ఓ ట్రెండ్ సెట్ చేసిన నాగ చైతన్య

సినిమా రంగంలో ఎప్పటికప్పుడు ట్రెండ్‌కు తగినట్లుగా ఎన్నో మార్పులు కనిపిస్తున్నాయి. ముఖ్యంగా ప్రమోషన్ విషయంలో ఇప్పటి ఫిల్మ్ మేకర్లు కొత్త పంథాలను ఫాలో అవుతున్నారు. కొందరైతే గతంలో ఎన్నడూ కనిపించని విధంగా వినూత్నమైన పద్దతులకు శ్రీకారం చుడుతున్నారు. ఇందులో భాగంగానే కొత్త కొత్త ఈవెంట్లను కూడా ప్లాన్ చేస్తున్నారు. ఇప్పుడు ఈ లిస్టులో చేరిపోయింది ‘తండేల్’ టీమ్.

యువ సామ్రాట్ అక్కినేని నాగ చైతన్య హీరోగా నటిస్తోన్న తాజా సినిమానే ‘తండేల్’. చందూ మొండేటి దర్శకత్వంలో రూపొందుతోన్న ఈ చిత్రం, సముద్రంలో చేపల వేట కోసం వెళ్లి పాకిస్థాన్‌లో జైలు శిక్ష అనుభవించిన శ్రీకాకుళం మత్స్యకారుడి నిజమైన కథ ఆధారంగా రాబోతుంది. ఈ మూవీ షూటింగ్‌లో భాగంగా వరుసగా షెడ్యూళ్లను జెట్ స్పీడ్ లో పూర్తి చేశారు.

గ్లింప్స్ వీడియో విడుదలైన ‘తండేల్’ సినిమాపై అంచనాలు మరింతగా పెరిగిపోయాయి. దీంతో ఈ చిత్రం గురించి ఎంతో మంది ఆసక్తిగా ఎదురు చూస్తున్నారు. ఇలాంటి పరిస్థితుల్లో ఈ మూవీ రిలీజ్ డేట్ గురించి ఎన్నో రకాల వార్తలు వైరల్ అయ్యాయి. ముందుగా దీన్ని క్రిస్టమస్‌కు తీసుకు వస్తారని టాక్ వచ్చింది. ఆ తర్వాత నాగ చైతన్య చిత్రం సంక్రాంతి బరిలో నిలుస్తుందని ప్రచారం జరిగింది.

అందరి అంచనాలను తలకిందులు చేస్తూ ‘తండేల్’ సినిమాను వచ్చే ఏడాది ఫిబ్రవరి 7వ తేదీన వరల్డ్ వైడ్‌గా గ్రాండ్‌గా రిలీజ్ చేస్తున్నట్లు అనౌన్స్ చేశారు. ఈ మేరకు స్పెషల్‌గా ఓ ఈవెంట్‌ను సైతం నిర్వహించారు. ఇందులో చిత్ర యూనిట్ పాల్గొని ఎన్నో అంశాలను వెల్లడించింది. ఇది పక్కన పెడితే నాగ చైతన్య సినిమా రిలీజ్ డేట్ అనౌన్స్‌మెంట్ ఈవెంట్‌తో కొత్త ట్రెండ్‌కు నాంది పలికినట్లైంది.

గతంలో ఆడియో రిలీజ్ ఫంక్షన్లు పెట్టేవారు. అయితే, అల్లు అర్జున్ నటించిన ‘సరైనోడు’ చిత్రంతో ప్రీ రిలీజ్ ఈవెంట్‌ను పరిచయం చేశారు. ఇప్పుడు అదే బ్యానర్‌లో రాబోతున్న ‘తండేల్’ మూవీ యూనిట్ మరింత కొత్తగా ఆలోచించి రిలీజ్ డేట్ అనౌన్స్‌మెంట్ ఫంక్షన్ చేసింది. రాబోయే రోజుల్లో చాలా మంది హీరోలు నాగ చైతన్యను ఫాలో అవుతారు అనడంలో ఏమాత్రం సందేహం లేదు.

ఇక, నాగ చైతన్య హీరోగా చందూ మొండేటి డైరెక్షన్ చేస్తున్న ‘తండేల్’ చిత్రాన్ని గీతా ఆర్ట్స్ బ్యానర్‌లో అల్లు అరవింద్ సమర్పణలో బన్నీ వాసు నిర్మిస్తున్నారు. ఈ సినిమాకు దేవీ శ్రీ ప్రసాద్ సంగీతాన్ని అందిస్తున్నాడు. ఇందులో నేచురల్ బ్యూటీ సాయి పల్లవి హీరోయిన్‌గా చేస్తున్న విషయం తెలిసిందే.