శ్రీకాంత్ ఓదెల కొత్త ప్రయోగం.. నిజమైన కథగా 'గులాబీ'

'దసరా' సినిమాతో తనదైన ముద్ర వేసిన దర్శకుడు శ్రీకాంత్ ఓదెల మరో కొత్త ప్రయోగానికి సిద్ధమయ్యాడు. ప్రస్తుతం నాని ప్రధాన పాత్రలో తెరకెక్కుతున్న 'ది ప్యారడైజ్' సినిమాను డైరెక్ట్ చేస్తూనే, ఆయన నిర్మాతగా అడుగుపెట్టాడు. ‘సమ్మక్క సారక్క క్రియేషన్స్’ పేరుతో ఓ కొత్త నిర్మాణ సంస్థను స్థాపించి, టాలెంటెడ్ టీం తో కలిసి కొత్త ప్రయత్నం చేస్తున్నాడు. ఈ ప్రాజెక్ట్‌ను ఆయనతో పాటు అనురాగ్ రెడ్డి, శరత్ చంద్రల 'చాయ్ బిస్కెట్ ఫిల్మ్స్' కలిసి నిర్మించనున్నాయి.

ఈ చిత్రానికి ‘అల్ అమీనా జారియా రుక్సానా'స్ గులాబీ’ అనే ఆసక్తికరమైన టైటిల్‌ను ఖరారు చేశారు. ఈ టైటిల్‌ను అనౌన్స్ చేయడానికి ఓ ఆసక్తికరమైన పోస్టర్‌ను కూడా విడుదల చేశారు. పోస్టర్‌లో నల్ల చీర కట్టిన ఓ యువతి సరిహద్దు ప్రాంతంలో నడుస్తూ ఉండగా, చుట్టూ ఎర్ర గులాబీలు కురుస్తున్నట్టు చూపించారు. ఈ మిస్టీరియస్ లుక్ సినిమా కథపై క్యూరియాసిటీని పెంచేలా ఉంది.

ఈ ప్రేమ కథ 2009లో జరిగిన నిజమైన సంఘటనల ఆధారంగా తెరకెక్కనుంది. గోదావరిఖని ప్రాంతంలో ఒక యువతి తాను ప్రేమించిన వ్యక్తిని ఎలా ప్రేమించిందో, ఆ ప్రేమ ఎంత తీవ్రంగా ఉంది అనే కోణంలో ఈ చిత్రం తెరకెక్కించనున్నారు. ఇది యధార్థ సంఘటనల ఆధారంగా రాసిన కథ కావడంతో, సినిమా ఎమోషనల్ కనెక్ట్ చాలా బలంగా ఉంటుందని అంటున్నారు.

ఈ సినిమాకు డైరెక్టర్‌గా చేతన్ బండి వ్యవహరిస్తున్నాడు. శ్రీకాంత్ ఓదెల కథను అందించడంతో పాటు నిర్మాణ బాధ్యతలు కూడా చూసుకుంటుండటంతో ఈ ప్రాజెక్ట్‌పై అంచనాలు పెరిగాయి. ఇప్పటికే ‘దసరా’ సినిమాతో తన కథన శైలిని నిరూపించుకున్న శ్రీకాంత్, ఇప్పుడు కొత్త కథతో మరో ఆసక్తికరమైన లవ్ స్టోరీకి బాహుళ్యాన్ని ఇచ్చినట్లు కనిపిస్తోంది.

ప్రస్తుతం ఈ సినిమా ప్రీ-ప్రొడక్షన్ దశలో ఉంది. టీమ్ రెగ్యులర్ షూటింగ్ ప్రారంభించడానికి సన్నాహాలు చేస్తోంది. త్వరలోనే ప్రధాన తారాగణం మరియు సాంకేతిక బృందం వివరాలను మేకర్స్ అధికారికంగా ప్రకటించనున్నారు. ఈ ప్రేమకథలో ఎలాంటి ఎమోషనల్ లేయర్స్ ఉంటాయో, అది ప్రేక్షకులను ఎంతవరకు ఆకట్టుకుంటుందో చూడాలి. కొత్త కథలతో ప్రేక్షకుల్ని మెప్పించడంలో ముందుండే చాయ్ బిస్కెట్ ఫిల్మ్స్, శ్రీకాంత్ ఓదెల నిర్మాణ భాగస్వామ్యం కావడంతో ఈ ప్రాజెక్ట్‌ పై భారీగా అంచనాలు ఉన్నాయి. ప్రత్యేకంగా గోదావరిఖని నేపథ్యంలో ఈ సినిమా ఉండబోతుందని, ఇందులో ప్రేమ, సంఘర్షణ, భావోద్వేగాలు ప్రధానంగా నడిపించబోతున్నాయని అంటున్నారు. మరి ఈ కథ ప్రేక్షకులను ఎంతవరకు ఆకట్టుకుంటుందో వేచి చూడాలి.