SRKని డాన్‌గా ప్రకటించినప్పుడు అదే జరిగింది!

త‌న‌దైన ఫ్యాష‌న్ సెన్స్.. న‌ట‌న‌లో ఎన‌ర్జీ .. డేర్ అండ్ గ‌ట్స్ తో ఎల్ల‌పుడూ ప్ర‌త్యేకంగా క‌నిపిస్తాడు ర‌ణ్ వీర్ సింగ్. ఫ్యాష‌న్ సెన్స్ ప‌రంగా ఎన‌ర్జీ ప‌రంగా అత‌డు యూనిక్ స్టైల్ తో ఆక‌ట్టుకుంటాడు. అయితే ఇటీవ‌లి కాలంలో కెరీర్ ప‌రంగా ఆశించిన‌ది జ‌ర‌గ‌లేదు. అత‌డు న‌టించిన కొన్ని భారీ చిత్రాలు వ‌రుస‌గా ఫ్లాపుల‌వ్వ‌డం మైన‌స్ అయింది. ప్రస్తుతం `డాన్ 3`లో రణ్‌వీర్ సింగ్ కనిపించనున్నాడు. ఇంత‌కుముందు అమితాబ్ బచ్చ‌న్.. షారుఖ్ ల‌ను డాన్ పాత్ర‌ల్లో చూసాం. కానీ ఇప్పుడు ఆ ఇద్ద‌రికీ వార‌సుడిగా డాన్ పాత్ర‌లో అడుగుపెట్ట‌బోతున్నాడు. అయితే ప్ర‌స్తుత ట్రెండ్ లో షారూఖ్ కాకుండా మ‌రొక డాన్ ని అభిమానులు అస్స‌లు ఊహించుకోలేక‌పోతున్నారు. సోష‌ల్ మీడియాల్లో బోలెడంత ట్రోలింగ్ జ‌రుగుతోంది.

స్టార్ హీరో ర‌ణ్ వీర్ ఎట్టకేలకు ఈ ట్రోలింగ్ వ్య‌వ‌హారంపై ఓపెన‌య్యాడు. ట్రోల్‌లు కూడా గేమ్‌లో భాగమని.. SRKని డాన్‌గా ప్రకటించినప్పుడు కూడా అదే జరిగింద‌ని అన్నాడు. కాబట్టి అలాంటివి నన్ను ఇబ్బంది పెట్టవు అని కూడా అన్నాడు స్టార్ హీరో ర‌ణ్ వీర్. రణ్‌వీర్ ఇంకా మాట్లాడుతూ ``ఈ ఫ్రాంచైజీలో లాఠీని ముందుకు తీసుకెళ్లడం.. ఇద్దరు గొప్ప సూపర్‌స్టార్ల వారసత్వాన్ని కొనసాగించడం - దాని ప్రాముఖ్యతను త‌గ్గ‌కుండా చేయ‌డం అవ‌స‌రం. కాబట్టి నేను నా బెస్ట్ షాట్ ఇస్తాను. మీరు నాలోని ఉత్తమమైన ప్ర‌తిభ‌ను చూస్తారు. నేను నిస్సందేహంగా డాన్ కోసం నా ఉత్తమ అడుగు వేస్తాను`` అని కాన్ఫిడెన్స్ ని ప్ర‌ద‌ర్శించాడు.

ఫర్హాన్ అక్తర్ దర్శకత్వం వహిస్తున్న డాన్ 3 షూటింగ్ త్వరలో ప్రారంభం కానుంది. రణ్‌వీర్‌కు గొప్ప‌ టాలెంట్ ఉంది. డాన్‌గా న‌టించ‌గ‌ల‌డు. కానీ SRK చేయాల్సిన పాత్రలో అతడిని ఫ్రాంఛైజీ అభిమానులు ఊహించుకోలేక‌పోతున్నారు. డాన్ గా ర‌ణ్ వీర్ పెర్ఫామెన్స్ ఎలా ఉండ‌బోతోందో అనే దానిపై అభిమానులు ఆసక్తి చూపలేదు. సందీప్ రెడ్డి వంగా `కబీర్ సింగ్‌` ఆఫ‌ర్‌ను తిరస్కరించానని గుర్తు చేసుకున్న‌ సంద‌ర్భంలో ర‌ణ్ వీర్ వార్తల్లో నిలిచాడు. మరి రానున్న రోజుల్లో డాన్‌గా ఎలా నటిస్తాడో ఏ మేర‌కు మెప్పిస్తాడో వేచి చూడాలి.

సౌదీ అరేబియాలో రెడ్ సీ ఇంటర్నేషనల్ ఫిల్మ్ ఫెస్టివల్ మూడవ ఎడిషన్ సందర్భంగా, రణవీర్ సింగ్ సినిమాకి చేసిన కృషికి గాను గౌరవం అందుకున్నాడు. జెడ్డాలో జరిగిన చర్చా కార్యక్రమంలో పాల్గొన్న తర్వాత ఫర్హాన్ అక్తర్ దర్శకత్వం వహించనున్న‌ చిత్రంలో డాన్ పాత్ర సహా పలు అంశాలపై మాట్లాడారు. గతంలో అమితాబ్ బచ్చన్ -షారుఖ్ ఖాన్ పోషించిన `డాన్` పాత్రలో న‌టిస్తున్నందున .. దాని చుట్టూ ఉన్న సందేహాలపై స్పందిస్తూ.. రణవీర్ తన ముందున్న సవాళ్ల గురించి తనకు తెలుసునని పేర్కొన్నాడు.

ర‌ణ్‌వీర్‌ని స‌మ‌ర్థించిన ద‌ర్శ‌క‌నిర్మాత ఫ‌ర్హాన్‌:

ఇన్‌స్టాగ్రామ్ వీడియోతో ఫర్హాన్ అక్తర్ డాన్ 3ని ప్రకటించారు. డెడ్‌లైన్‌తో మాట్లాడుతూ `` రణ్‌వీర్ డాన్‌ని స్వంతం చేసుకోవాలని .. హిందీ సినిమా అత్యంత ప్రియమైన గౌరవనీయమైన ఫ్రాంచైజీలలో ఒకటైన డాన్ లాఠీని అందజేయడం కోసం ప్ర‌య‌త్న‌మిది. డాన్ 3 అనౌన్స్‌మెంట్ చేసినప్పుడు, ఊహించినట్లుగానే సందేహాలు వ్య‌క్త‌మ‌య్యాయి. కానీ సినిమా చరిత్రలో ఇలానే జరిగింది. బాండ్ 007 ఫ్రాంచైజీ చేతులు మారినప్పుడు డేనియల్ క్రెయిగ్‌ను కొత్త బాండ్‌గా ప్రకటించినప్పుడు కూడా ఇలాంటి సందేహాలే నెల‌కొన్నాయి. కానీ అత‌డు నిరూపించాడు. కాబట్టి ఇది సహజమేన‌ని అన్నాడు.

1978 వెర్షన్ `డాన్`లో డాన్ గా విజయ్ గా అమితాబ్ బచ్చ‌న్ ద్వంద్వ పాత్రలను పోషించారు. దీనిని సలీం ఖాన్ - జావేద్ అక్తర్ రచించారు. చంద్ర బారోట్ దర్శకత్వం వహించారు. 2007లో షారుఖ్ ఖాన్ ద్విపాత్రాభినయంతో `డాన్` కొత్త వెర్షన్‌ను ఫర్హాన్ అక్తర్ తెర‌కెక్కించాడు. 2011లో దానికి సీక్వెల్ డాన్ 2ను రూపొందించాడు. ఇవి బ్లాక్ బ‌స్ట‌ర్ హిట్లు కొట్టాయి.