శోభితా పెళ్లి తర్వాత ప్రాజెక్ట్‌ కన్ఫర్మ్
ఇటీవలే శోభిత లవ్‌ సితార వెబ్‌ మూవీతో ప్రేక్షకుల ముందుకు వచ్చి విమర్శకుల ప్రశంసలు దక్కించుకుంది.
తెలుగు అమ్మాయి అయినా బాలీవుడ్‌లో మంచి గుర్తింపు దక్కించుకున్న శోభితా దూళిపాళ ప్రస్తుతం అక్కడ ఇక్కడ సినిమాలు, సిరీస్‌లు చేస్తూ కెరీర్‌ లో బిజీగా ఉంది. ఇటీవలే శోభిత లవ్‌ సితార వెబ్‌ మూవీతో ప్రేక్షకుల ముందుకు వచ్చి విమర్శకుల ప్రశంసలు దక్కించుకుంది. విభిన్న కాన్సెప్ట్‌ మూవీస్‌ లో నటించడం ద్వారా నటిగా తనను తాను ప్రతిసారి నిరూపించుకుంటున్న శోభిత మరో కొత్త ప్రాజెక్ట్‌కి గ్రీన్‌ సిగ్నల్ ఇచ్చిందని తెలుస్తోంది. ఈసారి శోభిత తెలుగులో నటించబోతుంది. ఒక లేడీ ఓరియంటెడ్‌ స్క్రిప్ట్‌ రెడీ అయిందని సమాచారం అందుతోంది.
ఇప్పటికే అక్కినేని నాగ చైతన్యతో వివాహానికి నిశ్చితార్థం పూర్తి చేసుకున్న శోభిత వచ్చే నెలలో పెళ్లి పీటలు ఎక్కబోతుంది. నాగ చైతన్యను వివాహం చేసుకున్న తర్వాత శోభిత సినిమాలు చేస్తుందా లేదా అని చాలా మంది అనుమానాలు వ్యక్తం చేస్తున్నారు. వారి అనుమానాలకు చెక్‌ పెడుతూ శోభిత కొత్త సినిమాకు కమిట్‌ అయింది. చందు దర్శకత్వంలో రూపొందుతున్న ఈ సినిమాలో విశ్వదేవ్‌ రాచకొండ కీలక పాత్రలో కనిపించబోతున్నాడు. 35 : చిన్న కథ కాదు సినిమాలో ముఖ్యపాత్రలో నటించిన విశ్వదేవ్‌ నటనతో మెప్పించాడు.
శోభిత, విశ్వదేవ్‌ రాచకొండ ముఖ్య పాత్రల్లో నటించబోతున్న ఈ సినిమాకు సంబంధించిన కొన్ని సన్నివేశాల చిత్రీకరణ సైతం జరిగినట్లుగా తెలుస్తోంది. త్వరలోనే సినిమా కొత్త షెడ్యూల్‌ను ప్రారంభించాలని అనుకుంటున్న సమయంలో పెళ్లి ముహూర్తం దగ్గరకు రావడంతో పెళ్లి తర్వాత కొత్త షెడ్యూల్ చేయాలని నిర్ణయించుకున్నారు. నాగ చైతన్య ను పెళ్లి చేసుకున్న కొన్ని రోజుల్లోనే శోభిత తన కొత్త సినిమా షూటింగ్‌లో జాయిన్‌ అయ్యే అవకాశాలు ఉన్నాయి. ఈ సినిమాకు సురేష్ ప్రొడక్షన్స్‌ సహ నిర్మాణ సంస్థగా వ్యవహరించబోతుంది.
మరో వైపు నాగచైతన్య సినిమాల విషయానికి వస్తే గత ఏడాది కాలంగా చైతూ పూర్తిగా 'తండేల్‌' సినిమాపై ఫోకస్‌ పెట్టి ఉన్నాడు. విభిన్నమైన నేపథ్యంతో పాటు తనను తాను కొత్తగా చూపించే అవకాశం ఉండటంతో తండేల్‌ సినిమాలో నటించేందుకు కమిట్‌ అయినట్లుగా ఇంటర్వ్యూలో నాగ చైతన్య చెప్పుకొచ్చాడు. గతంలో మాజీ భార్యతో కలిసి నటించిన నాగ చైతన్య పెళ్లి తర్వాత శోభితతో కలిసి నటించాలని అభిమానులు కోరుకుంటున్నారు. మరి ఫ్యాన్స్ కోరిక మేరకు చైతూ, శోభిత కలిసి నటించేనా చూడాలి.