మాలీవుడ్‌లో కాస్టింగ్ కౌచ్ ఉంది.. FEFKA ప్ర‌ధాన కార్య‌ద‌ర్శి
హేమ కమిటీ నివేదిక వెలువ‌డిన అనంత‌రం మాలీవుడ్ లో లైంగిక వేధింపుల గురించి దేశ‌వ్యాప్తంగా చ‌ర్చ సాగుతోంది.
హేమ కమిటీ నివేదిక వెలువ‌డిన అనంత‌రం మాలీవుడ్ లో లైంగిక వేధింపుల గురించి దేశ‌వ్యాప్తంగా చ‌ర్చ సాగుతోంది. ఇలాంటి స‌మ‌యంలో ఇక్క‌డ వేధింపులు నిజ‌మేన‌ని ఇండ‌స్ట్రీ కీల‌క వ్య‌క్తి వ్యాఖ్యానించారు. ఫిలిం ఎంప్లాయీస్ ఫెడరేషన్ ఆఫ్ కేరళ (ఫెఫ్కా) డైరెక్టర్ అండ్ జనరల్ సెక్రటరీ బి ఉన్నికృష్ణన్ ఒక ఇంటర్వ్యూలో జస్టిస్ కె హేమ కమిటీ నివేదికలోని అంశాలను స్ప‌ర్శిస్తూ...ప్ర‌ఖ్యాత `మాతృభూమి ప‌త్రిక`తో సంభాషణ సందర్భంగా, మలయాళ చిత్ర పరిశ్రమలో కాస్టింగ్ కౌచ్ ఉందని ఒప్పుకున్నారు. అయితే ఇక్క‌డ `ప‌వ‌ర్ గ్రూప్స్` అనేవి ఉండ‌వ‌ని అన్నారు. హేమ కమిటీ కొంద‌రి నియంత్ర‌ణ‌లో ప‌రిశ్ర‌మ ఉంద‌న్న దానిని అత‌డు ఖండించారు.
న‌టీనటులు ద‌ర్శ‌క‌నిర్మాత‌లు సాంకేతిక నిపుణుల‌తో రెగ్యుల‌ర్ గా అనేక ప్రాజెక్ట్‌లలో కలిసి పని చేస్తారు. సహజంగానే ప్రతి ఒక్కరూ అవకాశాలను పొందడానికి ఒక‌రితో ఒక‌రు తమను తాము సర్దుబాటు చేసుకోవడానికి ప్రయత్నిస్తారు. అయితే ఇటువంటి పొత్తులు వాణిజ్య ప్రయోజనాలపై ఆధారపడి ఉంటాయి. అయితే ఎవరిని ఒంటరిగా పిల‌వాలో నిర్ణయించే రహస్య లాబీ ఉండదు.. అలా సినీపరిశ్రమ పనిచేయదు``అని ఆయన అన్నారు.
ఇలాంటి పొత్తులు (క‌మిట్‌మెంట్లు) కేవలం మలయాళ చిత్ర పరిశ్రమకే పరిమితం కాలేదని ఆయన పేర్కొన్నారు. మాలీవుడ్‌లో కాస్టింగ్ కౌచ్ ఉనికిని కొట్టిపారేయడం అంటే `వాస్తవాన్ని తిరస్కరించడమే`న‌ని ఉన్నికృష్ణన్ అన్నారు. మలయాళ చిత్రసీమలో కాస్టింగ్ కౌచ్ ఉదంతాలు చాలాసార్లు చూశాం.. విన్నాం. ఈ సమస్య ప్రతి పరిశ్రమలోనూ ఉంటుంది. మలయాళ చిత్రసీమలో ఈ పద్ధతికి వ్యతిరేకంగా మనం ఉద్యమించాలి. మేము పరిపూర్ణమైన, ఆదర్శధామ భవిష్యత్తును కోరుకుంటున్నా దానిని సాధించడం స‌వాళ్ల‌తో కూడుకున్నది అని వ్యాఖ్యానించారు. ఫెఫ్కాలో కొంద‌రు స‌భ్యుల‌తో ఉన్నికృష్ణన్ వివాదాలు ఇటీవ‌ల చ‌ర్చ‌కు వ‌చ్చాయి.