నా సినిమాలను ఫ్యాన్స్ ఎందుకు సపోర్ట్‌ చేయడం లేదు?
విన్నర్ గా నిలువకున్నా కూడా సోహెల్ కి బిగ్ బాస్ విజేత కంటే కూడా ఎక్కువ గుర్తింపు మరియు గౌరవం తెచ్చి పెట్టింది అనడంలో సందేహం లేదు.
తెలుగు బిగ్ బాస్ సీజన్‌ 4 తో పాపులారిటీ సొంతం చేసుకున్న నటుడు సోహెల్. బిగ్ బాస్ లో ఉన్న సమయంలో మంచి పాపులారిటీని సొంతం చేసుకున్నాడు. విన్నర్ గా నిలువకున్నా కూడా సోహెల్ కి బిగ్ బాస్ విజేత కంటే కూడా ఎక్కువ గుర్తింపు మరియు గౌరవం తెచ్చి పెట్టింది అనడంలో సందేహం లేదు.
బిగ్ బాస్ ముందు వరకు బుల్లి తెరకు పరిమితం అయిన సోహెల్ ఆ తర్వాత వెండి తెరపై అరంగేట్రం చేశాడు. మిస్టర్‌ ప్రెగ్నెంట్‌, ఆర్గానిక్‌ మామా హైబ్రిడ్‌ అల్లుడు ఇంకా లక్కీ లక్ష్మణ్‌ వంటి సినిమాలు నటించాడు. ఆ సినిమాలకు పాజిటివ్ టాక్‌ వచ్చినా కూడా పెద్దగా వసూళ్లు రాలేదు అంటూ సోహెల్ గతంలోనే పేర్కొన్నాడు.
తాజాగా బూట్‌కట్‌ బాలరాజు చిత్రంతో ప్రేక్షకుల ముందుకు వచ్చాడు. ఆ సినిమాకు ప్రేక్షకుల నుంచి స్పందన ఆశించిన స్థాయిలో రాకపోవడంతో సోహెల్ కన్నీళ్లు పెట్టుకున్నాడు. ఫ్యామిలీ తో చూసే సినిమాలు తీయమంటారు. తీస్తే థియేటర్లకు రావడం లేదు అంటూ సోహెల్ ఆవేదన వ్యక్తం చేశాడు.
బిగ్ బాస్ లో ఉన్నప్పుడు సోహెల్ సోహెల్ అన్నారు.. ఇప్పుడు ఎందుకు నా సినిమాలు చూసేందుకు మీరు మీ ఫ్యామిలీస్‌ తో థియేటర్లకు రావడం లేదు అంటూ సోహెల్ ప్రశ్నించాడు. నా సినిమాలను ఫ్యాన్స్ ఎందుకు సపోర్ట్‌ చేయడం లేదు? అంటూ ఆవేదనతో ప్రశ్నించాడు.
ఈ రోజుల్లో క్లీన్ ఫ్యామిలీ సినిమాలు చేయడం లేదని చాలా మంది విమర్శిస్తున్నారు. మరి ఇప్పుడు క్లీన్ ఫ్యామిలీ సినిమా తీసినా కూడా ఎందుకు ఫ్యామిలీతో కలిసి రావడం లేదు అంటూ సోహెల్ కన్నీళ్లు పెట్టుకున్నాడు. సోహెల్ కన్నీళ్లు పెట్టుకున్న వీడియో ప్రస్తుతం సోషల్ మీడియాలో వైరల్ అవుతోంది.
బూట్‌ కట్‌ బాలరాజు సినిమాకు పాజిటివ్ టాక్‌ వచ్చిందని.. శని, ఆది వారాల్లో సినిమా కు మంచి కలెక్షన్స్ ఉంటాయని ఆయన సన్నిహితులు ఆయన్ను ఓదార్చడం వీడియో లో చూడవచ్చు. మొత్తానికి సోహెల్ కన్నీళ్లతో అయినా బూట్‌ కట్‌ బాలరాజు టికెట్లు తెగేనా చూడాలి.