ప్రంపచాన్ని మళ్లీ ముంచబోతున్న చైనా.. ఈసారి మరో భయంకర వైరస్ తో

నాలుగున్నరేళ్లయింది కొవిడ్ వైరస్ వ్యాప్తి మొదలై.. 10 లక్షలమందిపైగా ప్రాణాలు కోల్పోయారు. కొన్ని దేశాలు ఇప్పటికీ కోలుకోలేదు.. మరికొన్ని దేశాలయితే భయంతో వణికిపోయాయి. అమ్మానాన్నలనే కాదు.. ఆప్తులను కోల్పోయిన వారు ఎందరో..? ఇప్పటికీ కొవిడ్ పేరు చెబితే వెన్నులో వణుకు పుడుతోంది. కానీ, ఆ వైరస్ ఎక్కడినుంచి వచ్చిందో ఎవరికీ స్పష్టంగా తెలియదు. అందరూ అనుకునేది మాత్రం చైనాలో పుట్టిందని. అమెరికాకు అప్పట్లో అధ్యక్షుడిగా ఉన్న డొనాల్డ్ ట్రంప్ అయితే నేరుగా చైనా వైరస్ అనే సంబోధించారు. కానీ, చైనా మాత్రం ఆ మాటంటే ఒప్పుకోవడం లేదు. కాగా, చైనా మరోసారి ప్రాణాంతక వైరస్ ను తయారుచేసిందనే కథనాలు వస్తున్నాయి.

దాదాపు పదేల్ల కిందట ప్రపంచాన్ని భయపెట్టిన ఎబోలా పేరు పెద్దగా తెలిసి ఉండదు. అయితే, ఆఫ్రికా దేశాల్లో వేలమందిని బలితీసుకుందీ వైరస్. మిగతా ప్రపంచానికి పాకలేదు. కాగా, చైనాలోని హెబీ వైద్య విశ్వవిద్యాలయ శాస్త్రవేత్తలు ఎబోలా తరహాలోని మరో కొత్త వైరస్‌ పుట్టించారని, దాని మాదిరిగానే ఇది చాలా ప్రమాదకరమైనదనే విశ్లేషణలు వస్తున్నాయి.

మూడు రోజుల్లోనే మరణం..

హెబీ వర్సిటీ శాస్త్రవేత్తలు రూపొందించిన వైరస్.. మనిషిని మూడు రోజుల్లోనే చంపేస్తుందనే కథనాలు వినిపిస్తున్నాయి. కాగా, వ్యాధికారక ప్రభావాలను అధ్యయనం చేసేందుకే శాస్త్రవేత్తలు ఈ వైరస్ ను సృష్టించారు. అయితే దాని ప్రయోజనాలు, ప్రమాదాలపై సర్వత్రా చర్చ జరుగుతోంది. అంతేగాక.. వైరస్ స్వభావం సింథటిక్ అని తెలుస్తోంది. అన్నిటికి మించి ఎబోలా వైరస్‌ ను ఉపయోగించి సృష్టించిన ఈ కొత్త వైరస్‌ పై చేస్తున్న పరిశోధన వివాదాస్పదంగా మారింది. వివిధ వ్యాధులను నివారించడం, లక్షణాలను పరిశోధించడమే తమ రిసెర్చి లక్ష్యం అని సైంటిస్టులు చెబుతున్నారు. ఈ వైరస్‌ వ్యక్తుల శరీరంపై ఎబోలా తరహాలోనే ప్రభావం చూపుతుంది. పరిశోధకుల బృందం ఎబోలా నుంచి గ్లైకో ప్రొటీన్ (జీపీ)ను స్వీకరించేందుకు వెసిక్యులర్ స్టోమాటిటిస్ వైరస్ (వీఎస్‌వీ)ని ఉపయోగించింది. కాగా, కొత్త వైరస్‌ ను శాస్త్రవేత్తలు సిరియన్ చిట్టెలుకలపై పరీక్షించారు. వాటికి ఇంజెక్ట్ చేయగా, ఎబోలా లాంటి లక్షణాలు కనిపించాయి. మూడు రోజుల్లోనే చనిపోయాయి. ఆప్టిక్ నరాలపై తీవ్రమైన ప్రభావంతో కొన్నిటి కళ్లు దెబ్బతిన్నాయి.