పోటీపై బాలయ్య అలా.. రవితేజ ఇలా!

ఈ దసరాకు టాలీవుడ్ బాక్సాఫీస్ ముందు త్రిముఖ పోరు నెలకొన్న సంగతి తెలిసిందే. మరో మూడు నాలుగు రోజుల్లో బాలకృష్ణ భగవంత్ కేసరి, రవితేజ టైగర్ నాగేశ్వరరావు, దళపతి విజయ్ లియో ప్రేక్షకులను అలరించేందుకు థియేటర్లలో విడుదల కానున్నాయి. అయితే ఈ పోటీపై బాలయ్య - రవితేజ తమ అభిప్రాయాలను వ్యక్తం చేశారు. మాస్​ మాహారాజ్ ఒకలా మాట్లాడితే.. నటసింహం మరోలా మాట్లాడటం ప్రస్తుతం కాస్త చర్చనీయాశంమైంది.

వివరాళ్లోకి వెళితే... లియో సినిమా గురించి కాస్త పక్కనపెడితే.. టాలీవుడ్​లో భగవంత్ కేసరి - టైగర్ నాగేశ్వరరావు మధ్య గట్టి పోటీ నెలకొంది. ఒక్కరోజు గ్యాప్​లో రెండు చిత్రాలు రిలీజ్ కానున్నాయి. దీంతో ఇరు చిత్రబృందాలు ప్రమోషన్స్​ జోరుగా చేస్తున్నాయి. వరుస అప్డేట్స్​, ఈవెంట్లు, ప్రెస్ మీట్లు, ఇంటర్వ్యూలు నిర్వహిస్తున్నాయి.

తాజాగా టైగర్ నాగేశ్వరరావు ప్రీ రిలీజ్ ఈవెంట్​ జరుపుకుంది. ఈ సందర్భంగా సినిమాకు సంబంధించి అలాగే ఇతర కొన్ని విషయాలను గురించి రవితేజ మాట్లాడారు. తన సినిమాతో పాటు విడుదలవుతున్న ఇతర సినిమాలకు ఆల్​ ది బెస్ట్ చెప్పారు. "నా బ్రదర్ లాంటి డైరెక్టర్​ అనిల్ రావిపూడి సినిమా, మా బాలయ్య బాబు సినిమా భగవంత్ కేసరి కూడా రిలీజ్​ అవుతోంది. రెండు సినిమాలు సూపర్​ హిట్​ అవ్వాలని మనస్ఫూర్తిగా కోరుకుంటున్నాను. అదే సమయంలో విజయ్ లియో కూడా మంచి విజయాన్ని అందుకోవాలని మనస్ఫూర్తిగా ఆశిస్తున్నాను." అని పేర్కొన్నారు.

అంతకుముందు బాలయ్య పోటీ గురించి ప్రెస్​ మీట్​లో మాట్లాడుతూ.. "ఛాలెంజ్​ పోటీ లేనిదే ఏ రంగంలోనూ ఫలితాలు ఆశాజనకంగా ఉండవు. అయినా మాకు మేమే పోటీ. నాకు ఎవరూ పోటీ లేరు. ఎవరినీ పట్టించుకోను. నా సినిమాలు నాకే పోటీ." అని చెప్పారు. ప్రస్తుతం ఈ ఇద్దరు మాట్లాడిన కామెంట్స్ వైరల్​గా మారాయి.

రవితేజ మాట్లాడిన కామెంట్స్​ పాజిటివ్​ వైబ్​లో ఉన్నప్పటికీ.. బాలయ్య కామెంట్స్​ కొంతమందికి కాస్త గట్టిగా అనిపించాయి! కానీ ఆయన సందర్భానికి తగ్గట్టుగా పాజిటివ్​ వేలోనే మాట్లాడారని, తన సినిమా తనకే పోటీ అనే అన్నారు కానీ, ఎవరినీ కించపరచలేదని మరికొంతమంది అభిప్రాయాన్ని వ్యక్తం చేస్తున్నారు. కాగా, గతంలో వీరిద్దరు అన్​స్టాపబుల్​లో కలిసి ఎంత సరదాగా మాట్లాడుకున్నారో తెలిసిన విషయమే. ఇద్దరి మధ్య మంచి అనుబంధమే ఉంది. కాబట్టి బాలయ్య కామెంట్స్​లో తప్పు బట్టడానికి ఎలాంటి ఆస్కారం లేదనే చెప్పాలి.