సిద్ధు 'జాక్' కోసం అతని వర్క్ మరో లెవెల్

యూత్ లో ఇటీవల మంచి క్రేజ్ అందుకున్న సిద్ధు జోన్నలగడ్డ ఇప్పుడు మరో క్రేజీ ప్రాజెక్ట్‌తో రెడీ అవుతున్నాడు. డీజే టిల్లు లాంటి సెన్సేషనల్ హిట్ తర్వాత అతని ఫ్యాన్ బేస్ స్ట్రాంగ్ గా పెరిగింది. అందుకే, కొత్త సినిమా 'జాక్ - కొంచెం క్రాక్' పై భారీ అంచనాలు నెలకొన్నాయి. ఈ సినిమాకు బొమ్మరిల్లు భాస్కర్ దర్శకత్వం వహిస్తుండటంతో, ఇది ఎలాంటి కథగా ఉండబోతోందో అనే ఆసక్తి పెరిగింది. సిద్ధును లుక్ రిలీజ్ నుంచి ఈ ప్రాజెక్ట్ గురించి రకరకాల ఊహాగానాలు వస్తున్నాయి.

అయితే విడుదలకు ముందే టీజర్, పాటలు సినిమాపై బజ్‌ను మరింత పెంచేశాయి. ఏప్రిల్ 10న ప్రేక్షకుల ముందుకు రాబోతున్న ఈ సినిమా కచ్చితంగా సిద్ధు కెరీర్‌లో మరో ప్రత్యేకమైన సినిమా అవుతుందని మేకర్స్ చెబుతున్నారు. సిద్ధు సినిమాలకు సంబంధించి ఎప్పుడూ ఏదో ఒక ప్రత్యేకత ఉంటుంది. యూత్‌ఫుల్ ఎలిమెంట్స్, ట్రెండీ డైలాగ్స్, కామెడీ మిక్స్, ఉత్కంఠ కలిగించే కథనంతో అతని సినిమాలు అందరికీ కనెక్ట్ అవుతాయి.

జాక్ విషయంలో కూడా అదే జరుగుతుందనే టాక్ ఉంది. టీజర్ చూసిన వారు దీని కథ కథనాలు కొత్తగా అనిపిస్తున్నాయని అంటున్నారు. ఈ సినిమా కోసం సిద్ధు తన లుక్స్‌లోనూ, స్టైల్లోనూ మార్పులు తీసుకువచ్చాడు. ప్రస్తుతం, ఆయన సరసన వైష్ణవి చైతన్య హీరోయిన్‌గా నటిస్తుండటంతో ఈ కాంబినేషన్ ఎలా ఉంటుందో అనే ఆసక్తి నెలకొంది.

ఇక ఈ సినిమాలో మరో స్పెషల్ ఎలిమెంట్ శామ్ సిఎస్ బ్యాక్ గ్రౌండ్ మ్యూజిక్. ఇటీవల కాలంలో పుష్ప 2, సుడల్ 2 వంటి భారీ సినిమాలకు బ్యాక్ గ్రౌండ్ స్కోర్ అందించిన శామ్ సిఎస్ ఇప్పుడు జాక్ సినిమాకు తన మ్యూజిక్ మంత్రంతో ప్రత్యేకత తీసుకురాబోతున్నాడు. బ్యాక్‌గ్రౌండ్ స్కోర్ అంటే మామూలుగా సినిమాకు ఉత్కంఠను పెంచేది, కానీ శామ్ సిఎస్ విషయంలో అది మరో స్థాయిలో ఉంటుందని సినీ ప్రేమికులు భావిస్తున్నారు.

ఇప్పటికే విడుదలైన టీజర్‌లోనూ ఆయన మ్యూజిక్‌కి మంచి రెస్పాన్స్ వచ్చింది. సిద్ధు పాత్రను మరింత పవర్‌ఫుల్‌గా ఎలివేట్ చేయడానికి శామ్ అందించే ఆర్ఆర్ ఎంతవరకు హెల్ప్ అవుతుందో చూడాలి. సంగీతం మాత్రమే కాదు, ఈ సినిమాకు సంబంధించిన పాటలు కూడా ఇప్పటికే ట్రెండింగ్‌లో ఉన్నాయి. అచ్చు రాజమాణి అందించిన పాటలు ఇప్పటికే విడుదలై మంచి రెస్పాన్స్ తెచ్చుకున్నాయి. సినిమా సాంగ్స్ చాలా ఫ్రెష్‌గా, ట్రెండీగా ఉండటం విశేషం.

సిద్ధు స్టైల్‌కి తగ్గట్టుగా మాస్, మెలోడీ మిక్స్‌తో పాటలు ఉండబోతున్నాయి. ఇప్పటికే రిలీజ్ చేసిన పాటలకు సోషల్ మీడియాలో మంచి రెస్పాన్స్ వస్తుండటంతో, మిగిలిన ట్రాక్‌లు కూడా అదిరిపోతాయని అభిమానులు భావిస్తున్నారు. ఇక బీవీఎస్ఎన్ ప్రసాద్ నిర్మాణంలో రూపొందుతున్న ఈ సినిమాలో ప్రకాశ్ రాజ్, నరేష్, బ్రహ్మాజీ లాంటి నటీనటులు కీలక పాత్రలు పోషిస్తున్నారు. వీరి పాత్రలు సినిమాకు ఎంత హైప్ తెచ్చిపెడతాయో చూడాలి. ఇప్పటికే అన్ని కార్యక్రమాలు పూర్తిచేసుకుని చివరి దశకు చేరిన ఈ సినిమా ఏప్రిల్ 10న భారీ ఎత్తున విడుదల కాబోతోంది.