సూపర్ స్టార్ ముందే చేతులు ఎత్తేశాడా?

కోలీవుడ్‌ సూపర్‌ స్టార్ రజినీకాంత్ నటించిన చాలా సినిమాలు తమిళనాడుతో పాటు తెలుగు రాష్ట్రాల్లో కూడా భారీ వసూళ్లు నమోదు చేశాయి. రజినీకాంత్ నుంచి మంచి బొమ్మ పడాలే కానీ తెలుగు ప్రేక్షకులు వంద కోట్లు కట్టబెట్టేందుకు కూడా రెడీగా ఉంటారు.

ఆ మధ్య వచ్చిన జైలర్ సినిమాకు తెలుగు రాష్ట్రాల నుంచి సాలిడ్‌ వసూళ్లు దక్కినట్లుగా మేకర్స్ స్వయంగా ప్రకటించిన విషయం తెల్సిందే. అలాంటి తెలుగు రాష్ట్రాలను సూపర్‌ స్టార్‌ రజినీకాంత్‌ తాజా చిత్ర మేకర్స్‌ లైట్‌ తీసుకున్నారా అంటే... ఔను అనే సమాధానం చాలా మంది నుంచి వస్తుంది.

రజినీకాంత్‌ ముఖ్య పాత్రలో నటించిన లాల్ సలామ్ సినిమా ఫిబ్రవరి 9న ప్రేక్షకుల ముందుకు రాబోతుంది. తమిళ నాట ఈ సినిమాకు మంచి పబ్లిసిటీ చేస్తున్నారు. కానీ తెలుగు రాష్ట్రాల్లో మాత్రం సినిమాకు ఎక్కువ ప్రచారం చేయకపోవడం విడ్డూరంగా ఉంది. ఈగల్ సినిమాకు పోటీగా తక్కువ థియేటర్లలో లాల్ సలామ్ సినిమాను విడుదల చేయబోతున్నారు.

రజినీకాంత్‌ స్థాయి సినిమాకు దక్కాల్సిన థియేటర్లు దక్కకున్నా పర్వాలేదు అన్నట్లుగా అదే తేదీకి విడుదల చేయాలని నిర్ణయించుకున్నారు. లాల్ సలామ్‌ సినిమా అసలు విడుదల అవ్వబోతుందా లేదా అన్నట్లుగా ఇక్కడ పరిస్థితి ఉంది. ఇప్పటి వరకు కనీసం సోషల్‌ మీడియా ప్రమోషన్ కూడా షురూ అవ్వలేదు.

ఇక్కడ రిలీజ్ చేస్తున్న బయ్యర్లు కూడా మినిమం ప్రచారం మొదలు పెట్టలేదు. ఈ సినిమా తమిళ ఫ్లేవర్‌ కలిగి ఉంటుందని, తెలుగు ప్రేక్షకులకు ఈ సినిమా ఎక్కడం కష్టమే అనే అభిప్రాయంను కొందరు వ్యక్తం చేస్తున్నారు. అందుకే చిత్ర బృందం సినిమా ప్రమోషన్‌ విషయంలో ఆసక్తి చూపించడం లేదేమో అనే అనుమానాలు కలుగుతున్నాయి.

రజినీకాంత్‌ వంటి సూపర్‌ స్టార్‌ సినిమాను చూడాలని రెగ్యులర్‌ సినీ ప్రేమికులు కోరుకుంటూ ఉంటారు. అలాంటి వారికి కూడా నిరుత్సాహం కలిగించే విధంగా విడుదలకు ముందే సూపర్ స్టార్‌ చేతులు ఎత్తేశాడు అంటూ చాలా మంది అసహనం వ్యక్తం చేస్తున్నారు.