శ్రీలీల చేతికి కెరీర్ బిగ్గెస్ట్‌ ఆఫర్‌...!

తెలుగు ప్రేక్షకులకు కొత్త 'పెళ్లి సందడి' సినిమాతో పరిచయం అయిన ముద్దుగుమ్మ శ్రీలీల. తెలుగు మూలాలు ఉన్న ఈ అమ్మడు కన్నడ సినిమా ఇండస్ట్రీలో మొదటి ఎంట్రీ ఇచ్చింది. అక్కడ రెండు మూడు సినిమాల్లో నటించిన శ్రీలీల కు టాలీవుడ్ నుంచి రాఘవేంద్ర రావు రూపంలో పిలుపు వచ్చింది. మొదటి సినిమా నిరాశ పరిచిన ఆ తర్వాత వచ్చిన ఆఫర్లు, సక్సెస్ ల కారణంగా టాలీవుడ్‌ లో టాప్‌ స్టార్ హీరోయిన్ గా మారింది. ప్రస్తుతం టాలీవుడ్‌ లో రవితేజ తో ఒక సినిమా, పవన్ కు జోడీగా ఉస్తాద్‌ భగత్ సింగ్ సినిమాతో పాటు మరో రెండు సినిమాల్లో నటిస్తోంది. మరికొన్ని సినిమాలు చర్చల దశలో ఉన్నాయి.

టాలీవుడ్‌ లో బిజీ బిజీగా సినిమాలు చేస్తున్న శ్రీలీల మరో వైపు కోలీవుడ్‌, కన్నడ సినిమా ఇండస్ట్రీల్లో సినిమాలను చేసేందుకు ఆసక్తి చూపిస్తుంది. శ్రీలీల చేతిలో ప్రస్తుతం ఉన్న పెద్ద సినిమాలకు తోడు కెరీర్‌ లోనే అతి పెద్ద సినిమాను ఆమె కమిట్ అయిందనే వార్తలు వస్తున్నాయి. తమిళ్‌ సూపర్ స్టార్‌ అజిత్ కుమార్‌ తో ఒక సినిమాలో నటించే అవకాశం ఈ అమ్మడికి దక్కింది. ప్రస్తుతం అజిత్‌ నటిస్తున్న రెండు సినిమాలు విడా ముయార్చి, గుడ్‌ బ్యాడ్‌ అగ్లీ సినిమాలు సమాంతరంగా షూటింగ్‌ జరుగుతున్నాయి. ఆయనకు జోడీగా ఒక సినిమాలో శ్రీ లీలను నటింపజేసే ప్రయత్నాలు జరుగుతున్నాయని తమిళ మీడియాలో కథనాలు వస్తున్నాయి.

తమిళ్‌ లో శ్రీలీల మొదటి సినిమాతోనే ఏకంగా సూపర్‌ స్టార్‌ సినిమాలో నటించే అవకాశం రావడం గొప్ప విషయం. ఇప్పటి వరకు ఈ విషయమై ఎలాంటి అధికారిక ప్రకటన రాలేదు. అజిత్ మూవీ లో శ్రీలీల హీరోయిన్‌ గా నటించబోతుందా లేదంటే.. ఆయన సినిమాలో ఐటెం సాంగ్‌ ను ఏమైనా చేయనుందా అంటూ ఆసక్తిగా చర్చించుకుంటున్నారు. శ్రీలీల ఈ విషయాన్ని గురించి క్లారిటీ ఇచ్చే వరకు పుకార్లు షికార్లు చేస్తూనే ఉంటాయి. అజిత్‌ సినిమాలో కనీసం ఐటెం సాంగ్ లో కనిపించినా కోలీవుడ్‌ లో మంచి గుర్తింపు దక్కి, ఆ తర్వాత వరుసగా సినిమాల్లో నటించే అవకాశాలు ఉంటాయనే అభిప్రాయం వ్యక్తం అవుతోంది.

శ్రీలీల ఇప్పటి వరకు చేసిన సినిమాల్లో మహేష్ బాబు తో చేసిన గుంటూరు కారం పెద్ద మూవీ గా చెప్పుకోవచ్చు. అయితే ఆ సినిమా బాక్సాఫీస్ వద్ద బొక్క బోర్లా పడటంతో ఇప్పుడు ఆమె చేయబోతున్న అతి పెద్ద మూవీ అజిత్‌ తో అనే టాక్ వినిపిస్తుంది. ఈ మధ్య కాలంలో శ్రీలీల సినిమాల సంఖ్య కాస్త తగ్గించింది. గత ఏడాదితో పోల్చితే సినిమాలు ఎక్కువగా చేయడం లేదు అంటూ ఫ్యాన్స్ మాట్లాడుకుంటూ ఉన్నారు. అయినా రాబోయే ఏడాది కాలంలో శ్రీలీల నుంచి మూడు లేదా నాలుగు సినిమాలు ప్రేక్షకుల ముందుకు వచ్చే అవకాశాలు ఉన్నాయి. నెట్టింట శ్రీలీలకు ఉన్న ఫాలోయింగ్‌ నేపథ్యంలో ఆమెకు సంబంధించిన ప్రతి చిన్న విషయం, ఫోటో వైరల్‌ అవ్వడం కామన్‌ అయింది. ఇప్పుడు అదే తీరుతో అజిత్‌ తో మూవీ వార్తలు తెగ చక్కర్లు కొడుతున్నాయి. అసలు విషయం ఏంటనేది చూడాలి.