ఇండియాలో టాటా, మహీంద్రాలను 'టెస్లా' దాటేయగలదా?

ఇండియన్స్ కు ఏం కావాలో.. ఎలాంటి అభిరుచి ఉండాలో ఇండియన్స్ కు మించి ఎవరికీ తెలియదు.. ఇక్కడ పుట్టి పెరిగాం కాబట్టి మన ఆలోచనధోరణి ఎలా ఉంటుందో మన వ్యాపార వర్గాలకు బాగా తెలుసు. అందుకే విదేశీయులైనా సరే భారత సంప్రదాయ పద్ధతులనే ఫాలో అవుతూ ఇక్కడ సక్సెస్ అవుతున్నారు. ఇండియాలో ఇండియన్ బ్రాండ్స్ నే చాలా రోజులుగా పాపులర్ గా ఉన్నాయి. ఇప్పుడు ఇండియన్ బ్రాండ్స్ ను సవాల్ చేసేలా కార్ల పరిశ్రమలో టెస్లా కార్స్ వస్తున్నాయి. పూర్తి ఎలక్ట్రిక్ కార్లు అయినా ఈ టెస్లాకు ఇండియాలో సక్సెస్ సాధ్యమేనా? అన్న దానిపై ప్రముఖ పారిశ్రామికవేత్త సజ్జన్ జిందాల్ చేసిన కామెంట్స్ చర్చనీయాంశమయ్యాయి.

భారతదేశంలో టెస్లా విజయాన్ని సాధించడం చాలా కష్టమని JSW గ్రూప్ చైర్మన్ సజ్జన్ జిందాల్ అభిప్రాయపడ్డారు. దేశీయంగా టాటా, మహీంద్రా వంటి సంస్థలు ఇప్పటికే ఎలక్ట్రిక్ వాహన రంగంలో గట్టిగా స్థిరపడ్డాయని, ఇక్కడ ఎలాన్ మస్క్ పోటీ ఇవ్వడం అంత సులభం కాదని పేర్కొన్నారు.

- భారత మార్కెట్లో మస్క్‌కు సవాళ్లు

'ఎలాన్ మస్క్ భారత్‌లో ఉండరు. భారతీయ కంపెనీలే ఇక్కడ తమదైన మార్కును ఏర్పరచుకుంటాయి. మహీంద్రా, టాటా వంటి సంస్థలు ఇప్పటికే ఈ రంగంలో బలమైన ముద్రను వేశాయి. మస్క్ భారత మార్కెట్లో అదే స్థాయిలో పోటీ చేయగలరా అనేది సందేహమే' అని జిందాల్ వ్యాఖ్యానించారు. అంతేకాకుండా, అమెరికాలో డొనాల్డ్ ట్రంప్ వంటి రాజకీయ నేతల మద్దతుతో మస్క్ వ్యాపారం సాగించగలరని, అయితే భారతదేశంలో ఆ పరిస్థితి భిన్నంగా ఉంటుందని ఆయన అభిప్రాయపడ్డారు.

- భారతీయ ఆటోమొబైల్ రంగంలో దేశీయ కంపెనీల ఆధిపత్యం

భారత ఎలక్ట్రిక్ వాహన మార్కెట్‌లో టాటా మోటార్స్, మహీంద్రా తదితర సంస్థలు ఇప్పటికే ప్రధానమైన పాత్ర పోషిస్తున్నాయి. టాటా మోటార్స్ EV విభాగంలో ముందంజలో ఉంది. ఆ కంపెనీ టాటా నెక్సాన్ EV వంటి మోడళ్లను విజయవంతంగా ప్రవేశపెట్టింది. మహీంద్రా కూడా XUV400 వంటి మోడళ్లతో పోటీని మరింత పెంచింది.

- JSW, MG మోటార్ జాయింట్ వెంచర్

జిందాల్ ఈ వ్యాఖ్యలు చేయడం వెనుక ఒక ఆసక్తికరమైన అంశం ఉంది. ఆయన నేతృత్వంలోని JSW గ్రూప్ ఇప్పటికే చైనా సంస్థ MG మోటార్ తో భాగస్వామ్యం ఏర్పరచుకుంది. దీని ద్వారా భారత EV మార్కెట్లో తమకున్న అవకాశాలను మెరుగుపరచుకోవాలని లక్ష్యంగా పెట్టుకుంది.

- టెస్లా కోసం భారత్‌లో పరిస్థితి ఎలా?

టెస్లా భారతదేశంలో తమ వ్యాపార అవకాశాలను అన్వేషిస్తోంది. అయితే ఇక్కడి ఉత్పత్తి ఖర్చులు, పన్నుల వ్యవస్థ, సపోర్ట్ ఇన్‌ఫ్రాస్ట్రక్చర్ వంటి అంశాలు పెద్ద సవాలుగా మారాయి. ప్రభుత్వ విధానాలు మారినప్పటికీ టెస్లా కోసం ఇది సరైన మార్కెట్ అవుతుందా? అన్నది చూడాల్సిన అంశంగా మారింది..

సజ్జన్ జిందాల్ అభిప్రాయాలు పరిశీలించినప్పుడు భారతదేశంలో టెస్లా విజయవంతం అవ్వాలంటే చాలా ప్రతికూలతలను అధిగమించాల్సి వస్తుందనిపిస్తోంది. టాటా, మహీంద్రా వంటి దేశీయ సంస్థలు ఇప్పటికే ప్రధానంగా ఉన్న ఈ విభాగంలో టెస్లా ఎంత వరకు ప్రభావం చూపగలదో సమయం చూపించాలి.