ఇష్క్ కాంబో.. ప్లాన్ మారింది

విక్రమ్ కె కుమార్ పేరు వినగానే డిఫరెంట్ కంటెంట్ ఉన్న సినిమాలు గుర్తుకు వస్తాయి. '13B', 'మనం', '24' వంటి క్రియేటివ్ మరియు వినూత్న సినిమాలతో ఆయన తనకంటూ ప్రత్యేకమైన ఫ్యాన్‌బేస్ ఏర్పరుచుకున్నారు. విక్రమ్ కె కుమార్ ఇటీవల నాగ చైతన్య ప్రధాన పాత్రలో నటించిన ‘ధూత’ అనే వెబ్ సిరీస్ ద్వారా ఓటీటీ ప్రేక్షకులను ఆకట్టుకున్నారు. ఈ సిరీస్‌కు మంచి స్పందన వచ్చింది.

ఇప్పటికే విక్రమ్ కె కుమార్ తన తదుపరి ప్రాజెక్ట్‌ను హీరో నితిన్‌తో చేయబోతున్నట్లు వార్తలు వచ్చాయి. ఈ సినిమాని ‘హనుమాన్’ ఫేమ్ నిర్మాత నిరంజన్ రెడ్డి నిర్మించనున్నారు అని టాక్ వచ్చింది. అయితే, తాజా సమాచారం ప్రకారం నిరంజన్ రెడ్డి ఈ ప్రాజెక్ట్ నుండి తప్పుకున్నారని తెలుస్తోంది. దీనికి కారణాలపై స్పష్టత లేకపోయినా, ప్రాజెక్ట్‌కు న్యాయం చేయడానికి ఇది సరైన నిర్ణయమనే అభిప్రాయాలు వినిపిస్తున్నాయి.

ఈ క్రమంలో ఇప్పుడు సినీ వర్గాలలో వినిపిస్తున్న తాజా వార్త ఏమిటంటే, ఈ ప్రాజెక్ట్‌ని యూవీ క్రియేషన్స్ నిర్మించబోతుందట. ఇది భారీ బడ్జెట్ తో రూపొందనుందని సమాచారం. యూవీ క్రియేషన్స్ తరపున ఇంకా అధికారిక ప్రకటన రావాల్సి ఉంది, ప్రస్తుతం ఈ వార్త ఫిల్మ్ సర్కిల్స్‌లో వైరల్ అవుతోంది. యూవీ క్రియేషన్స్ వంటి ప్రాముఖ్యమైన నిర్మాణ సంస్థ ఈ ప్రాజెక్ట్ కి తోడైతే, సినిమా మాసివ్ లెవెల్‌లో తెరకెక్కబోతోందని సినీ అభిమానులు భావిస్తున్నారు.

నితిన్, విక్రమ్ కె కుమార్ కాంబినేషన్ గతంలో 'ఇష్క్' సినిమా కోసం కలిసి వర్క్ చేసిన విషయం తెలిసిందే. ఆ సినిమా నితిన్‌కు మంచి విజయాన్ని అందించింది, ఎందుకంటే ఆ అంతకుముందు వరుస ఫ్లాప్స్ ఎదుర్కొన్న నితిన్ ఒక్కసారిగా ‘ఇష్క్’ విజయంతో కెరీర్‌లో కొత్త మలుపు తిరిగింది. ఇప్పుడు అదే కాంబినేషన్ మరోసారి ప్రేక్షకులను అలరించబోతుందని వార్తలు వస్తున్నాయి.

నితిన్ ప్రస్తుతం వేణు శ్రీరామ్ దర్శకత్వంలో ‘తమ్ముడు’ సినిమాతో బిజీగా ఉన్నాడు. ఈ ప్రాజెక్ట్ షూటింగ్ పూర్తయిన తర్వాత విక్రమ్ కె కుమార్ ప్రాజెక్ట్ మీద ఫోకస్ పెట్టబోతున్నాడు. ఇకపోతే, విక్రమ్ కె కుమార్ వినూత్న కథాంశాల్ని ఎంచుకోవడంలో దిట్ట కావడంతో, ఈ ప్రాజెక్ట్‌పై కూడా భారీ అంచనాలు నెలకొన్నాయి. మొత్తానికి, విక్రమ్ కె కుమార్, నితిన్ కాంబినేషన్ మళ్లీ రిపీట్ అవుతుందనేది చాలా ఆసక్తికరమైన విషయం. మరి ఈ సారి దర్శకుడు ఎలాంటి కథతో మెప్పిస్తాడో చూడాలి.