఫ్యాన్స్ సంబరాలు చేసుకుంటున్నారు. ఆగస్టు 15న తగ్గేదేలే అంటూ రచ్చ రచ్చ చేస్తున్నారు.

అల్లు అర్జున్‌, సుకుమార్‌ కాంబోలో తెరకెక్కిన పుష్ప ది రైజ్‌ 2021లో విడుదలై బాక్సాఫీస్‌ వద్ద దుమ్మురేపింది. ఇందులో శ్రీవల్లి పాత్రతో రష్మిక ప్రత్యేకమైన ఫ్యాన్స్‌ బేస్ సంపాదించుకుంది. ఫహాద్ ఫాజిల్ కొద్దిసేపు మాత్రమే కనిపించారు. పార్ట్‌-2లో ఆయన ఎక్కువ సేపు కనిపిస్తారని టాక్‌ వినిపిస్తోంది. ఇక పుష్ప పార్ట్‌ 1కు గాను ఉత్తమ నటుడిగా అల్లు అర్జున్‌, ఉత్తమ సంగీత దర్శకుడిగా దేవిశ్రీ ప్రసాద్‌ జాతీయ అవార్డులు అందుకున్న విషయం తెలిసిందే.