చిరు హీరోయిన్ పై కన్నేసిన వెంకీమామ?

సౌత్ లో సూపర్ సీనియర్ హీరోలందరికీ స్టార్ హీరోయిన్ త్రిష కృషన్ ఫస్ట్ ఛాయిస్ గా మారిపోయింది. నిన్న మొన్నటి వరకూ కుర్ర భామలతో రొమాన్స్ చేయడానికి ఆసక్తి కనబర్చిన 50+ హీరోలు.. ఇప్పుడు తమ ఏజ్ కు తగ్గట్లుగా జోడీలని సెట్ చేసుకోవాలని చూస్తున్నారు. త్రిష మళ్లీ ఫార్మ్ లోకి వచ్చిన తర్వాత, అందరూ ఆమె వైపే మొగ్గు చూపుతున్నారు. తమిళ ముదురు హీరోలే కాదు, టాలీవుడ్ సీనియర్లు కూడా త్రిషనే కావాలని అంటున్నారు.

మెగాస్టార్ చిరంజీవి హీరోగా ''విశ్వంభర'' అనే సినిమా తెరకెక్కుతోన్న సంగతి తెలిసిందే. బింబిసార ఫేమ్ మల్లిడి వశిష్ఠ ఈ చిత్రానికి దర్శకత్వం వహిస్తున్నారు. సోషియో ఫాంటసీ అడ్వెంచర్ కథాంశంతో రూపొందుతున్న ఈ సినిమాలో త్రిషను హీరోయిన్ గా తీసుకున్నారు. 2006 లో వచ్చిన 'స్టాలిన్' మూవీలో చిరుకు జోడీగా నటించిన ఈ బ్యూటీ.. దాదాపు 18 ఏళ్ల తర్వాత మళ్లీ జత కట్టడానికి రెడీ అయ్యింది. అయితే ఈ సినిమా షూటింగ్ లో జాయిన్ అవ్వకముందే అమ్మడు మరో తెలుగు ఆఫర్ అందుకున్నట్లు టాక్ వినిపిస్తోంది.

విక్టరీ వెంకటేష్, డైరెక్టర్ అనిల్ రావిపూడి సక్సెస్ ఫుల్ కాంబినేషన్ లో మరో మూవీ రానుందని గత కొన్ని రోజులుగా వార్తలు వస్తున్నాయి. F 2 & F 3 సినిమాలతో అలరించిన తర్వాత, వీరిద్దరూ కలిసి దిల్ రాజు బ్యానర్ లో హ్యాట్రిక్ మూవీ చేస్తున్నట్లు తెలుస్తోంది. ఇది విలేజ్ బ్యాక్ డ్రాప్ లో ఉండే ఫ్యామిలీ ఎంటర్టైనర్ అని, కథ దాదాపుగా సిద్ధమైనట్లే అని టాక్ వినిపిస్తోంది. అయితే ఈ సినిమాలో వెంకీకి జోడీగా త్రిషను ఎంపిక చేసే అవకాశం వుందని అంటున్నారు.

టాలీవుడ్ లో మోస్ట్ సక్సెస్ ఫుల్ పెయిర్ గా వెంకటేశ్ - త్రిష జోడీకి పేరుంది. వీరిద్దరూ తొలిసారిగా 2007లో 'ఆడవారి మాటలకు అర్థాలే వేరులే' సినిమాలో కలిసి నటించారు. 2010లో 'నమో వెంకటేశ' చిత్రంలో అలరించారు. ఆ తర్వాత 2012లో 'బాడీ గార్డ్' మూవీలో నటించి హ్యాట్రిక్ విజయాలను తమ ఖాతాలో వేసుకున్నారు. పుష్కర కాలం తరువాత వెంకీ - త్రిషలు మరోసారి జతకట్టబోతున్నారని సినీ వర్గాలు చెబుతున్నాయి. అయితే దీనికి సంబంధించి అధికారిక ధృవీకరణ రావాల్సి ఉంది.

2002 లో 'మౌనం పేసియాధే' అనే తమిళ్ సినిమాతో హీరోయిన్ గా పరిచయమైన త్రిష కృష్ణన్.. అనతి కాలంలోనే స్టార్ స్టేటస్ సాధించింది. రెండు దశాబ్దాలుగా తెలుగు, తమిళ సినిమాల్లో రాణిస్తోంది. 40 ఏళ్ల వయసులోనూ వరుస ఆఫర్స్ అందుకుంటూ, యంగ్ హీరోయిన్లకు గట్టి పోటీనిస్తోంది. గతేడాది 'పొన్నియన్ సెల్వన్ 2', 'ది రోడ్', 'లియో' చిత్రాల్లో నటించిన ఈ బ్యూటీ.. ప్రస్తుతం 'రామ్ పార్ట్ 1', 'విదా మయార్చి' 'థగ్ లైఫ్' 'ఐడెంటిటీ' వంటి సినిమాల్లో నటిస్తోంది. దాదాపు 8 ఏళ్ల తర్వాత 'విశ్వంభర' చిత్రంతో తెలుగులోకి రీఎంట్రీ ఇస్తోంది. ఇదే క్రమంలో వెంకీకి జోడీగా చేస్తుందా లేదా అనే దానిపై త్వరలో క్లారిటీ రానుంది.