స్టార్ కిడ్స్‌తో ఎపిసోడ్‌.. క‌ర‌ణ్ ర‌క్తి క‌ట్టిస్తాడ‌ట‌..

జోయా అక్తర్ దర్శకత్వం వ‌హించిన 'ది ఆర్చీస్'తో ముగ్గురు న‌ట‌వార‌సులు వెండితెర‌కు ప‌రిచ‌య‌మ‌వుతున్న సంగ‌తి తెలిసిందే. బాలీవుడ్ లో ప్ర‌భావవంత‌మైన కుటుంబాల నుంచి కిడ్స్ ని ప‌రిచ‌యం చేస్తున్నందుకు జోయా క్లౌడ్ నైన్ లో ఉన్నారు. త్వ‌ర‌లో ఈ సినిమా నెట్ ఫ్లిక్స్ లో విడుద‌ల‌కు సిద్ధ‌మ‌వుతోంది. ప్రతిభావంతులైన కొత్త వ్యక్తులను పరిచయం చేయడం ఆనందాన్నిస్తుంద‌ని ఈ సంద‌ర్భంగా జోయా అన్నారు. కింగ్ ఖాన్ న‌ట‌వార‌సురాలు సుహానా ఖాన్ -శ్రీ‌దేవి న‌ట‌వార‌సురాలు ఖుషీ కపూర్ .. బిగ్ బి ఫ్యామిలీ నుంచి అగస్త్య నంద స‌హా ప‌లువురు ది ఆర్చీస్ చిత్రంతో వెండితెర‌కు ప‌రిచ‌య‌మ‌వుతున్నారు. ఇటీవ‌లే ఈ సినిమా నుంచి న‌టీన‌టుల కొత్త లుక్ లు విడుద‌ల కాగా అంత‌ర్జాలంలో వైర‌ల్ గా మారాయి.

న‌ట‌వార‌సుల మెరుపులు ఉరుములు ఏ రేంజులో ఉండ‌బోతున్నాయో చూడాల‌ని అభిమానులు ఉత్కంఠ‌గా వేచి చూస్తున్నారు. ఇంత‌లోనే కరణ్ జోహార్ - కాఫీ విత్ కరణ్ కొత్త‌ సీజన్‌లో ఈ న‌ట‌వార‌సుల‌ను అంద‌రికీ ప‌రిచ‌యం చేయ‌బోతున్నారు. సుహానా, ఖుషీ, అగస్త్య వారి సినిమా విడుదలకు ముందు ఒక ఎపిసోడ్ కోసం షూటింగ్ లో పాల్గొన్నార‌ని తెలిసింది. కాఫీ విత్ కరణ్ 8లో ది ఆర్చీస్‌కి చెందిన సుహానా ఖాన్, ఖుషీ కపూర్, అగస్త్య నందా కనిపిస్తార‌ని స‌న్నిహిత సోర్స్ వెల్ల‌డించింది. ''కొన్నాళ్లుగా త‌మ‌ తల్లిదండ్రులను కాఫీ విత్ క‌ర‌ణ్ లో చూసిన తర్వాత ఇప్పుడు, సుహానా, ఖుషీ, అగస్త్య తమ కాఫీ విత్ కరణ్ అరంగేట్రానికి నిజంగా ఉత్సాహంగా ఉన్నారు. ఇది ఆర్చీస్‌కు ప్రచార కార్యక్రమంలా ఉంటుందన‌డంలో సందేహం లేదు.

ది ఆర్చీస్ లో న‌టించిన డాట్, వేదంగ్ రైనా, మిహిర్ అహుజా, యువరాజ్ మెండా కూడా ఆ ముగ్గురు న‌ట‌వార‌సుల‌తో పాటు కాఫీ విత్ క‌ర‌ణ్ 8 ఎపిసోడ్‌లో కనిపించవచ్చని కూడా సోర్స్ పేర్కొంది. ఎపిసోడ్ గురించి మరిన్ని వివరాలను వెల్లడిస్తూ- “ఈ ఎపిసోడ్ లో ఎక్కువగా ఆ ముగ్గురు స్టార్ కిడ్స్ లైఫ్ జ‌ర్నీ, ఎదుగుదల, సినీ అరంగేట్రం.. సినిమా వంశం ఉన్న కుటుంబాలలో జన్మించిన వారిగా స్వీయానుభవంపై లోతుగా వివ‌రాల్ని వెల్ల‌డిస్తుంద‌ని తెలుస్తోంది. కరణ్ వారిని చిన్నప్పటి నుండే చూశారు. షోలో వారిని హోస్ట్ చేస్తున్నందుకు అతడు చాలా సంతోషిస్తున్నాడు. ప్రేక్షకులకు క‌చ్ఛితంగా న‌చ్చే కాఫీని అందిస్తాన‌ని ధీమాగా ఉన్నాడు... అని తెలిసింది. అయితే దీనిని క‌ర‌ణ్ అధికారికంగా ధృవీక‌రించాల్సి ఉంది.

ఆర్చీస్ గురించి...

స్నేహం, స్వేచ్ఛ, ప్రేమ, హార్ట్ బ్రేక్, తిరుగుబాటు గురించిన క‌థాంశంతో 'ది ఆర్చీస్' ఆద్యంతం ర‌క్తి క‌ట్టించనుంది. ఈ సినిమా ఒక మ్యూజికల్ ఫీస్ట్ కానుంది. డిసెంబర్ 7న OTT ప్లాట్‌ఫారమ్ నెట్‌ఫ్లిక్స్ లో స్ట్రీమింగ్ అవుతుంది.