పండ‌గ ముగిశాక ఏం లాభం డార్లింగ్?

డార్లింగ్ ప్రభాస్ న‌టించిన పాన్ ఇండియన్ సినిమా 'స‌లార్' ఆశించిన దానికంటే గొప్ప విజ‌యం సాధించింది. ఈ సినిమా బాక్సాఫీస్ వ‌ద్ద దాదాపు 750కోట్లు వ‌సూలు చేసింది. కింగ్ ఖాన్ షారూఖ్ న‌టించిన డంకీతో పోటీప‌డుతూ విడుద‌లైన స‌లార్ బాక్సాఫీస్ పోరులో విజేత‌గా నిలిచింది. డంకీ సుమారు 400 కోట్లు వ‌సూలు చేయ‌గా 'స‌లార్' అందుకు డబుల్ వసూళ్ల‌ను సాధించింది

అయితే ఈ సినిమా రిలీజ్ కి ముందు కానీ, రిలీజ్ త‌ర్వాత కానీ ప్ర‌భాస్ టీమ్ చెప్పుకోద‌గ్గ ప్ర‌చారం ఏదీ చేయ‌లేదు. ప్ర‌శాంత్ నీల్ తో క‌లిసి ప్ర‌భాస్ ఇంట‌ర్వ్యూ ఒక‌టి వైర‌ల్ అయింది మిన‌హా అయిన దానికి కాని దానికి మీడియా ముందుకు వ‌చ్చి హంగామా సృష్టించ‌లేదు. కానీ ఇప్పుడు సంక్రాంతి బ‌రిలో వ‌చ్చిన నాలుగైదు సినిమాల‌తో స‌లార్ ఫుల్ ర‌న్ కూడా ముగిసిన‌ట్ట‌యింది

అయితే ఇలాంటి స‌మ‌యంలో డార్లింగ్ ఊహించ‌ని ప‌నులు చేస్తున్నాడు. సంక్రాంతి సెల‌వులు కూడా ముగిసాయి. తిరిగి స్కూళ్లు కాలేజ్ లు తెరుస్తున్నారు.. ఇప్పుడు బ‌య‌ట‌కు వ‌చ్చి ప్ర‌భాస్ స‌లార్ కి ప్ర‌మోష‌న్స్ చేయ‌డం విడ్డూరంగా మారింద‌ని కామెంట్లు వినిపిస్తున్నాయి. ఆల్మోస్ట్ థియేట‌ర్ల నుంచి స‌లార్ ఎగ్జిట్ అయ్యే స‌మ‌యంలో ఈ ప్ర‌చారం దేనికోసం? అంటూ అభిమానులే ఆశ్చ‌ర్య‌పోతున్నారు. ప్ర‌భాస్ కోసం ఇంట‌ర్వ్యూలు చూస్తారు స‌రే.. థియేట‌ర్ల‌కు వెళ్లేంత ఊపొస్తుందా? అన్న‌ది వేచి చూడాలి. మ‌రోవైపు హృతిక్ రోష‌న్ న‌టించిన భారీ చిత్రం ఫైటర్ రిప‌బ్లిక్ డే కానుక‌గా విడుద‌ల కానుంది.