'గేమ్ ఛేంజర్' 'నానా హైరానా'.. అసలు గుట్టు విప్పిన థమన్

గేమ్ ఛేంజర్ సినిమా విడుదలకు ముందు నుంచే పాటలపై భారీ అంచనాలు నెలకొన్నాయి. అందులోనూ ‘నానా హైరానా’ అనే పాట చిత్రానికి ప్రధాన ఆకర్షణగా నిలుస్తుందని అభిమానులు భావించారు. అయితే సినిమా జనవరి 10న థియేటర్లలో విడుదల అయ్యేసరికి, ఈ పాట తప్పించబడటం ప్రేక్షకుల్లో సందేహాలకు కారణమైంది. విడుదల సందర్భంగా చిత్రబృందం టెక్నికల్ కారణాల వల్లే ఈ పాట తొలగించామని ప్రకటించారు.

ఈ పాటను ఇన్ఫ్రారెడ్ కెమెరా టెక్నాలజీతో చిత్రీకరించడంతో, దాని ప్రాసెసింగ్‌కు సమయం కావాలనే కారణంగా పాటను విడుదలకు ముందు తొలగించినట్లు వెల్లడించారు. అయితే జనవరి 14 తర్వాత ఈ పాటను చేర్చుతామని మొదట ప్రకటించినప్పటికీ, విడుదలైన వెంటనే వచ్చే నెగెటివ్ టాక్‌ను ఎదుర్కోవడంతో, మేకర్స్ ఈ పాటను రెండవ రోజే ప్రేక్షకుల ముందుకు తీసుకొచ్చింది.

పాటను వెంటనే చేర్చడంతో అభిమానులు, ప్రేక్షకులు అసలు కారణంపై అనుమానాలు వ్యక్తం చేశారు. టెక్నికల్ ఇష్యూలు కారణమైతే, రెండు రోజుల్లోనే పాటను ఎలా చేర్చగలిగారు? అని ప్రశ్నలు పెరిగాయి. ఈ నేపథ్యంలో, సంగీత దర్శకుడు తమన్ ఈ విషయంపై స్పష్టత ఇచ్చారు.

తమన్ మాట్లాడుతూ, ‘‘సినిమాలో రామ్ చరణ్, కియారా అద్వానీ మధ్య రొమాంటిక్ ట్రాక్ సరైన బలాన్ని సాధించలేకపోయింది. ఆ సందర్భంలో ‘నానా హైరానా’ పాట అనవసరంగా అనిపించింది. ఇదే పాటను రెండవ భాగంలో చేర్చితే కూడా నెరేషన్‌కు సరిపోకుండా ఉంటుందని భావించాము’’ అని వివరించారు.

తమన్ చెప్పిన వివరాల ప్రకారం, సినిమా ఫ్లోలో ఈ పాట పర్ఫెక్ట్ గా సెట్టవ్వదని భావించి, విడుదలకు ముందు దీనిని తొలగించేందుకు టీమ్ నిర్ణయం తీసుకున్నట్లు తెలుస్తోంది. కానీ, నెగటివ్ టాక్‌ను తగ్గించేందుకు పాటను తర్వాతి రోజే చేర్చినట్లు విశ్లేషకులు అభిప్రాయపడుతున్నారు. ఈ నిర్ణయం వల్ల గేమ్ ఛేంజర్ టాక్‌లో పెద్దగా మార్పు రాకపోయినా, ప్రేక్షకులు పాటను ఎంజాయ్ చేస్తుండడం విశేషం. తమన్ ఈ వివరణతో అభిమానుల్లో ఉన్న సందేహాలకు ఒక విధమైన సమాధానం ఇచ్చారని చెప్పవచ్చు.